වමේ පක්ෂ සමඟ එක්ව බිහිකරන සන්ධානයක් මගින් නිශ්චිත වශයෙන්ම ඉදිරියේදී ආණ්ඩුවක් පිහිටුවන බව ශ්‍රී.ල.නි.ප සභාපතිවරයා ප්‍රකාශ කර තිබේ.
වත්මන් ආණ්ඩුව ගෙනයන්නේ පොහොට්ටු පක්ෂයේ නායකයන් නිසා එහි තනතුරක් ලබාදුන්නත් භාරගැනීමට තමන් සූදානම් නැති බව හිටපු ජනාධිපති මෛත්‍රීපාල සිරිසේන ශ්‍රී ජයවර්ධනපුර ග්‍රෑන්ඩ් මොනාක් හෝටලයේ දී ඊයේ (28) පැවති එම පක්ෂයේ රැස්වීමක් අමතමින් කියා සිටියේය.
තමන්ට අගමැති ධුරය ලබාදුන්නේ නම් මීට වඩා වෙනසක් කරන බවට පක්ෂයේ පිරිස් පැවසුවත් පොහොට්ටු පක්ෂයේ නායකයන් විසින් පාලනය කරන ආණ්ඩුවක අගමැති තනතුර තමන් භාරනොගන්නා බවයි හිටපු ජනාධිපතිවරයා අවධාරණය කරන්නේ.
“තිලංග සුමතිපාල මහත්තයා කිව්වා අපේ කෙනාට අගමැතිකම දුන්න නං ජාත්‍යන්තර සහාය මීට වඩා හොඳ තැනකට රට ගේන්න තිබුන කියලා. එකක් මම කියන්න කැමතියි, මම නං මේ ආණ්ඩුවෙ අගමැතිකම් බාර ගන්න ලෑස්ති නෑ තාමත් මේ ආණ්ඩුව කරන්නේ පොහොට්ටුවේ නායකයෝ. පොහොට්ටුවට බහුතරය තියෙන්නේ, රාජපක්ෂ මහත්තුරු තමයි තාමත් මේ ආණ්ඩුව පාලනය කරන්නෙ ඒ නිසා මටනම් අගමැතිකම අවශ්‍ය නෑ. හැබැයි මම විපක්ෂ සියලු පක්ෂ එකතු කරලා පොදු බලවේගයක් හදලා ආණ්ඩුවක් හදනවා ඒක ස්ථිරවම කරනවා.”
“ශ්‍රී ලංකා නිදහස් පක්ෂයේ අපි ආණ්ඩුවේ ඇමැතිකම් ගන්න එක පිළිබඳව කිසිම තීරණයක් ගෙන නැහැ මධ්‍යම කාරක සභාවත් පක්ෂයවත් එහෙම තීරණයක් ගෙන නෑ. සමහර ආණ්ඩුවට ගිය අය මාධ්‍යට කියනවා අපි ගියේ මෛත්‍රිපාල සිරිසේන ජනාධිපතිතුමාගේ අවසර අරන් ලු, තවත් අය කියනවා පක්ෂය අනුමැතිය අරන් කියලා මේවා පට්ටපල් බොරු.” යැයි තම පක්ෂයේ පිරිස් ආණ්ඩුවට සම්බන්ධවීම ගැන හිටපු ජනාධිපති මෛත්‍රීපාල සිරිසේන කියා සිටියේය.
Facebook Comments
