විනිසුරන් සමඟ දුරකතන සංවාද පවත්වා උසාවියට බලපෑම් කිරීමේ චෝදනා ලබා බන්ධනාගාර ගතව සිටින එජාප මන්ත්‍රීවරයා නිදහස් වී ගොස් ප්‍රසිද්ධ ප්‍රකාශ කිරීමේ අවදානම නිසා අධිකරණය ඔහුට ඇප දීම ප්‍රතික්ෂේප කර තිබේ.
රිමාන්ඩ් බන්ධනාගාර ගතව සිටින මන්ත්‍රී රන්ජන් රාමනායක 29 බදාදා අධිකරණයට ඉදිරිපත් කළ අවස්ථාවේදී නීතිපතිවරයා වෙනුවෙන් පෙනී සිටි රජයේ ජ්‍යෙෂ්ඨ අධිනීතිඥ ජනක බණ්ඩාර කියා සිටියේ විමර්ශන තවදුරටත් පැවැත්වෙන බැවින් මන්ත්‍රීවරයා හට ඇප ලබා දීමෙන් අනතුරුව ඔහු සමාජ ඉදිරියේ විවිධ ප්‍රකාශ සිදු කළහොත් එය විමර්ශන වලට බාධා විය හැකි බවයි.
නඩුවේ සාක්ෂිකරුවන්ට වෙනත් පුද්ගලයින් මාර්ගයෙන් බලපෑම් කිරීමට ඉඩ ඇති බැවින් නඩු කටයුතු අවසන් වනතුරු රන්ජන් රාමනායක රක්ෂිත බන්ධනාගාරගත කරන ලෙසද රජයේ ජ්‍යෙෂ්ඨ අධිනීතිඥවරයා අධිකරණයෙන් ඉල්ලා සිටියේය.
රන්ජන් රාමනායක මන්ත්‍රීවරයා හට ඇප ලබා දුනහොත් ඔහු විමර්ශනවලට බාධාවක් නොකරන බව මන්ත්‍රීවරයා වෙනුවෙන් පෙනී සිටි ජනාධිපති නීතිඥ නෙවිල් අභයරත්න සඳහන් කළේය.
දැනටමත් ඔහුට විදෙස් ගමන් තහනමක් පනවා ඇති බැවින් ඕනෑම ඇප කොන්දේසියක් මත මන්ත්‍රීවරයා මුදා හරින ලෙසද නීතිඥවරයා අධිකරණයෙන් ඉල්ලා සිටියේය.
ඉදිරිපත්වු කරුණු සලකා බැලු නුගේගොඩ අතිරේක මහේස්ත්‍රාත් එච්.යු.කේ පැල්පොල රන්ජන් රාමනායක මන්ත්‍රීවරයාගේ ඇප ඉල්ලීම ප්‍රතික්ෂේප කරමින් ලබන මස 12 වැනි දා දක්වා රක්ෂිත බන්ධනාගාරගත කිරීමට නියෝග කරන ලදි.
සැකකාර මන්ත්‍රීවරයා සන්තකයේ තිබී සොයාගත් දුරකතන සංවාද ඇතුළත් හඬපට සම්බන්ධයෙන් සිදුකරන විමර්ශන සඳහා ඔහුගේ කටහඬ සාම්පල් ලබා ගැනීමට ලබන මස 07 වැනි දා රන්ජන් රාමනායක රජයේ රස පරීක්ෂකරයා හමුවට ඉදිරිපත් කරන ලෙස මහේස්ත්‍රාත්වරයා බන්ධනාගාර අධිකාරිවරයාට වැඩි දුරටත් නියෝග කර තිබේ.
Facebook Comments
