රායප්පු ජෝසප් හිමිපාණන්ගේ අවසන් ගමනට මහජන හරසර (VIDEO)

0

ශ්‍රී ලංකාවේ යුද අපරාධ චෝදනා පිළිබඳව ප්‍රබල සාක්ෂිකරුවකු වූ රාජගුරු ප්‍රසාදීන් වහන්සේ නමකගේ අවසන් කටයුතු සිදු කළ දිනයේ ඔහුගේ පිළිරුවක් නිරාවරණය කරමින් දෙමළ ජනතාව ගෞරවාභිමානය පුද කර තිබේ.

අසූ එක් වසරක් ආයු වළඳා අප්‍රේල් පළමුවැනිදා අවසන් හුස්ම හෙලූ මන්නාරම විශ්‍රාමික රදගුරු ආචාර්ය රායප්පු ජෝසප් හිමිපාණන්ගේ දේහය පිළිබදව අවසන් කටයුතු අප්‍රේල් 5 සඳුදා මන්නාරමේ ශාන්ත සෙබස්තියන් ආසන දෙව්මැදුරේදී සිදුකරන ලදී.

උන්වහන්සේට බුහුමන් දක්වනු පිණිස සිය ගණනින් ජනතාව එක්ව සිටි අතර දෙමළ දේශපාලන පක්ෂ හා සංවිධාන විසින් ශෝක දිනයක් ප්‍රකාශයට පත් කර තිබුණි.

මන්නාරම රදගුරු හිමිපානන්ගේ ප්‍රධානත්වයෙන් පැවැති අවසන් දේව මෙහෙයට කොළඹ අගරදගුරු මැල්කම් කාදිනල් රංජිත් හිමිපානන්, පාප් වහන්සේගේ මෙරට නියෝජිත ඇතුළු හිමිවරුන් රැසක් එක්ව තිබේ.

පාප් වහන්සේගේ මෙරට නියෝජිත, කොළඹ අගරදගුරු හා අග්‍රාමාත්‍යවරයාගේ ශෝක පණිවිඩද එහිදී ඉදිරිපත් කරන ලද බව පළාත් බද වාර්තාකරුවෝ පවසති.

අනතුරුව දේවස්ථානයේ ගර්භයක් තුළ හිමිපානන්ගේ දේහය තැන්පත් කර තිබේ.

පළාත් බද වාර්තාකරුවන් වැඩි දුර පවසන්නේ මන්නාරම නගරයේදී රායප්පු ජෝසප් හිමිපානන්ගේ පිළිරුවක්ද අප්‍රේල් 5 සඳුදා හවස නිරාවරණය කළ බවයි.

යුද අපරාධ චෝදනා පිළිබඳ සාක්ෂිකරුවකු වීම හේතුවෙන් නිල කතෝලික නායකත්වය ඇතුළු සිංහල බහුතරයක අප්‍රසාදයට හා වෛරයට පාත්‍රවීමට ජීවමානව සිටියදීම මන්නාරම රදගුරු රායප්පු ජෝසප් හිමිපානන්ට සිදු විය.

ඒ නිසාම රායප්පු ජෝසප් පියතුමාට ආරක්ෂක සේනාවලත්, සිංහල දේශපාලකයන්ගේත්, ප්‍රධාන ධාරාවේ ජනමාධ්‍යකරුවන්ගේත් නිරන්තර අඩන්තේට්ටමට ගොදුරු වීමට සිදුවිය.

රායප්පු ජෝසප් හිමිපානන්ගේ මරණය සම්බන්ධයෙන් ශෝක පණිවිඩයක් නිකුත් කරමින් අග්‍රාමාත්‍ය මහින්ද රාජපක්ෂ සදහන් කර තිබුනේ යුද ගිනි ඇවිලී ගිය ප්‍රදේශයේ සිට එම ජනතාවට ආගමික සහනය ලබා දීම වෙනුවෙන් කළ කැපවීම මේ මොහොතේ කෘතගුණපුර්වකව සිහිපත් කරන බවයි.

“මන්නාරම මරද මඩු මාතා දේවස්ථානය ආරක්ෂා කර ගැනීම වෙනුවෙන් රායප්පු ජෝසප් හිමිපානන් දැක්වු දායකත්වය මෙහිදී සුවිශේෂිව සිහිපත් කළ යුතුය,” යි එහි වැඩි දුරටත් සඳහන්ව තිබුනි.

ශ්‍රී ලංකා ආරක්ෂක රජයේ සේනා ෂෙල් ප්‍රහාරයට ගොදුරු වූ මඩු පල්ලියේ සරණ පතා සිටි හතළිහකට අධික පිරිසක් මරුමුවට පත්වී සිය ගණනක් තුවාල ලද අවස්ථාවේ හිටපු රදගුරු තුමා විසින් මරද මඩු මාතා පිළිරුව තේවාන්පිට්ටි දේවස්ථානයට ගෙනගොස් ආරක්ෂාව සලසන ලදී.

රායප්පු ජෝසප් හිමිපානන් විසින් හෙළි කරන ලද යුද අපරාධ පිළිබඳ ලිපියක් මෙතනින්:

Facebook Comments