වෘත්තීය සමිති සමග සමගියෙන් වැඩකරන ලෙස ජනාධිපතිවරයා විසින් රාජ්‍ය ආයතන ප්‍රධානීන්ට දැනුම් දී තිබේ.
එහි යම් අඩුවක් තිබේනම් ඉදිරි කාලයේ නිවැරදි කරන බවත් ජනාධිපති ගෝඨාභය රාජපක්ෂ පැවසු බවයි ජනාධිපති මාධ්‍ය අංශය පවසන්නේ.
ඔහු ඒ බව පවසා ඇත්තේ පෙබරවාරි 23 අගහරුවාදා පස්වරුවේ ජනාධිපති කාර්යාලයීය සභා ශාලාවේ පැවති ශ්‍රී ලංකා පොදුජන පෙරමුණට අනුබද්ධ වෘත්තීය සමිති සම්මේලනයේ නියෝජිත හමුව අමතමිනි.
ජනතාවට දුන් පොරොන්දු ඉටු කිරීමට රජයට උදව් වෙන ලෙස වෘත්තිය සමිති නියෝජිතයන්ගෙන් ඉල්ලා සිටි ජනාධිපතිවරයා සේවක කම්කරු ගැටළු විසඳා දීමටත් එහිදී පොරොන්දු වී තිබේ.
“රාජ්‍ය සේවයේ, අර්ධ රාජ්‍ය සේවයේ, සංස්ථාවල සහ මණ්ඩලවල දිගු කලක් තිස්සේ නොවිසඳී විශාල අවුලක් බවට පත්ව ඇති ගැටළු රැසක් තිබෙනවා. වැටුප් සහ උසස්වීම් විසමතා, බඳවා ගැනීමේ පරිපාටියේ අවුල් ඉන් කිහිපයක්. සේවකයන් වෙනුවෙන් මේ ගැටළු විසඳීමට රජය කැපවී සිටිනවා. ජනතාව වත්මන් ආණ්ඩුව බලයට පත් කළේ විශාල බලාපොරොත්තු ඇතිව. අප ජනතාවට දුන් පොරොන්දු එලෙසම ඉටු කිරීමට රජයට උදව් දෙන්න” ජනාධිපති ගෝඨාභය රාජපක්ෂ වෘත්තීය සමිති නියෝජිතයන් හමුවේ ඉල්ලා සිටි බව ජනාධිපති මාධ්‍ය අංශය නිවේදනය කර තිබේ.
වෘත්තීය සමිති සමග සාකච්ඡාවෙන් ප්‍රශ්න විසඳීමට හැම විටම සූදානම් බව ජනාධිපතිවරයා පැවසු සාකච්ඡාවට සහභාගී වී ඇත්තේ ශ්‍රී ලංකා පොදුජන පෙරමුණට අනුබද්ධ වෘත්තීය සමිති
සම්මේලනයට අයත් ශ්‍රී ලංකා පොදුජන අධ්‍යාපන සේවා සංගමය, ප්‍රගතිශීලි රාජ්‍ය සේවක සම්මේලනය, වාණිජ කර්මාන්ත හා සේවා ප්‍රගතිශීලි සේවක සංගමය, පළාත් පාලන ප්‍රගතිශීලි සේවක සංගමය, ශ්‍රී ලංකා පොදුජන ප්‍රවාහන සේවක සමිතිය, ශ්‍රී ලංකා පොදුජන වතු සේවක සංගමය සහ සමස්ත ලංකා සමෘද්ධි සංවර්ධන නිලධාරී සංගමය යන වෘත්තීය සමිතිවල නියෝජිතයන්ය.
වත්මන් රජය බලයට පත් කිරීමට පොදුජන පෙරමුණට අනුබද්ධ වෘත්තීය සමිති කළ දායකත්වය අගය කළ ජනාධිපතිතුමා ජනතා අපේක්ෂා ඉටු කිරීමටනම් රාජ්‍ය සේවය ශක්තිමත්, කාර්යක්ෂම සහ ඵලදායී බවට පත්කළයුතු බවත් එහිදී පවසා තිබේ.
වෘත්තීය සමිතිවලට සවන්දීමටත් සමිති සමග සහයෝගයෙන් වැඩ කිරීමටත් රජය හැමවිටම සූදානම් බව කී ජනාධිපතිවරයා කොවිඩ් අර්බුදය දැන් සමනය වෙමින් තිබෙන බැවින් ඉදිරි කාලයේ දී මාස තුනකට වරක් වෘත්තීය සමිති හමුවී සාකච්ඡා කිරීමට අදහස් කරන බවත් එහිදි පැවසු බව ජනාධිපති මාධ්‍ය අංශය පවසයි.
සෑම ආකාරයකම රාජ්‍ය ආයතන අරමුදල් සඳහා භාණ්ඩාගාරය මත යැපෙන තත්ත්වය නැති කොට කාර්යක්ෂම සහ ලාබදායී ආයතන බවට පත් කිරීමට උදව් වන්නැයි ජනාධිපතිතුමා සමිති නියෝජිතයන්ට අවධාරණය කර ඇත.
ශ්‍රී ලංකාවේ ප්‍රධාන ආදායම් මාර්ගයක්ව පැවති සංචාරක ව්‍යාපාරය මේ වන විට මුළුමනින්ම පාහේ බිඳ වැටී තිබේන බව පැවසු ජනාධිපති ගෝඨාභය රාජපක්ෂ වැඩි දුරටත් අවධාරණය කර ඇත්තේ ශ්‍රී ලංකාවට සංචාරකයන් පැමිණෙන රටවල් බොහොමයක් තවමත් වසා ඇති බැවින් සංචාරක ව්‍යාපාරය යථා තත්ත්වයට පත්වීමට තවත් කලක් ගතවිය හැකි බවයි.
ශක්තිමත් කර්මාන්ත පද්ධතියක් සමග ජනතා කේන්ද්‍රීය දේශීය ආර්ථිකයක් ගොඩනැගීමට දිගුකාලීන පියවර ගෙන ඇති බව සඳහන් කළ ජනාධිපතිවරයා ඇතැම් පිරිස් මේ යතාර්ථය විකෘති කරමින් සමාජ මාධ්‍ය ඔස්සේ වැරදි මත පතුරුවා හරින බවටත් චෝදනා කර තිබේ.
Facebook Comments
