අතුරුදහන් කරවූවන් මරා දැමූ බව “ආණ්ඩුව පිළිගෙන තිබෙනවා” (VIDEO)

0

අතුරුදහන් දහස් ගණනක් මරා දැමු බවට පිළිගෙන තිබෙන ආණ්ඩුව එහි වගකීම බාර ගෙන දේශපාලන විසඳීමක් ලබා දීමට කටයුතු කළ යුතු බවට අතුරුදහන් කරවීමට එරෙහිව සටන් වඳින වාමාංශික නායකයෙක් අවධාරණය කර තිබේ.

ත්‍රස්තවාදය මර්දනය කිරීමේ ආණ්ඩුවේ පිළිවෙතට බිලි වු සෑම කෙනෙකුම මරා දමා හෝ මිය ගොස් ඇති බවට රජය පිළිගැනීම ජයක් බව කී නව සම සමාජ පක්ෂ නායකයා උතුරේ යුද සමයේ මෙන්ම දකුණේ ජවිපෙ කැරැල්ල පැවති සමයේදී ද එසේ ඝාතනය වුවන් සම්බන්ධයෙන් යුක්තිය ඉෂ්ට කොට වන්දි ලබා දිය යුතු බවට යෝජනා කරන්නේ.

එමෙන්ම යුද්ධයක් ඇතිවීමට බලපෑ හේතුවට පාදක වු ගැටලුවට දී ඇති දේශපාලන විසඳුමද ක්‍රියාත්මක කරමින් යළි මෙවන් විපතක් ඇති වීමට කටයුතු නොකළ යුතු බවට ආචාර්ය වික්‍රමබාහු කරුණාරත්න 30 බ්‍රහස්පතින්දා කොළඹ දී මාධ්‍ය හමුවක් පවත්වමින් කියා සිටියේය.

මහින්ද රාජපක්ෂ පාලනය යටතේ දියත් කෙරුණු යුද්ධය පැවති සමයේ අතුරුදහන් වූ පුද්ගලයන් මරණයට පත්ව ඇති බව ජනාධිපති ගෝඨාභය රාජපක්ෂ විසින් එක්සත් ජාතීන්ගේ නියෝජිතවරියක වන හැනා සිංගර් සමඟ පසුගියදා ප්‍රකාශ කර තිබුනි.

අතුරුදහන් වු පුද්ගලයින් එල්ටීටීඊය විසින් මරා දමා ඇතැයි ඔවුන්ගේ පවුල් වල උදවිය පවා දන්නා බව හා එම පුද්ගලයන් වෙනුවෙන් මරණ සහතික නිකුත් කිරීම සඳහා පියවර ගනු ඇති බවට ජනාධිපතිවරයා පැවසු බව ජනාධිපති කාර්යාලය නිවේදනයක් නිකුත් කරමින් සඳහන් කළේය.

එල්ටීටීඊය යුදමය වශයෙන් පරාජය කළ පසු එම සංවිධානය විසින් හමුදාවට බාර වුවන් ඝාතනය කරන ලද්දේ කෙසේදැයි ජනාධිපතිවරයා විසින් පැහැදිලි කර නොතිබීම දෙමළ ජාතික සන්ධානයේත්, මානව හිමිකම් සංවිධාන වලත් දැඩි ප්‍රශ්න කිරීමට ලක්ව තිබුනි.

එම විරෝධතා මතුවීමෙන් අනතුරුව ජනාධිපති මාධ්‍ය ඒකකය “පැහැදිලි කිරීමක්” නිකුත් කරමින් කියා සිටියේ “අතුරුදහන්ව සිටින 20,000 කට ආසන්න පිරිසක් මිය ගොස් ඇතැයි ජනාධිපතිවරයා කිසිදු අවස්ථාවක පිළිනොගත්” බවයි.

ජාතික ගැටලුව විසඳීම සඳහා ගෙන එන ලද 13 වන ව්‍යවස්ථා සංශෝධනය හා 19 වන ව්‍යවස්ථා සංශෝධන ක්‍රියාත්මක කිරීම හරහා යුද්ධය පිළිබඳව ප්‍රශ්නය අවසානයකට ගෙන යා හැකි බවයි ආචාර්ය වික්‍රමබාහු වැඩි දුරටත් විශ්වාසය පළ කරන්නේ.

මානව හිමිකම් දත්ත විශ්ලේෂක සමූහය (HRDAG) හා ශ්‍රී ලංකාවේ සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) පසුගිය වසරේ දී එක්ව කරන ලද සංගණයකින් හෙළිව ඇත්තේ ශ්‍රී ලංකාවේ යුද්ධයේ අන්තිම පැය 48 තුල පමණක් අතුරුදහන් වූ සංඛ්‍යාව 500 ඉක්මවන බවයි.

හමුදාවට භාරවූ දරුවන් සහ කාන්තාවන් ඇතුළු දෙමළ ජනතාව යුද්ධයේ අවසාන කාල සීමාවේ උතුරු නැගෙනහිරින් අතුරුදහන් වූ වැඩිම පිරිස බව පසුගිය රජය විසින් පාර්ලිමේන්තු පනතක් යටතේ පිහිටුවනු ලැබූ අතුරුදහන් වූ තැනැත්තන් පිළිබඳ කාර්යාලය (OMP) තක්සේරු කර තිබේ.

ඒ සම්බන්ධයෙන් ස්වාධීන විමර්ශනයක් පවත්වන ලෙස ඉල්ලා දින දහසකට වැඩි කාලයක් උද්ඝෝෂණයේ යෙදී සිටින ඥාතීන් ජනාධිපතිවරයාගේ ප්‍රකාශය හෙලා දකිමින් වව්නියාවේදී විරෝධතාවක් පවත්වා තිබේ.

ශ්‍රී ලංකාවේ අතුරුදහන් කිරීම් සහ යුද අපරාධ ඇතුළු මානව හිමිකම් උල්ලංඝන සම්බන්ධයෙන් ජිනීවා මානව හිමිකම් මණ්ඩලයේ ආණ්ඩුවේද සම අනුග්‍රාහකත්වයෙන් අවුරුදු හතරකට ඉහතදී යෝජනාවක් සම්මත කරගත් එක්සත් ජාතීන්ගේ සංවිධානය කොළඹ සිටින සිය නියෝජිතවරිය සමග ජනාධිපතිවරයා අතුරුදහන් වුවන් සම්බන්ධයෙන් කරන ලද ප්‍රකාශය ගැන මේ තාක් කිසිදු ප්‍රකාශයක් කර නැත.

Facebook Comments