භාරත ඝාතනයට දුමින්ද සිල්වා ඇතුලු පස් දෙනෙකුට මරණ දඬුවම

2011 වර්ෂයේ ඔක්තොම්බර් මස 8 වන දින මුල්ලේරියාව ප්‍රදේශයෙදී හිටපු පාර්ලිමේන්තු මන්ත්‍රීවරයෙකු හා ජනපතිගේ වෘත්තීය සමිති කටයුතු උපදේශකවරයෙකු ද වූ භාරත ලක්ෂ්මන් ප්‍රේමචන්ද්‍ර වෙඩි තබා ඝාතනය කිරීම සම්බන්ධයෙන් ‍චෝදනා ලැබූ 13 දෙනෙකුගෙන් දුමින්ද සිල්වා ඇතුළු 5දෙනෙකුට මරණ දඬුවම නියම කරනු ලැබුවා.

කොළඹ මහාධ්කරණය අද (08) මරණ දණ්ඩනය නියම කළ අතර මහාධිකරනයේ ත්‍රිපුද්ගල විනිසුරු මඩුල්ල අතරින් විනිසුරු පද්මිණී එන්. රණවක සහ එම්.සි.බි.එස්. මොරායස් යන විනිසුරුවරුන් දුමින්ද සිල්වා ඇතුළු විත්තිකරුවන් පස්දෙනෙක් වරදකරුවන් බව ප්‍රකාශ කළාය.

නඩුවේ පළමු වැනි විත්තිකරු වූ අනුර තුෂාර ද මෙල්, තෙවැනි විත්තිකරු චමින්ද රවී ජයනාත් හෙවත් දෙමටගොඩ චමින්ද, හත් වැනි විත්තිකරු සරත් බණ්ඩාර,නඩුවේ 10 වැනි විත්තිකරු ජනක බණ්ඩාර ගලගොඩ සහ 11 වන විත්තිකරු දුමින්ද සිල්වා යන අයට මෙලෙස මරණ දණ්ඩනය හිමි විය.

මෙලෙස මරණ දඬුවම නියම වූ පස්දෙනාගෙන් ප්‍රියන්ත ජානක බණ්ඩාර තවමත් අතුරුදන් වී ඇති බව අධිකරණයට දැනුම්දී තිබේ.

මෙම නඩු තීන්දුව 2/1ක් ලෙස බෙදුණු නඩු තීන්දුවක් ලෙස ප්‍රකාශයට පත්වූ අතර ත්‍රිපුද්ගල විනිසුරු මඩුල්ලේ දෙදෙනෙකුගේ තීන්දුව වූයේ මෙම වැරදිකරුවන්ට මරණ දඬුවම ලබාදීමය.

ත්‍රිපුද්ගල විනිසුරු මඩුල්ලේ සභාපති ශිරාන් ගුණරත්න මහතාට අනූව රජයේ සාක්ෂි පරස්පරතාවයන් පවත්නා හේතුවෙන් මෙම‍ සියළුදෙනාම නිදොස් කොට නිදහස් බව ප්‍රකාශයට පත් කර ඇත.

එසේ වුවද සෙසු විනිසුරුවරුන් දෙදෙනාට අනූව සාධාරණ සැකයකින් තොරව වරද තහවුරුව ඇති බැවින් ඉහත පස්දෙනාටම මරණ දඬුවම ප්‍රකාශයට පත් කළ අතර සෙසු පිරිස නිදහස් කිරීමට නියෝග කර තිබේ.

මෙම නඩුවේ 11 වන විත්තිකරු වු දුමින්ද සිල්වා යන අයගේ ප්‍රචන්ඩකාරී හැසිරීම සහ ඔහු සැපයු නායකත්වයෙන් මෙම සිදු වීම සිදු වී ඇති බවට පද්මිණි එන්.රනවක විනිසුරුවරිය සිය තීන්දුව ප්‍රකාශයට පත් කරමින් පැවසු අතර දුමින්ද සිල්වා ගේ නායකත්වය මෙම සිද්ධියට හේතු වී ඇති බවට තීන්දු කළේය.

ත්‍රිපුද්ගල මහාධිකරණ විනිසුරු මඬුල්ලේ සභාපති විනිසුරු ශිරාන් ගුණරත්න මහතා සිය තීන්දුව ප්‍රකාශයට පත් කරමින් සියලු සැකකරුවන් සියලු චෝදනාවලින්නිදොස් කොට නිදහස් කළේය. නඩුවේ සාක්ෂිකරුවන් වු විමර්ශන නිලධාරීන්ගේ සාක්ෂි පරස්පර බවට ඔහු තීන්දු කළේය.

නඩුවේ සෙසු විත්තිකරුවන් 8 දෙනා චන්දන ජගත් කුමාර, ලංකා රසාංජන, මාලක සමීර, විදානගමගේ අමිල, සුරංග ප්‍රේමලාල්, සමන් කුමාර අබේවික්‍රම, රෝහණ මාරසිංහ සහ නාගොඩ ලියනආරච්චි චෝදනාවලින් නිදොස්කොට නිදහස් කරනු ලැබූහ.

හිටපු පාර්ලිමේන්තු මන්ත්‍රි භාරත ලක්ෂ්මන් ප්‍රෙමචන්ද්‍ර මහතා ඇතුලු සිව් දෙනෙකු ඝාතනය කිරීම, ඝාතනය කිරීමට කුමන්ත්‍රනය කිරීම, ජන්ද දායකයන් හට ගිනි අවිභාවිත කරමින් සාපරාධි බිය ගැන්වීම, නීති විරොධී රැස් වීමක සාමජිකයින් වීම ඇතුලු චෝදනා 10 කට වරදකරුවන් කර රුපියල් 40,000 බැගින් වු දඩ මුදලක් ද ගෙවීමට නියෝග කළේය.