යුක්තිය ඉටු කොට සංහිඳියාව ඇති කිරීම වෙනුවෙන් යුද්ධයෙන් පීඩාවට පත් ශ්‍රී ලාංකිකයන් ලබාදුන් අදහස් හා යෝජනා රජයට භාරදෙමින් එම වාර්තාව සකස් කළ කාර්ය සාධක බලකායේ නායිකාව රට බේද භින්න වීමේ අවදානමක් ගැන අනතුරු අඟවා සිටී.
දිවයින පුරා දහස් සංඛ්‍යාත ජනකායක මෙන්ම රට තුල සහ විදේශ වලත් සංවිධානවල දායකත්වයෙන් සම්පාදනය කෙරුනු පන්සියයකට අධික පිටු ගණනකින් සමන්විත සංහිඳියා යාන්ත්රණ උදෙසා ප්රවිචාරණ කාර්ය සාධන බලකායේ අවසන් වාර්තාව භාරදෙමින් සභාපතිනි මනෝරි මුත්තෙට්ටුවේගම පවසා ඇත්තේ “උන් සහ අපි” යනුවෙන් බේදයක් රටේ පවතින බවයි.
රජය වෙනුවෙන් හිටපු ජනාධිපතිනි චන්ද්‍රිකා බණ්ඩාරනායක කුමාරතුංග අවසාන වාර්තාව ජනවාරි තුන් වැනිදා සවස හතට ජනාධිපති මන්දිරයේදී භාර ගත් බවයි එම අවස්ථාවට සහභාගි වූ පුනරුත්ථාපනය හා නැවත පදිංචි කිරීම භාර අමාත්‍ය ඩී එම් ස්වාමිනාදන් ගගන හා කියා සිටියේ.
විවිධත්වයෙන් පොහොසත්, විවිධ ජාතීන්ගෙන් සමන්විත මහා පවුලක් ලෙසින් ශ්‍රී ලංකාව හැඳින්වූ කාර්ය සාධක බලකායේ ප්‍රධානී අධිනීතිඥ මනෝරි මුත්තෙට්ටුවෙගම සභාව අමතමින් අනතුරු අඟවා ඇත්තේ “රට භේදකාරී ආකෘතියකට බිලිවීමේ අවදානමක්” ඇති බවයි.
අලුත් රාජ්‍ය ව්‍යුහයක්
රට මුහුණපා සිටින අවදානම වලක්වා ගැනීම සඳහා ඇය යෝජනා කළේ රාජ්‍යයේ ප්‍රතිසංස්කරණයකි.
“ඒක, දීර්ඝ සිවිල් යුද්ධයකට හේතු වුනු වගේම, යුද්ධයේ ප්‍රතිවිපාකයකුත් වූ අනිවාර්ය අංගයක්. අපි එක පත බෙදාගෙන කන්න තීරණය කරනවද නැද්ද කියන එක මෙහිදී වැදගත් නැහැ. වැදගත් වන්නේ සම්පත් සහ අවස්ථා බෙදා හැරීමේදී, යුක්තිය හා සාධාරණත්වය උඩ කටයුතු කරමින් සියල්ලන්ගේම අයිතිවාසිකම් ආරක්ෂා කෙරෙන සමාජ සහ රාජ්‍ය ව්‍යුහයන් ගොඩනගා ගැනීමයි,” යනුවෙන් අධිනීතිඥ මනෝරි මුත්තෙට්ටුවේගම කියා සිටියාය.
විදේශ ඇමැති මංගල සමරවීර සහ විපක්ෂ නායක ආර් සම්බන්ධන් ද සහභාගි වූ වාර්තාව භාරදෙන අවස්ථාවට ජනාධිපතිවරයා හෝ අගමැතිවරයා සහභාගි නොවීම කැපී පෙනුනි.
කෙසේ වෙතත්, සංහිඳියාවට අදාළ සභාවකට නොපැමිණි ජනපති අගමැති දෙපලම ඇමරිකානු ඩොලර් කෝටි ගණනක ව්‍යාපෘතියකට මුල පුරමින් සිටිනු දක්නට ලැබිනි.
ජනාධිපති මෛත්‍රීපාල සිරිසේන සහ අග්‍රාමාත්‍ය රනිල් වික්‍රමසිංහ සහභාගි වෙමින් සිටියේ ජර්මන් රජයේ ඇමරිකානු ඩොලර් මිලියන 26.5 ක ආයෝජනයෙන් කුලියාපිටිය, ලබුයාය, මහනුගලන්දවත්ත ප්‍රදේශයේ ඉදිකෙරන වොක්ස්වැගන් මෝටර් රථ කර්මාන්ත ශාලාව සඳහා මුල් ගල් තැබීමේ උත්සවයකටය.
වාර්තාව කියවන්න
මේ වනවිට ඉංග්‍රීසියෙන් නිමවා ඇති සමස්ත වාර්තාවත්, සිංහලට සහ දෙමළට පරිවර්තනය කර ඇති විධායක සාරාංශය හා නිර්දේශත් 2016 ජනවාරි 4 දා සිට http://www.scrm.gov.lk වෙබ් අඩවියේ පල කෙරෙන බව ප්රවිචාරණ කාර්ය සාධක බලකාය දැනුම් දී තිබේ.
වාර්තාව භාර ගත් දින සිට සතියක් ‘ජාතික ඒකාබද්ධතා හා ප්‍රතිසන්ධාන සතිය’ වශයෙන් ප්‍රකාශයට පත්කරන බව රජය නිවේදනය කරඇත.
ජනතාව අතර සමඟිය, සාමය, දයාව සහ සහෝදරත්වය වැඩිදියුණු කිරීම එහි අරමුණ බව රජය කියා සිටී.
අධිනීතිඥ මනෝරි මුත්තෙට්ටුවගම ගේ ප්‍රධානත්වයෙන් පිහිටුවා ඇති සංහිඳියා යාන්ත්රණ උදෙසා ප්රවිචාරණ කාර්ය සාධක බලකාය, ආචාර්ය පාක්‍යසෝති සරවනමුත්තු, ගාමිණි වියන්ගොඩ, කේ ඩබ් ජනරංජන, මහාචාර්ය දයා සෝමසුන්දරම්, විශාකා ධර්මදාස, ශාන්තා අභිමානසිංහම්, මහාචාර්ය චිත්‍රලේඛා මෞනගුරු, ආචාර්ය ෆර්සානා හනිෆා, මහාචාර්ය ගමීලා සමරසිංහ සහ මිරාක් රහීම් ගෙන් සමන්විත වෙයි.
(Radiogagana)
Facebook Comments
