එක්සත් ජාතික පක්ෂයේ ඉදිරි ජනපතිවරණ අපේක්ෂකත්වය ලබා දීමට පක්ෂ නායක අගමැති රනිල් වික්‍රමසිංහ ඉදිරිපත් කර ඇති කොන්දේසි වලට යටත්ව අපේක්ෂකත්වය ලබා ගැනීමට සුදානම් නොමැති බව එජාප නියෝජ්‍ය නායක සජිත් ප්‍රේමදාස ප්‍රකාශ කර ඇත.
සජිත් ප්‍රේමදාස අමාත්‍යවරයාගෙන් කළ විමසීමකදී මේ බව දැනුම් දුන් බව ද ලීඩර් වෙබ් අඩිවය වාර්තා කර තිබේ.
”එහෙම කොන්දේසි පැනවීමක් ගැන මේ දක්වා මට දැනුම් දීමක් කර නැහැ. එත් එක දෙයක් ගැන පැහැදිලිව කියන්න ඕන. මම කිසිම දෙකට රටේ ආත්ම ගෞරවය, පක්ෂයේ හෝ පෙරමුණේ ආත්ම ගෞරවය, ඒවගේම මගේ ආත්ම ගෞරවය තුට්ටු දෙකකට විකුනලා වාසි ගන්න කෙනෙක් නෙමෙයි. ඉතිහාසයේ එහෙම අය ඉන්න ඇති. එත්, මේ සජිත් ප්‍රේමදාස එහෙම කෙනෙක් නෙමෙයි. ” අමාත්‍යවරයා ප්‍රකාශ කර සිටී.
කෙසේ වෙතත් වත්මන් තත්ත්වය පිළිබඳව සාකච්ඡා කිරීමට සජිත් ප්‍රේමදාස අමාත්‍යවරයා කතානායක කරු ජයසුරිය හමුවීමට නියමිත බව ද වාර්තා වේ.
තම කොන්දේසි වලට යටත්ව සජිත් ප්‍රේමදාස අමාත්‍යවරයා හට ජනපති අපේක්ෂකත්වය ලබා දීමට තමන් එකඟ බවට අගමැති රනිල් වික්‍රමසිංහ 24 අඟහරුවාදා පක්ෂයේ ජ්‍යෙෂ්ඨ සාමාජිකයින් සමඟ පැවති සාකච්ඡාවක දී ප්‍රකාශ කර තිබුනි.
විධායක ජනාධිපති ක්‍රමය අහෝසි කිරිම, පක්ෂ නායකත්වය සහ අග්‍රාමාත්‍ය ධුරය රනිල් වික්‍රමසිංහ සන්තකයේම තබා ගැනීමට ලබා දීම, මහ ලේකම්, උප නායක ආදී පක්ෂයේ තනතුරු දරන පුද්ගලයින් වෙනස් නොකිරීම, එම කොන්දේසි වලට අයත් වේ.
Facebook Comments
