ඇවන්ගාර්ඞ් සමාගමට පාවෙන අවි ගබඩාවක් පවත්වාගෙන යාමට අවසර ලබාදීම සම්බන්ධයෙන් පවරා ඇති නඩුවකින් හිටපු ආරක්ෂක ලේකම් ගෝඨාභය රාජපක්ෂ ඇතුළු සැකකරුවන් 7 දෙනෙකුට අද ඇප හිමි වු අතර විත්තිකරුවන් හට විදෙස් ගමන් තහනමක් පැනවීය.
කිසියම් සැකකරුවෙකුට විදේශගතවීමට අවශ්‍ය නම් අධිකරණයේ අවසර මත ඒ සඳහා හැකියාව පවතින බව මහේස්ත්‍රාත්වරයා පැවසීය.
හිටපු ආරක්ෂක ලේකම් ගෝඨාභය රාජපක්ෂ,නිශ්ශංක සේනාධිපති සහ හිටපු නාවික හමුදාපතිවරුන් ඇතුළු පිරිසක් මෙම නඩුවේ විත්තිකරුවන් ලෙස නම් කර ඇත.
ඇවන්ගාර්ඩ් මැරිටයිම් සර්විසස් ආයතනයේ අවි ගබඩාවක් පවත්වාගෙන යෑමට ඉඩ හැරීම මගින් රජයට රුපියල් බිලියන 11.4ක පාඩුවක් සිදු කළැයි අල්ලස් කොමිසමෙන් පවරා ඇති නඩුව අද (30) විභාගයට ගත් අවස්ථාවේදී කොළඹ කොටුව ප්‍රධාන මහේස්ත්‍රාත් ගිහාන් පිලපිටිය මෙම නියෝග කළේය.
හිටපු ආරක්ෂක ලේකම්වරයා වෙනුවෙන් පෙනී සිටි නීතිවේදීහු කරුණු දක්වමින් අල්ලස් කොමිසම අදාළ නඩුව ගොනුකර ඇති ආකාරය නීතියට පටහැනි බවත් එබැවින් සියලු සැකකරුවන් මුදාහරින මෙන් විත්තියේ නිතිවේදින් ඉල්ලා සිටියේය.
එහෙත් අධිකරණයේ සාමාන්‍ය සම්ප්‍රදායට එරෙහිව කටයුතු කිරීමට නොහැකි බව සඳහන් කළ මහේස්ත්‍රාත්වරයා, විරෝධතා තිබේනම් ඉදිරියේදී විභාගයට ගන්නා බවත් පැවසීය.
එක් අයකුට රුපියල් ලක්ෂ දෙකක බැගින් මුදල් ඇපයක් ද රුපියල් මිලියන 10 බැගින් ශරිර ඇප දෙකක් මත සැකකරුවන් මුදා හැරියේය.
නඩුවේ වැඩිදුර විභාගය ඔක්තෝම්බර් මස 03 වන දිනට කල් තැබුවේය.
Facebook Comments
