ගෝඨාභය රාජපක්ෂ රජය සමයේ කොවිඩ්-19 වසංගත තත්ත්වය හමුවේ මුස්ලිම් ජනයාගේ විරෝධය මැද එම මළ සිරුරු අදාහනය කිරිම ගැන වතුකරය නියෝජනය කරන කැබිනට් අමාත්‍යවරයකු සමාව අයැද තිබේ.
2024 අප්‍රේල් 02 වන අඟහරුවාදා දින හැටන් නගරයේ ඔහුගේ ප්‍රධානත්වයෙන් පැවති ඉෆ්තාර් හමුවකට එක්වු ශ්‍රී ලංකාවේ ලාබාලතම කැබිනට් අමාත්‍යවරයා වන, ජල සම්පාදන හා වතු යටිතල පහසුකම් සංවර්ධන අමාත්‍ය ජීවන් තොණ්ඩමන් එසේ මුස්ලිම් ප්‍රජාව ගෙන් සමාව ඉල්ලා සිටියේය.
හිටපු ජනාධිපති ගෝඨාභය රාජපක්ෂගේ අනිවාර්ය ආදාහන ප්‍රතිපත්තිය ක්‍රියාත්මක කරනු ලැබුවේ, කොවිඩ්-19 තත්ත්වයෙන් මරණයට පත් වූ පුද්ගලයන් භූමදානය කිරීමෙන් ජල සැපයුම් පද්ධති අපවිත්‍ර වේ යැයි මතයක් ඉදිරිපත් වීම නිසා බවත් එම ප්‍රතිපත්තිය ක්‍රියාත්මක කරනු ලැබුවේ, එවන් අවදානමක් සිදුනොවන බවට, ලෝක සෞඛ්‍ය සංවිධානයේ මතය ඇතුළු විවිධ විද්‍යාත්මක මත ඉදිරිපත් වී තිබූ පසුබිමක බව ඇමැතිවරයා සිහිපත් කර ඇත.
කොවිඩ් ආසාදිත මළසිරුරු භූමදානය කිරීමෙන් භූගත ජලයට සිදුවන බලපෑම විශ්ලේෂණය කිරීම සඳහා පරිපූර්ණ සමාලෝචන අධ්‍යයනයක් සිදුකිරීමට JRDC ආයතනය කටයුතු කළේය.
එහි ප්‍රතිඵල මේ වසරේ දී ප්‍රකාශයට පත් කරමින්, වසංගත තත්ත්වය පැවති සමයේ නිසිපරිදි භූමදානයකළ මළසිරුරු වලින් කිසිඳු භූගත ජල දූෂණයක් සිදුනොවන බවට එම ආයතනය නිගමනය කර තිබේ.
මුද්‍රා තබන ලද මෘත ශරීර අඩංගු මළු ගැඹුරු ලෙස භූමදානය කිරීම ඇතුළු නිසි භූමදාන ක්‍රමවේදයක් අනුගමනය කිරීම හරහා විධිමත් ලෙස පාරිසරික දූෂණයක් සිදුවීමේ අවදානම අවම කර ගත හැකි බවට එම අධ්‍යයනයෙන් හෙළි කර ඇත.
බලහත්කාරයෙන් ආදාහනය කිරීමේ ප්‍රතිපත්තිය නිසා විශේෂයෙන් ම මුස්ලිම් ප්‍රජාවට සිදු වූ අගතියට විධිමත් අන්දමින් සමාව භජනය කරමින්, මෙම අධ්‍යයනයේ සොයාගැනීම් ද සමඟ කැබිනට් පත්‍රිකාවක් නුදුරේදී ම ඉදිරිපත් කිරීමට තමා අපේක්ෂා කරන බව ද ජල සම්පාදන හා වතු යටිතල පහසුකම් සංවර්ධන අමාත්‍ය ජීවන් තොණ්ඩමන් වැඩිදුරටත් ප්‍රකාශ කර තිබේ.
Facebook Comments
