බලහත්කාර ආදාහනය අත්හිටුවීම වෙනුවෙන් ශ්‍රී ලංකාවේදී මැදිහත්වීමක් කරන ලෙසත් ජිනීවාහිදී ආණ්ඩුවට සහාය දී දෙමළ ජනතාවට හතුරු නොවන ලෙසත් මෙරට මුස්ලිම් සංවිධානයක් ඉල්ලා සිටියත් ඒ සම්බන්ධයෙන් කිසිදු සඳහනක් නොකර පකිස්තාන අගමැතිවරයා රටින් පිටව ගොස් තිබේ.
අග්‍රාමාත්‍ය ඉම්රාන් ඛාන් දෙදින නිල සංචාරයක් සදහා දිවයිනට පැමිණ සිටියදී මුස්ලිම් වාමාංශික පෙරමුණ ඒ බව අවධාරණය කර ඇත්තේ මුස්ලිම් ජනතාවගේ භූමදාන අයිතිය ලබා දීම වෙනුවෙන් මැදිහත්වන ලෙස පකිස්ථාන අගමැතිවරයා ගෙන් ඉල්ලන සන්දේශයක් ශ්‍රී ලංකාවේ පාකිස්ථාන මහ කොමසාරිස් කාර්යාලය වෙත බාර දෙමිනි.
අගමැති ඉම්රාන් ඛාන්ගේ ශ්‍රී ලංකා සංචාරය පිළිබදව මෙරට මුස්ලිම් ප්‍රජාව විශේෂයෙන් සතුටට පත්ව සිටින බව දැනුම් දෙන එම සංදේශය බලාපොරොත්තු පළ කර ඇත්තේ කොරෝනාබාධිතව මිය යන මෙරට ඉස්ලාම් භක්තිකයන්ගේ සිරුරු භුමදානය කිරීමට ඉඩ සලසා ගැනීම වෙනුවෙන් ඉහලම මට්ටමින් ලක් රජය සමග සාකච්ඡා කරනු ඇති බවයි.
“බලහත්කාරයෙන් අප පිට පටවා ඇති අපේ ජනායා ආදාහනය කිරීම වෙනුවට භූමදානය කිරීමේ සස්කෘතික වැදගත්කම මුස්ලිම් බහුතරයක් සිටින රටක නායකයා වශයෙන් ඔබ දැනුවත්ව සිටින බව අපේ දැඩි විශ්වාසයයි,” යනුවෙන් මුස්ලිම් වාමාංශික පෙරමුනේ ලේකම් එම්.ආර්.එම් ෆයිසාල් පෙබරවාරි 24 බදාදා පෙරවරුවේ බාර දුන් සංදේශයේ සඳහන් වන බව අගනගරයේ වාර්තාකරුවෝ පවසති.
එක්සත් ජාතීන්ගේ මානව හිමිකම් කවුන්සිලයේදී ශ්‍රී ලංකාව සම්බන්ධයෙන් ඉදිරිපත් වන යෝජනාවට සහයෝගය පළ කිරීම “ශ්‍රී ලංකාවේ මිතුරෙකුගේ ක්‍රියාවක් නොවන” බව පකිස්ථාන අගමැතිවරයාට පෙන්වා දෙන සංදේශය එය තමන්ට එරෙහිව සිදුකරන ලද දරුණු අපරාධ සම්බන්ධයෙන් රජය වගඋත්තරකාරිත්වය ඉල්ලා කෙරෙන දෙමළ ප්‍රජාවගේ නීත්‍යානුකූල අරගලයට හානි කිරීමක් බව පෙන්වා දී තිබේ.
“මුස්ලිම්වරුන් මෙන්ම දෙමළ ජනතාවද දිගටම පැවති ආණ්ඩු යටතේ බොහෝ අභියෝග වලට මුහුණ දී සිටී. එහිදී වින්දිතයන් මෙන්ම සත්‍යය හා යුක්තිය ඉල්ලා බලකරන බලහත්කාරයෙන් අතුරුදහන් කරනු ලැබුවන්ගේ ඥාතීන්ද විශේෂිතය. මුස්ලිම් සහ දෙමළ දෙපිරිසටම දේශීය වශයෙන් යුක්තිය ඉටු නොවීම නිසා ශ්‍රී ලංකාවේ සංහිඳියාව ඇතිවීම වැලකී ගොස්, ස්ථාවර, සුරක්ෂිත හා සෞභාග්‍යමත දේශයක් කරා ගමන් කිරීම නැවතී තිබේ.”
සිය සංචාරය නිමා කරමින් පකිස්ථාන අගමැතිවරයා 24 බදාදා පස්වරුවේ යළි සිය රට බලා පිටත්ව ගිය අතර කොරෝනාබාධිතව මිය යන ඉස්ලාම් භක්තිකයන්ගේ මළ සිරුරු භුමදානය කිරීම සම්බන්ධයෙන් රජය සමග සාකච්ඡා කළ බවක් දෙරටම මේ වන තෙක් ප්‍රකාශයට පත් කර නොමැත.
පකිස්ථාන අග්‍රාමාත්‍ය ඉම්රාන් ඛාන් ආපිට යාමට පෙර මුස්ලිම් ප්‍රජාව නියෝජනය කරන මන්ත්‍රීවරුන් කිහිප දෙනෙකු හමුවී සාකච්ඡා තිබුනි. එහිදී සාකච්ඡාවට භාජනය වු කරුණු මෙතෙක් මාධ්‍යයට අනාවරණය වී නැත.
ශ්‍රී ලංකාවේ පිහිටි පාකිස්ථාන මහ කොමසාරිස් කාර්යාලය වෙත සිය සංදේශය බාර දීමෙන් පසු මුස්ලිම් වාමාංශික පෙරමුනේ ලේකම් එම්.ආර්.එම් ෆයිසාල් සදහන් කර තිබුනේ මුස්ලිම් සුළු ජාතිකයන්ට මේ රටේ නිදහසේ ජීවත් වීමට නොහැකි තත්වයක් උද්ගත වී ඇති බවයි.
වසරකට අධික කාලයක් තිස්සේ ඉස්ලාම් භක්තිකයන්ගේ භුමදාන අයිතිය මේ රජය විසින් අහිමි කර තිබෙන බව ඔහු වැඩි දුරටත් අවධාරණය කර තිබුනි.
සංදේශය භාර දීමේ අවස්ථාවට එක්ව සිටි වෘත්තිය සමිති නායක ප්‍රියන්ත වික්‍රමසිංහ ඉම්රාන් ඛාන් අගමැතිවරයාගෙන් ඉල්ලා සිටියේ පකිස්තානයේ මළ සිරුරු භුමදානය කිරීමට ඉඩ දෙන නායකයකු ලෙස ලාංකික මුස්ලිම් ජනතාවට සාධාරණයක් ඉටු කරන්නැයි මෙරට ජනපති, අගමැති දෙපළගෙන් ඉල්ලා සිටින ලෙසයි.
වත්මන් රජය තරම් වෙනත් කිසිදු රජයක් මෙරට සිංහල, දෙමළ හා මුස්ලිම් ජනතාව රවටා නොමැති බවටත් වෘත්තිය සමිති නායකයා චෝදනා කළේය.
ආණ්ඩුවට සහයෝගය ලබා දුන් හාමුදුරුවන්ට ගසක් බේරා ගැනීම වෙනුවෙන් පාරට බැස සිවුරු එතීමට සිදුවන තත්වයකට අද රට පත්ව ඇති බව ඔහු තව දුරටත් සදහන් කළේය.
Facebook Comments
