බලහත්කාරයෙන් අතුරුදහන් කරන ලද සිය සමීපතමයන් සොයා ගැනීම වෙනුවෙන් වසර ගණනාවක් තිස්සේ අරගලයක යෙදී සිටින උතුරු නැගෙනහිර සංවිධානවලවලට නායකත්වය දෙන අම්මාවරුන් අගනගරයට ගෙන්වා හිරිහැර කරන බවට ආරක්ෂක අංශ වෙත චෝදනා එල්ල වී තිබේ.
මානව හිමිකම් පිළිබඳ එක්සත් ජාතීන්ගේ මහකොමසාරිස් මිචෙල් බැෂලේ වෙත යවන ලිපියකින් උතුරු හා නැගෙනහිර බලහත්කාරයෙන් අතුරුදහන් කරන ලද්දවුන්ගේ ඥාතීන්ගේ සංගමය පෙන්වා දී ඇත්තේ කොළඹ සිට ක්‍රියාත්මක වන ත්‍රස්ත විරෝධී ඒකක කිසිදු පැහැදිලි හේතු දැක්වීමකින් තොරව තමන් පරීක්ෂණ සදහා යැයි කියමින් කොළඹට කැඳවන බවයි.
“කිසිදු දෘෂ්‍යමාන හේතුවක් නොදක්වා ම, කොළඹ සිට ක්‍රියාත්මක වන ත්‍රස්ත විරෝධී බලකායන් විසින් පරීක්ෂණ සඳහා යයි කියමින් අප කොළඹට කැඳවනු ලබයි.”
අතුරුදහන් කරන ලද තම සමීපතමයන් සොයාගැනීමේ අරගලයට එමගින් අයුතු පීඩා මෙන්ම මානසික ආතතීන්ට ලක් කිරීමක් ද සිදු වන බව සංගමයේ සභාපතිනි යෝගරාජා කනගරංජනී හා ලේකම් ලීලාදේවී ආනන්දනඩරාජා විසින් පෙබරවාරි 20 සෙනසුරාදා මිචෙල් බැෂලේ වෙත ලියා ඇති ලිපියේ සඳහන් ය.
උතුරින් ලැබෙන වාර්තා වල දැක්වෙන පරිදි ත්‍රස්ත මර්දන හා විමර්ශන කොට්ඨාශය (CTID) විසින් අතුරුදහන් කිරීම් වලට විරෝධී අරගල වල නායිකාවන් කැඳවා ඔවුන්ගෙන් ප්‍රශ්න කිරීම් උත්සන්න වී තිබේ.
බලහත්කාරයෙන් අතුරුදහන්කරවීමට ලක්ව සිටින්නන්ට කඩිනමින් යුක්තිය සලසා දෙන ලෙස ඉල්ලමින් යවන ලද සංදේශය මගින් මව්වරුන් දෙපළ අවධාරණය කර ඇත්තේ “අපගේ නෑ සබැඳියන් සොයා ගැනීමේ අරගලය ලංකාණ්ඩුවේ හමුදා විසින් අයුතු පීඩාවන්ට සහ මානසික අසහනයන්ට ගොදුරු වන තත්ත්වයට පත්කර තිබෙන” බවයි.
නොනැවතී මිලිටරීකරනය වෙමින් පවතින වත්මන් ශ්‍රී ලාංකීය පාලන තන්ත්‍රය, සිවිල් පරිපාලන තනතුරු සදහා ජන සංහාර හා යුද අපරාධවලට සම්බන්ධ හමුදා නිලධාරීන්ගෙන් පුරවමින් තිබෙන බව පෙන්වා දෙන එම සංදේශය වැඩි දුරටත් අවධාරණය කරන්නේ එය අඛන්ඩව දෙමළ ජනතාවගේ ජීවිතවලට තර්ජනය කරන අතර ප්‍රජාතන්ත්‍රවාදී අවකාශය යටපත් කරමින් තිබෙන බවයි.
“කොවිඩ් -19 හේතුකොටගෙන ඔවුන් අප එකට එකතු වීම වළක්වයි. එම කොන්දේසි උල්ලංඝනය වුවහොත් අන් සැමගෙන් වෙන්කොට හුදකලාව තැබීමේ තර්ජනය ඔවුන් ඉදිරිපත් කරයි. ස්වයංසිද්ධව ක්‍රියාත්මක වන විරෝධතාවලට සහභාගී වීම තහනම් කරමින් අධිකරණ නියෝග ලබා ගන්නා අතර අනතුරුව සහභාගී වන්නන්ට සිතාසි නිකුත් කරනු ලැබේ.”
සරත් වීරසේකර ගැන බලන්න
හිටපු නාවික හමුදා ප්‍රධානියකු හා වත්මන් මහජන ආරක්ෂක ඇමතිවරයා ද වන රියර් අද්මිරාල් ආචාර්ය සරත් වීරසේකර ප්‍රසිද්ධ ජනමාධ්‍ය මගින් දෙමළ විරෝධී වර්ගවාදය වගුරවන අතරතුර ප්‍රජාතන්ත්‍රීය අරගලයන්හි නියුතු දෙමළ ජනයා ඉලක්ක කර ඍජු තර්ජන එල්ල කරන අකාරයත් සංගමයේ සභාපතිනි යෝගරාජා කනගරංජනී හා ලේකම් ලීලාදේවී ආනන්දනඩරාජා මානව හිමිකම් පිළිබඳ එක්සත් ජාතීන්ගේ මහකොමසාරිස්වරියගේ අවධානයට ලක් කර තිබේ.
මෙවැනි පසුබිමක් යටතේ ශ්‍රී ලංකා පොලිසිය සහ ආණ්ඩුවේ අනෙකුත් සන්නද්ධ බලකායන් එම ඇමතිවරයාගේ මග පෙන්වීම් අනුව හැසිරෙන්නේ කුමනාකාරයකටද යන්න පිළිබඳව ජාත්‍යන්තර ප්‍රජාව දැඩි අවධානයක් යොමු කළ යුතු බව එම සංදේශය මගින් වැඩි දුරටත් ඉල්ලා තිබේ.
යුද්ධය අවසන් වීමෙන් පසුවත් බලහත්කරයෙන් අතුරුදහන් කිරීම් සිදු වු ආකාරයත් මහකොමසාරිස් මිචෙල් බැෂලේගේ අවධානයට ලක් කර තිබේ.
“අපගේ නෑ හිතමිත්‍රාදීන්, තරුණයන්, කාන්තාවන්, දූ දරුවන්, ස්වාමි පුරුෂයන් සහ පූජ්‍යපක්ෂයේ අය ආණ්ඩුවේ හමුදා මගින් අත්අඩංගුවට ගැනුනේ යුද්ධය අවසන් වීමට පෙර කාලයේ දී පමණක් නොවේ. යුද්ධය අවසානයකට පැමිනි වකවානුවේ පවා, මාර්ග බාධක හරහා යෑමට පැමිණි අය අතරිනුත්, මුහුදු ගමන්වල දී හා නිවෙස්වල සිටියදීත් ප්‍රශ්න කිරිම සදහා පුද්ගලයන් රැගෙන යන ලදී. අපි එදා මෙදා තුර මේ ඥාතිහිතමිත්‍රාදීන් දැක ගැනීමේ උවමනාවෙන් ඔවුන් සිටින තැනක් සතර දිග්භාගය පුරා සොයන්නෙමු.”
බලහත්කාරයෙන් අතුරුදහන් කර සිටින සිය සමීපතමයන් සොයා ගැනීම සදහා ජාත්‍යන්තර වශයෙන් යුක්තිය අපේක්ෂාවෙන් දියත් කර ඇති අඛණ්ඩ අරගලයට මේ වන විට පස් වසරක් පිරි තිබෙන බව සිහිපත් කරන එම සංදේශය එහිදී තව දුරටත් අවධාරණය කර ඇත්තේ දින 1462 ක් තිස්සේ සිදු කරන අරගලයේදී සිය දරුවන්ට අත්වු ඉරණම නොදැනම දෙමාපියන් 83 දෙනකුගේ දිවි මග නිමා කර ඇති බවයි.
“අපට යුක්තිය ලැබෙන තුරු හෝ අපගේත් දිවිමග හමාර වන තුරු මෙම අරගලය දිගටම පවතිනු ඇත.”
වවුනියාවේදී අතුරුදහන් වූ තම පුතනුවන් සොයමින් දිවියෙන් වසර 21 ක් කැපකළ දෙමළ මාතාවක් පෙබරවාරි 22 සදුදා දින මෙලොව හැර ගොස් තිබුනි.
මෙලෙස මියගොස් තිබුනේ වව්නියාවේ මාරවන්කුලම්හි පදිංචි 61 හැවිරිදි තමෝතාරම්පිල්ලෙයි පෙරින්පනායකී මාතාවයි.
2000 වසරේ සිට අතුරුදහන් ව සිටින තම පුතනුවන් වූ තාරුමකුලනාදන් සොයමින් සිටි ඇය කලක් රෝගාතුරව සිට තිබේ.
පෙරින්පනායකී මාතාව ගතවූ සිව් වසර පුරා අතුරුදහන්වූවන්ගේ ඥාතීන් සමඟ එක්ව වවුනියාවේ පැවැත්වූනු විරෝධතාවයන්ට සහභාගී වී ඇත.
වසර 12 ක් තිස්සේ අතුරුදහන්ව සිටින සිය පුතු සොයමින් සිටි මුලතිව් හි වාසය කළ තවත් මාතාවක් පෙබරවාරි 17 බ්‍රහස්පතින්දා මිය ගොස් තිබුනි.
එලෙස මියගොස් තිබුනේ කනගමනි සුන්දරලිංගම් මාතාවයි.
සංගමයේ සභාපතිනි යෝගරාජා කනගරංජනී හා ලේකම් ලීලාදේවී ආනන්දනඩරාජා විසින් යොමු කළ සංදේශය වැඩි දුරටත් පෙන්වා දෙන්නේ එම අවස්ථාවල දී තම දෙමව්පියන් සමඟ යුද හමුදාවට බාර වූ ළමුන්, බිළිඳුන් සහ ළදරුවන් 29 කට වැඩි පිරිසකගේ ඉරණමද සොයා ගැනීමට නොමැති බවයි.
දරුවන්ට කෝ?
“එසේ වීමට මෙම දරුවන් කළ අපරාධය කුමක් ද? මේ දරුවන් ගැන අවධානයට ලක් කිරීමට කිසිවකුත් නැති ද?” යි සංදේශය විමසා සිටී.
“දරුවන්ගේ ආරක්ෂාව හා සුභසාධනය සැලසීම සඳහා නිමවන ලද ‘ළමයින් සුරකිමු’, ‘ළමා අරමුදල’ සහ ‘යුනිසෙෆ්’ ආදී සංවිධාන මේ තතු නොදන්නේ ද? මේ බිලිදුන් ගැන සැලකිලිමත් වූ කිසිවෙකුත් සිටී ද? ලෝකයේම මානුෂිකත්වය මියපරලොව ගොස් ද?” යි විමසන සංදේශය තවදුරටත් ප්‍රශ්න කර සිටි.
ආණ්ඩුවේ බොරු
යුද්ධයේ අන්තිම අදියරේදී හමුදාවට භාර වීමෙන් පසු මේ දක්වා අතුරුදහන්ව සිටින පිරිස ද යුද්ධයේ දී ම මිය ගිය බවට ශ්‍රී ලංකාවේ විධායක ජනාධිපතිවරයා සහ සිංහල කැබිනට් අමාත්‍යවරු නැවත නැවතත් කියන ප්‍රකාශ පෙන්වා දෙන යෝගරාජා කනගරංජනී හා ලීලාදේවී ආනන්දනඩරාජා මාතාවන් දෙපළ ප්‍රශ්න කරන්නේ යුද්ධය අවසන් වීමෙන් පසු රජයේ හමුදාවන්ට භාර දී යටත් වූ පිරිස් යුද්ධයෙන් මරණයට පත් වන්නේ කෙසේද? යන්නයි.
“මොවුන් හමුදාවට බාර දීම සම්බන්ධයෙන් ඇසින් දුටු සාක්ෂිකරුවන් ලෙස අපි තවමත් ජීවත්ව සිටියදීත්, ශ්‍රී ලංකාණ්ඩුව මෙසේ දිගින් දිගටම බොරු කීමට හේතුව කුමක්ද? අපගේ ඥාති හිතමිත්‍රාදීන් සදහටම අපෙන් වෙන් කිරීමද?” සංදේශය මගින් වැඩි දුරටත් විමසා තිබේ.
අතුරුදහන්ව සිටින සිය ආදරණීයයන් සදහා යුක්තිය හැකි ඉක්මණින් ලබා ගැනීමට ඉඩ ප්‍රස්ථාව තිබිය යුතු බව සංගමයේ සභාපතිනි යෝගරාජා කනගරංජනී හා ලේකම් ලීලාදේවී ආනන්දනඩරාජා සිය සංදේශය මගින් ජාත්‍යන්තර ප්‍රජාවෙන් සහ එක්සත් ජාතීන්ගෙන් ඉල්ලා තිබේ.
“ඒ වෙනුවෙන් මැදහත්ව සිටින අප වෙත රාජ්‍ය විමර්ශකයන්ගෙන් එල්ල කෙරෙන තර්ජන නතර විය යුතු බව හා අපගේ ආරක්ෂාව සහතික විය යුතුය.” මානව හිමිකම් පිළිබඳ එක්සත් ජාතීන්ගේ මහකොමසාරිස් මිචෙල් බැෂලේ වෙත යොමු කළ සංදේශයේ වැඩි දුරටත් සඳහන්ය.
රජයේ අත් අඩංගුවේ අතුරුදහන් වූ තම නෑසියන් සොයාදීම වෙනුවෙන් කිසිදු පලදායී කටයුත්තක් නොකළ අතුරුදහන් වූ තැනැත්තන් පිලිබඳ කාර්යාලය (OMP) ප්‍රශංසාවට ලක් කිරීම් පිළිබඳව උතුරේ මව්වරු මීට ඉහතදී තම අප්‍රසාදය පල කර තිබුණි.
Facebook Comments
