ග‍්‍රාමීය දිළිඳුභාවය වර්ධනය වීමට ප‍්‍රධාන හේතුව අඩු ආදායම්ලාභී පවුල්වල ජනතාව මත්ද්‍රව්‍ය භාවිතය සඳහා වැඩි වශයෙන් යොමු වීම බව ජනාධිපතිවරයා පවසයි.
එබැවින් මෙම සමාජ උවදුර මැඩලීම සඳහා සුවිශේෂි වැඩසටහනක් අවශ්‍ය වන අතර සියලු අංශවල දායකත්වයෙන් රජය එම කටයුත්ත සඳහා මේවන විට උරදී සිටින බව “ගම හදා ගමු” තේමාව යටතේ ග‍්‍රාමීය මත්ද්‍රව්‍ය නිවාරණ වැඩසටහනේ සමාරම්භක අවස්ථාවට 23 සිකුරාදා එක්වෙමින් ජනාධිපති මෛත්‍රීපාල සිරිසේන මේ බව කියා සිටියේය.
සාමකාමී ශ‍්‍රී ලාංකීය සමාජයක් ස්ථාපිත කිරීම උදෙසා ග‍්‍රාමීය ප‍්‍රජාවගේ දායකත්වය ලබාගැනීමේ අරමුණින් “මතින් නිදහස් රටක්” ජාතික වැඩපිළිවෙළ යටතේ ක්‍රියාත්මක “ගම හදා ගමු” ග‍්‍රාමීය මත්ද්‍රව්‍ය නිවාරණ වැඩසටහන යටතේ ලංකාවේ සියලුම ගම්මානවල ප‍්‍රජා පොලිස් කමිටු මූලික කරගෙන මත්ද්‍රව්‍ය වැටලීම්, පුනරුත්ථාපන හා නිවාරණ කටයුතු මේ වන විටත් ආරම්භ කොට ඇති බවයි ජනාධිපති මාධ්‍ය ඒකකය පවසන්නේ.
ගම තුළ නීති විරෝධි මත්ද්‍රව්‍ය විකිණීම හා නිෂ්පාදනය අවම කිරීම සඳහා තිරසර ක‍්‍රමවේදයක් සැකසීම සහ ගම්වාසින්ගේ සාමුහිකත්වයෙන් මෙම ජාවාරම්කරුවන්ට බලපෑමක් එල්ල කිරීම, එවැනි කර්මාන්තවල නියැලී සිටින පුද්ගලයන් වෙනත් රැකියා සඳහා යොමු කිරීම හා අධීක්ෂණය කිරීම, ග‍්‍රාමීයව සිටින මත්ද්‍රව්‍යවලට ඇබ්බැහිවූවන් පුනරුත්ථාපනය කිරීම සඳහා අවශ්‍ය මගපෙන්වීම හා සහය ලබාදීම, ග‍්‍රාමීය මට්ටමින් මත්ද්‍රව්‍ය නිවාරණ කටයුතු සිදුකිරීම, ගමේ තරුණ පිරිස හා පාසල් දරුවන් මූලික කරගනිමින් මත්ද්‍රව්‍ය භාවිතයේ ආදීනව පිළිබඳව සමාජය දැනුවත් කිරීම ඇතුළු වැඩසටහන් රැසක් මේ යටතේ ක්‍රියාත්මක කර තිබේ.
යහපත් සමාජයක් සහ සංවර්ධිත රටක් මෙන්ම නිරෝගිමත් ජනතාවක් ගොඩනැගීමේදී පවතින ප‍්‍රධාන අභියෝගයක් වන මත්ද්‍රව්‍ය, නිවාරණය, මර්දනය සහ පාලනය වෙනුවෙන් රජය පසුගිය වසර තුන තුළ ක්‍රියාත්මක කළ වැඩසටහන් ජාතික වශයෙන් ප‍්‍රතිඵල රැසක් අත්කරදී තිබෙන බව ජනපති මෙහිදි සඳහන් කළේය.
විශේෂයෙන් දුම්වැටි භාවිතය පසුගිය වසර කිහිපය තුළ සැලකිය යුතු මට්ටමින් පහත වැටී ඇති බව කී ජනපති එය රටේ ජනතාව සෞඛ්‍ය ක්ෂේත‍්‍රය තුළ ලැබූ සුවිශේෂි ජයග‍්‍රහණයක් බව ද කියා සිටියේය.
ඉදිරියට ද මෙම වැඩසටහන සාර්ථක කර ගැනීමට රටට ආදරය කරන සියලු ජනතාව එකාවන්ව පෙළගැසෙනු ඇති බවට ද ජනාධිපති මෛත්‍රීපාල සිරිසේන විශ්වාසය පළ කළේය.
Facebook Comments
