මහින්ද රාජපක්ෂ අගමැති ධුරයට පත් කරමින් පිහිටවු කැබිනට්ටුවට එරෙහිව පාර්ලිමේන්තුවේදී සම්මත කර ගන්නා ලද විශ්වාස භංග යෝජනවා සංශෝධනය කර නැවත ඉදිරිපත් කරන ලෙස ජනාධිපතිවරයා විසින් පක්ෂ නායකයන්ගෙන් ඉල්ලා තිබේ.
ජනතා විමුක්ති පෙරමුණ විසින් 14 බදාදා ජනපතිගේ කැමැත්ත පරිදි පිහිටවු මහින්ද රාජපක්ෂගේ නායකත්වයෙන් යුතු කැබිනෙට්ටුවට එරෙහි විශ්වාස භංග යෝජනාවක් ඉදිරිපත් කළ අතර ඒකාබද්ධ විපක්ෂ කණ්ඩායමේ බාධා මැද එය සම්මත විය.
කෙසේ වෙතත් ජනපති මෛත්‍රීපාල සිරිසේන විසින් විශ්වාස භංග යෝජනාවේ ඇතුලත්ව ඇති “ජනාධිපතිවරයා ව්‍යවස්ථාව උල්ලංඝනය කරමින් නිකුත් කළ ගැසට් නිවේදනය” යන කොටස ඉවත් කර නැවත ඉදිරිපත් කරන ලෙස ඉල්ලු බව සාකච්ඡාවට එක්වු පක්ෂ නායකයෙකු කියා සිටියේය.
එම වගන්තිය හරහා තමන්ට විරුද්ධව විශ්වාස භංගයක් ඉදිරිපත් වීමේ අවධානමක් පවතින බවයි ජනාධිපතිවරයා පක්ෂ නායකයන් හට පෙන්වා දී ඇත්තේ.
එහෙත් රනිල් වික්‍රමසිංහ හට නැවත අගමැති ධුරය ලබා දීමට අකමැත්ත පල කර ඇති බවයි නම සඳහන් නොකරන ලෙස ඉල්ලා සිටි පක්ෂ නියෝජිතයා සිලෝන් නිව්ස් වෙත ප්‍රකාශ කළේ.
මහින්ද රාජපක්ෂ නායකත්වයෙන් බිහිකළ කැබිනෙට්ටුවට සහ ඔහු විසින් අද දින පාර්ලිමේන්තුවේ දී කරන ලද ප්‍රකාශයට විරුද්ධව 16 සිකුරාදා දිනයේදී විශ්වාස භංග යෝජනාවක් ඉදිරිපත් කර එදිනම ජන්දය විමසීමට පක්ෂ නායකයන් සුදානම් වන බවටයි වාර්තා වන්නේ.
“මේක ඉක්මනට විසඳන්න ඕන කියලා තමයි ජනපතිවරයා පැවැසුවේ සුහදව සාකච්ඡාවක් ඇතිවුණා. ඉතාමත් ඉක්මනින්ම ප්‍රශ්නය විසදේවි” යැයි ජනපති හමුවීමෙන් පසුව රවී කරුණානායක මන්ත්‍රීවරයා මාධ්‍ය වෙත පැවසීය.
කතානායක කරු ජයසුරිය ,එක්සත් ජාතික පෙරමුණ, දෙමළ සන්ධානය, මුස්ලිම් කොංග්‍රසය ඇතුළු දේශපාලන පක්ෂ කිහිපයක නායකයින් මෙම රැස්වීමට සහභාගිවී සිටි නමුත් ජනතා විමුක්ති පෙරමුණේ කිසිවෙකු සාකච්ඡාවට සහභාගී වී නැත.
Facebook Comments
