ජනාධිපති වරයාගේ අත්සනින් පිහිටුවන ලද අතුරුදහන් වුවන් පිලිබඳව වු කාර්යාල කඩිනමින් ක්‍රියාත්මක කරන ලෙස එක්සත් ජාතීන්ගේ සංවිධානය ඇතුළු විදේශීය ආණ්ඩු සහ මානව හිමිකම් සංවිධාන ශ්‍රී ලංකා රජයෙන් ඉල්ලා සිටී.
අතුරුදහන් වුවන් පිලිබඳව වු කාර්යාල පිහිටුවීම අතුරුදහන් වුවන් පිලිබඳ සත්‍යය හෙළිදරව් කරගැනීමට වෙහෙසෙන සකල ශ්‍රී ලාංකිකයන්ට “තීරණාත්මක මංසන්ධියක්” බව එක්සත් ජාතීන්ගේ මහලේකම්වරයා පවසයි.
“මේ ක්‍රියාදාමයට සහාය දීමට එක්සත් ජාතීන්ගේ සංවිධානය සැදී පැහැදී සිටින අතර, ස්වාධීන කොමසාරිස්වරුන් පත් කිරීමෙන් ආරම්භ කර OMP කාර්යාලය හැකි ඉක්මනින් ක්‍රියාත්මක වනු දැකීම මහ ලේකම් වරයාගේ මහත් බලාපොරොත්තුවයි,” යනුවෙන් අන්තෝනියෝ ගුතරෙස් ගේ කාර්යාලයෙන් නිකුත් කරන ලද නිවේදනයක දැක්වේ.
සංහිඳියාවට තැබු ධෛර්ය සම්පන්න පියවරක්
අතුරුදහන් වුවන් සඳහා වන කාර්යාලය නීතිගත කිරීම ශ්‍රී ලංකා රජය සංහිඳියාවේ දිසාවට තැබු ධෛර්ය සම්පන්න පියවරක් ලෙසින් හඳුන්වන බ්‍රිතාන්‍ය විදේශ අමාත්‍යාංශයා එය වහාම ක්‍රියාවට නගන ලෙස බලකර සිටී.
ඒ සමගම ත්‍රස්තවාදය වැලැක්වීමේ පනත අහෝසි කොට ජාත්‍යන්තර මානව හිමිකම් ප්‍රමිතියට අනුකුල නව නීති සම්පාදනයද සිදු කරන ලෙස බ්‍රිතාන්‍යයේ විදේශ හා පොදුරාජ්‍ය මණ්ඩල කාර්යාලය ස්වකීය වාර්ෂික මානව හිමිකම් වාර්තාවෙන් ඉල්ලා සිටී.
ඇමරිකා එක්සත් ජනපදයේ සහ කැනඩාවේ ශ්‍රී ලාංකීය දූත මණ්ඩල ප්‍රධානීන්ද OMP කාර්යාලය පිහිටුවීම ගැන ප්‍රසාදය පළකර තිබේ.
එක්සත් ජනපද තානාපති ඇතුල් කේෂප් පවසා ඇත්තේ වහාම කාර්යාලය ක්‍රියාත්මක කිරීම පිළිතුරු සොයමින් සිටින අතුරුදහන් වුවන්ගේ ඥාතීන්ගේ අපේක්ෂාව බවයි.
අතුරුදහන් වුවන්ගේ ඉරණම හෙළි කිරීම සඳහා තබන ලද වැදගත් පියවරක් ලෙස කැනඩා මහ කොමසාරිස් ෂෙලී විටින් OMP කාර්යාලය පිළිබඳ ප්‍රසාදය පල කළාය.
Facebook Comments
