කාදිනල්ගේ වෙඩිමුරයෙන් පසු අගමැති අඩියක් පස්සට ගනී (VIDEO)

0

පාස්කු ප්‍රහාරයේ වින්දිතයන්ට යුක්තිය ඉෂ්ට කිරීම වැළැක්වීමට කුමන්ත්‍රණයක යෙදී සිටින බවට කතෝලික සභාවෙන් දැඩි දෝෂ දර්ශනයක් එල්ල වීමත් සමගම අගමැතිවරයා පාප් වහන්සේ මුණගැසීම අතහැර දමා තිබේ.

කොළඹ අගරදගුරු මැල්කම් කාදිනල් රංජිත් හිමියන් සැප්තැම්බර් 8 බදාදා විශේෂ මාධ්‍ය හමුවක් කැදවමින් චෝදනා කළේ අගමැතිවරයා සහ විදේශ කටයුතු අමාත්‍යවරයා වතිකානවේ සංචාරයක යෙදී පාස්කු ප්‍රහාරය සම්බන්ධයෙන් සිදුකෙරෙන පරීක්ෂණ සම්බන්ධයෙන් සත්‍ය යටගැසීමට සැරසෙන බවයි.

“අගමැතිතුමාත්, විදේශ කටයුතු ඇමැතිතුමාත් ඔවුන් සමග යන කණ්ඩායමත් මේ යන ගමන අපි ප්‍රයෝගකාරී ගමනක් ලෙස හදුන්වනවා. ඒවගේම එම වැඩ පිළිවෙළ මම තරයේම හෙලා දකිනවා.”

අගරදගුරුගේ ප්‍රහාරයට පෙරදා කැබිනට් මාධ්‍ය ප්‍රකාශක රමේෂ් පතිරණ අමාත්‍යවරයා ප්‍රකාශ කර තිබුණේ, පාස්කු ප්‍රහාරයේ පරීක්ෂණ සම්බන්ධ ප්‍රගතිය ෆ්‍රැන්සිස් පාප් වහන්සේට වාර්තා කිරීම සඳහා අගමැති මහින්ද රාජපක්ෂ සහ විදේශ අමාත්‍ය ජී ඇල් පීරිස් වතිකානය බලා යන බවයි.

එම සංචාරය විදේශිය රටවල් මෙන්ම ශුද්ධෝත්තම පාප් වහන්සේ පවා නොමග යැවීම සඳහා “සත්‍ය යට ගැසීමට රජය ගෙන යන ව්‍යාපාරයේ තවත් එක් තුරුම්පුවක්” ලෙසින් කාදිනල් හිමියන්ගේ දැඩි හෙලා දැකීමට ලක්ව තිබුණි.

” මේ රජය පරීක්ෂණ යට ගහන උත්සාහයක් විනා වින්දිතයන්ට යුක්තිය ඉටු කිරීමක් අපට පෙනෙන්නට නැති බව අපි ජාත්‍යන්තරයට දැනුම් දෙන්නට කටයුතු කළා. ”

කතෝලික සභාව ඇතුළු ජාත්‍යන්තරයට බොරු කීමට ආණ්ඩුව උත්සාහ ගන්නා බවට රජයට චෝදනා කරන කාදිනල් හිමියන්ගේ දැඩි වාග් ප්‍රහාරයෙන් පැය කීපයක් ගතවෙත්ම විදේශ අමාත්‍යාංශය ප්‍රකාශ කළේ අගමැතිවරයා ස්වකීය ඉතාලි සංචාරයේදී පාප් වහන්සේ මුණ ගැසෙන්නේ නැති බවයි.

අගමැති, විදෙස් ඇමැති දෙදෙනාගේ සංචාරයේ අරමුණ බොලොඤ්ඤා නුවර සමුළුවක සමාරම්භක උත්සවයකට සහභාගී වීම පමණක් බවයි විදේශ අමාත්‍යාංශය නිවේදනය කර තිබුනේ.

ශුද්ධාසනයේ නියෝජිතවරයා සහ ජී.ඇල් අතර හමුවක්

ශ්‍රී ලංකාව සඳහා ශුද්ධාසනයේ නියෝජිත (වතිකානු තානාපති) බ්‍රයන් උඩයිග්වේ අගරදගුරුතුමා අගෝස්තු 31 වැනි අඟහරුවාදා විදේශ කටයුතු අමාත්‍යාංශයේ දී විදේශ අමාත්‍ය මහාචාර්ය ජී.එල්. පීරිස් හමු වී තිබුනි.

විදේශ අමාත්‍යාංශය නිවේදනය කර තිබුනේ පාස්කු ප්‍රහාරය සම්බන්ධයෙන් දැනට සිදු කෙරෙන පරීක්ෂණයේ සංවේදී ස්වභාවය පිළිබඳව සඳහන් කරමින්, ගැටලු විසඳා ගැනීමට පහසුකම් සැලසීමේ අදහසින් යුතුව අගරදගුරු මැල්කම් රංජිත් හිමිපාණන් සහ කතෝලික රදගුරු සම්මේලනය සමඟ හැකි ඉක්මනින් දැනුවත් සාකච්ඡාවක් පැවැත්වීමේ අවශ්‍යතාවය පිළිබඳව අමාත්‍යවරයා එහිදි ද අවධාරණය කළ බවයි.

මිනිස් ජීවිත 268 ක්

දේවස්ථාන සහ සංචාරක හෝටල් කිහිපයක් ඉලක්ක කර ගනිමින් 2019 අප්‍රේල් මස 21 වන දින එල්ල කළ මරාගෙන මැරෙන බෝම්බ ප්‍රහාර මාලාව නිසා 250 කට අධික සාමාන්‍ය වැසියන් සංඛ්‍යාවක් මියගියහ.

කටුවාපිටිය ශාන්ත සෙබස්තියන් දේවස්ථානය, කොටහේන කොච්චිකඩේ ශාන්ත අන්තෝනි දේවස්ථානය, මඩකලපුව සියොන් දේවස්ථානය, දෙහිවල හෝටලයක සහ කොළඹ කිංග්ස්බරි, ෂැන්ග්‍රිලා, සිනමන් ග්‍රෑන්ඩ් හෝටල්වල දෙවසරකට ඉහතදී බෝම්බ පිපිරීම් සිදු වුයේ පුද්ගලයන් 268ක් ජීවිතක්ෂයට පත්කරමින්, තවත් 500කට අධික ප්‍රමාණයක් තුවාල සිදුකරමිනි.

පාස්කු ප්‍රහාරයේ සැකකරුවන් ලෙස ශ්‍රී ලංකාවේ අත් අඩංගුවේ ඉන්නා තිදෙනකුට එරෙහිව ඇමරිකා එක්සත් ජනපදය චෝදනා ගොනු කොට ඇති අතර , ත්‍රස්ත නීති යොදාගෙන දිවයින තුල සිරකොටගෙන ඉන්නා සිය ගණනකගෙන් නඩු පවරා ඇත්තේ පනහකටත් අඩු පිරිසකට පමණි.

පාස්කු ඉරුදින ප්‍රහාරය ගැන විමර්ශන, විවේචනය කරන පුද්ගලයන්ට එරෙහිව නීතිමය පියවර ගන්නා බවට විශේෂ ප්‍රකාශයක් කරමින් පසුගියදා අනතුරු ඇගවු පොලිස්පති සී.ඩි වික්‍රමරත්න එහිදී පවසා තිබුනේ ප්‍රහාරය සම්බන්ධයෙන් අත් අඩංගුවට ගත් පුද්ගලයන් 723 කගෙන් 311 දෙනෙක් තවමත් රිමාන්ඩ් බාරයේ බවයි.

Facebook Comments

wedding people