වසර හැත්තෑ හතරක් පවතින ක්‍රමයේ වෙනසක් අපේක්‍ෂා කළ හැක්කේ දෙමළ ජනතාවට පෙඩරල් පාලන ව්‍යුහයක් ලබා දීමෙන් බවට උතුරේ දේශපාලනඥයෙක් අවධාරණය කර තිබේ.
“මේ දිනවල ආණ්ඩුවට එරෙහිව උද්ඝෝෂණය කරන හැමෝම කතා කරනවා ක්‍රමයේ වෙනසක් ගැන.අවුරුදු හැත්තෑ හතරක් පැරණි මේ ක්‍රමය වෙනස් කරන්න ඕනෑ කියලා.එහෙම කරනවා නම් විධායක ජනාධිපති ක්‍රමය ජනතාවට ඕනේ ද එපා ද කියලා දැනගන්න ජනමත විචාරණයක් පවත්වන්න ඕනෑ. ඒ වගේම දෙමළ ජනයාගේ ජාතික ප්‍රශ්නයට විසදුමක් ලෙස පෙඩරල් ක්‍රමයක් ලබා දෙන්නත් ඕනෑ,” යැයි දෙමළ ජාතික ජනතා පෙරමුණේ නායක,පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් පවසයි.
පෙඩරල් පාලන ව්‍යුහයක් යනු රට බෙදීමක් නොවන බවට ඉකුත් දා පාර්ලිමේන්තුවේ පැවති විවාදයකට එක්වෙමින් අවධාරණය කළ TNPF නායකයා වැඩිදුරටත් පැහැදිලි කර සිටියේ කැනඩාව ඇතුළු රටවල් ගණනාවක පෙඩරල් ක්‍රමය සාර්ථකව ක්‍රියාත්මක වන බවයි.
දිනෙන් දින උග්‍ර වන ආර්ථික අර්බුදය හේතුවෙන් පීඩාවට පත් සිංහල ජනයා තමන්ම තෝරා පත්කර ගත් නායකයන් ප්‍රශ්න කරමින් සිටින බව පොන්නම්බලම් පවසයි.
“2015 දී රාජපක්‍ෂලා වංචා දුෂණ කරනවා කියා ජනතාව යහපාලන ආණ්ඩුවට ජන්දේ දීලා පත් කර ගත්තා. එහෙත් ඒගොල්ලෝ මහ බැංකුවේ වංචා දුෂණ ඇතුළු තවත් දුෂණ ගනුදෙනු ගණනාවක් ගැන හෙළිදරව් වුනු නිසා ඒ ආණ්ඩුව 2020 දී පරාජය කරලා රාජපක්‍ෂලා සුදුසුයි කියලා ආයේ පත්කරගත්තා. ගෝඨාභය රාජපක්‍ෂ බලයට පැමිණි විට තමන්ට රැකවරණයක් තියේවි,සුඛිත මුදිත කරයි කියලා හිතපු සිංහල ජනතාව එයාට ඡන්දේ දීලා ජනාධිපති කර ගත්තා.දැන් ඒ සිංහල ජනතාවම “ගෝටා ගෝ හෝම්“කියලා උද්ඝෝෂණ කරනවා.”
වර්තමාන ජනාධිපතිවරයා බලයට පත් කිරීමට විරුද්ධවූ දෙමළ ජනතාව ආරම්භයේ පටන්ම ඔහුට විරුද්ධව මානව හිමිකම් උල්ලංඝන සම්බන්ධයෙන් නීතිමය පියවර ගැනීම සඳහා අරගල කළ බව ගජේන්ද්‍රකුමාර් මන්ත්‍රීවරයා අවධාරණය කළේය.
“උතුරු නැගෙනහිර දෙමළ ජනතාව ගෝඨාභය රාජපක්‍ෂට ජන්දය දුන්නේ නැහැ.ඔවුන් කිව්වේ ගෝඨාභයව ජාත්‍යන්තර අධිකරණයට ඉදිරිපත් කරලා දඩුවම් ලබා දෙන්න ඕනෑ කියලා.”
ආර්ථික අර්බුදය හේතුවෙන් සෑම තැනකම පෝලිම් දක්නට ලැබෙන බව පවසන මන්ත්‍රීවරයා වැඩිදුරටත් කියා සිටියේ ඉන්ධන,ගෑස්,භූමිතෙල්,අතවශ්‍ය ආහාර,බෙහෙත් ද්‍රව්‍ය මිල ඉහල යාමත්,හිඟකමත් නිසා ජනතාව මහත් අසරණ වී ඇති බවයි.
Facebook Comments
