එක්සත් ජාතික පක්ෂ නායකයා ඉදිරිපත් කරන ලද කොන්දේසි වලට යටත්ව එම පක්ෂයේ නියෝජ්‍ය නායකයා හට ඉදිරි ජනපතිවරණයට තරඟ කිරිමේ අවස්ථාව හිමිව තිබේ.
අගමැති රනිල් වික්‍රමසිංහ විසින් එජාපෙ ජනපති අපේක්ෂකත්වය අමාත්‍ය සජිත් ප්‍රේමදාස හට ලබා දුන් බව හර්ෂ ද සිල්වා අමාත්‍යවරයා විසින් සිය ට්විටර් ගිණුමේ සටහනක් තබමින් නිවේදනය කර ඇත.
එජාප නායක හා පක්ෂයේ ජ්‍යෙෂ්ඨ සාමාජිකයින් අතර 24 අඟහරුවාද පැවති සාකච්ඡාවක දී මෙසේ සජිත් ප්‍රේමදාස අමාත්‍යවරයා හට අපේක්ෂකත්වය ලබා දීමට තීරණය කරන ලද බවයි වාර්තා වන්නේ.
කෙසේ වෙතත් පක්ෂයේ නියෝජ්‍ය නායකයා හට ජනපති අපේක්ෂකත්වය ලබා දීමට පක්ෂ නායක අගමැති රනිල් වික්‍රමසිංහ විසින් කොන්දේසි කිහිපයක් ඉදිරිපත් කර තිබේ.
විධායක ජනාධිපති ක්‍රමය අහෝසි කිරිම, පක්ෂ නායකත්වය සහ අග්‍රාමාත්‍ය ධුරය රනිල් වික්‍රමසිංහ සන්තකයේම තබා ගැනීමට ලබා දීම, මහ ලේකම්, උප නායක ආදී පක්ෂයේ තනතුරු දරන පුද්ගලයින් වෙනස් නොකිරීම, එම කොන්දේසි වලට අයත් වේ.
අදාළ කොන්දේසි සජිත් ප්‍රේමදාස අමාත්‍යවරයා හට ලිඛිත ලබා දීමට කටයුතු කර ඇති බවත් ඔහු ඊට එකඟ වන්නේ නම් 26 බ්‍රහස්පතින්දා පැවැත්වෙන කෘත්‍යාධිකාරි මණ්ඩලයේදී ඔහුට අපේක්ෂකත්වය ලැබෙනු ඇතැයි එජාප ආරංච් මාර්ග පවසයි.
Facebook Comments
