අතුරුදහන් වුවන් හට මරණ සහතික ලබා දීමට පෙර ඔවුන්ට සිදුවු දේ පිළිබඳව සත්‍ය පවුලේ ඥාතීන් වෙත දැනුම් දිය යුතු බව ජාත්‍යන්තර මානව හිමිකම් සංවිධානයක් අවධාරණය කර තිබේ.
ජාත්‍යන්තර හා දේශීය නීතිය අනුව විමර්ශණය කර අතුරුදහන් වුවන්ට සිදුවු දේ හෙලි කළ යුතු බවටයි ක්ෂමා සංවිධානයේ ශ්‍රී ලංකාවේ පර්යේෂිකා නීතිඥ ත්‍යාගී රුවන් පතිරණ පෙන්වා දෙන්නේ.
“ගෝඨාභය මහත්තයා කියලා තිබ්බ විදියට නම් පරණ සහතිකය අමතක කරන්න දෙන විසඳුමක් විදියට තමයි කිව්වේ. විමර්ශනය කරලා මරණ සහතික දෙනවා කියලා කිව්වේ එතකොට ඒක ප්‍රශ්නයක්,” යැයි 31 සිකුරාදා කොළඹදී ඇය මාධ්‍ය වෙත කියා සිටියාය.
යහපාලන රජය එක්සත් ජාතීන්ගේ සංවිධානය සමඟ හවුලේ ගිවිස ගත් ආකාරයට අතුරුදහන් වුවන් පිළිබඳ සිද්ධි විමර්ශනයට ඇති දේශීය ආයතනය අතුරුදහන් වුවන් පිළිබඳ වු කාර්යාලය බවද ඇම්නෙස්ටි ජාත්‍යන්තරයේ නීතිඥවරිය පැවසුවාය.
අතුරුදහන් වුවන් සියලු දෙනා මිය ගිය බව හා ඒ පිළිබඳව ඔවුන්ගේ පවුල් වල උදවිය පවා දන්නා බවට ගෝඨාභය රාජපක්ෂ ජනාධිපතිවරයා එක්සත් ජාතීන්ගේ ශ්‍රී ලංකාවේ නේවාසික නියෝජිතවරිය හට කරන ලද ප්‍රකාශයට අතුරුදහන් වුවන්ගේ ඥාතීන් සිය විරෝධය දක්වා ඇත.
“ළමයි අරන් ගිහින් අතුරුදහන් කළේ ඔහුගේ කාලයේ. එහෙම වුනේ නැත්නම් අතුරුදහන් වුවන්ගේ ඥාතීන් කියලා කොටසක් නෑ. ඔහු දන්නවා ඔවුන් කොහේද කියලා. අතුරුදහන් වුන අයට මොකද වුනේ. ඔහු දන්නවා ඔවුන්ට මොකද කලේ කියලා,” යැයි මන්නාරමේ අතුරුදහන් වු ඥාතීන්ගේ කැඳවුම්කාරිය එම්මානුවෙල් උදයචන්ද්‍ර මාධ්‍ය වෙත කියා සිටියාය.
“එවක බලයේ හිටපු ආණ්ඩුව නැවත බලයට ඇවිත් තියෙනවා. ඒ කාලයේ ආණ්ඩුව අපිට කිව්වා සුදු කොඩි අරන් එන්න අපි ඔබේ දරුවන් නිදහස් කරනවා කියලා. එහෙම පොරොන්දු වෙච්ච ආණ්ඩුව තමයි දැන් බලයට ඇවිත් තියෙන්නේ,” යනුවෙන් මුලතිව් අතුරුදහන් වු ඥාතීන්ගේ කැඳවුම්කාරිය මයුරසුරේෂ් ඊස්වරී මාධ්‍ය වෙත කියා තිබුනි.
ඔවුන් දෙනොම පවසන පරිදි බොහෝදෙනා තම අතුරුදහන් ඥාතීන් අවසන් වරට දැක ඇත්තේ රජයේ ආරක්ෂ අංශ විසින් අත් අඩංගුවට ගන්නා ලද අවස්ථාවේදීය.
Facebook Comments
