මීතොටමුල්ල ඛේදවාචකය සම්බන්ධව එකිනෙකාට චෝදනා කිරීම පසෙකලා රජයක් වශයෙන් එහි සම්පූර්ණ වගකීම භාරගෙන අවශ්‍ය ඉදිරි පියවර සහ සහන සැලසීමට කටයුතු කරන බව ජනාධිපතිවරයා සහ අගමැතිවරයා පවසයි.
ඒ අනුව මෙම සිද්ධියෙන් සම්පූර්ණයෙන් විනාශ වූ නිවාස අනූඅටක පදිංචිකරුවන් වෙනුවෙන් කඩිනමින් නිවාස ලබාදීමට ජනාධිපතිතුමා සහ අගමැතිතුමා අදාල නිලධාරීන්ට උපදෙස් ලබා දෙනු ලැබුවේ සිදු වූ ව්‍යසනය සම්බන්ධව විශේෂ සාකච්ඡාවක් ආපදා කළමනාකරණ අමාත්‍යාංශ ශ‍්‍රවණාගාරයේදී අද (19) පැවති අවස්ථාවේදී බව රජය පවසයි.
නැවත පදිංචි කරන පවුලක් වෙනුවෙන් ලබාදෙන නිවාසයට අමතරව නිවසට අවශ්‍ය කරන ගෘහ උපකරණ ලබා ගැනීම සඳහා රුපියල් ලක්ෂ දෙක හමාරක මුදලක් ලබාදීමට ද මෙහිදි තීරණය කර ඇත.
නාය යෑමෙන් සිදු වූ හානි තක්සේරු කිරීම මේ සතිය තුළ අවසන් කර තක්සේරු වාර්තාවක් ලබාදෙන ලෙස තක්සේරු දෙපාර්තමේන්තුව ඇතුඵ අදාල ආයතන වෙත උපදෙස් දී ඇති අතර එම වාර්තාව ලබාදීමෙන් අනතුරුව සියඵම වන්දි වෙනුවෙන් ගෙවිය යුතු මුදල් කඩිනමින් ලබා දීමට තීරණය කර ඇති බවයි රජය පෙන්වා දෙන්නේ.
ජනතාවට චෝදනා
මෙම සිද්ධියට දින හතරකට ප්රථම දහම්පුර ග‍්‍රාම නිලධාරී විසින් අනතුරුදායක තත්ත්වය පිළිබඳව කොළොන්නාව ප‍්‍රාදේශීය ලේකම්තුමා වෙත වාර්තා කර තිබු අතර ප‍්‍රාදේශීය ලේකම්තුමා විසින් කොළඹ දිස්ත‍්‍රික් ලේකම්තුමාගේ උපදෙස් අනුව අදාල නිවැසියන් වෙත නිවාස වලින් ඉවත් වන ලෙසට දැනුම් දීමක් කර තිබුණද බොහෝ පිරිස් ඉවත් වීම ප‍්‍රතික්ෂේප කළ බව මෙහිදී අනාවරණය වු බවයි රජය පවසන්නේ.
කෙසේ නමුත් මේ පිළිබඳව සිලෝන් ජර්නල්ස් වෙත අදහස් දක්වමින් මීතොටමුල්ල කුණු කන්දට එරෙහි ජනතා ව්‍යාපරයේ නිතීඥ නුවන් බෝපගේ කියා සිටියේ එසේ කිසිඳු දැනුවත් කිරිමක් සිදු නොවු බව මෙන්ම අදාළ දහම්පුර ග‍්‍රාම නිලධාරීවරයා සහ ඔහුගේ පවුලේ සියලු දෙනාම මෙම ඛේදවාචකයට ගොදුරු වී මිය ගිය බවයි.
මීට මාසයකට පමණ ප්රථම නිවාස කිහිපයක ඉරි තැලීම් හා බිත්ති වලට සිදු වු හානි වීම් පිළිබඳව කොළඔ මහ නගර සභාවට දැනුම් දුන් අවස්ථාවේ ඔවුන් පැමිණ පරික්ෂා කර එම නිවාස අලුත් වැඩියා කර ගැනීමට වන්දි ලබාදීමට පොරොන්දු වු බව කී නිතීඥ නුවන් බෝපගේ එහිදි නිවැසියන් හට එම නිවෙස් වලින් ඉවත් වන ලෙස දැනුම් නොදුන් බවද අවධාරණය කළේය.
Facebook Comments
