ගාල්ල මුහුදු පුරාවිද්‍යා ඒකකය මඟින් මෑතකාලීන ව සිදුකරන ලද ගවේෂණ ඔස්සේ කොළඹ ආශ්‍රිත මුහුදු තීරයේ තිබී ගිලී ගිය යාත්‍රා රාශියක තොරතුරු අනාවරණය වී ඇති අතර, පළපුරුදු කිමිදුම්කරුවකු වන දර්ශන ජයවීර විසින් එම තොරතුරු ලබා දුන් බව මධ්‍යම සංස්කෘතික අරමුදල පවසයි.
2017 වසරේ දෙහිවල මූලික කරගනිමින් ක්‍රියාත්මක කළ ගවේෂණයේ දී යාත්‍රා 20කට ආසන්න ප්‍රමාණයක තොරතුරු ලැබී ඇති අතර, මෑතකාලීන ව ගිලී ගිය යාත්‍රා මෙන් ම වසර 100කට වඩා පැරණි යැයි අනුමාන කළ හැකි යාත්‍රා ද ඒ අතර පවතීන බවයි මධ්‍යම සංස්කෘතික අරමුදල පවසන්නේ.
පර්යේෂණයට ලක් වූ බොහෝ යාත්‍රා මීටර් 25කට වඩා ගැඹුරේ තැන්පත් වී තිබෙන අතර, ලෝහ භාවිතයෙන් නිපදවා ඇති මෙම යාත්‍රා අතර විශාල භාණ්ඩ ප්‍රවාහන නෞකා මෙන් ම වාෂ්ප නෞකා ද, කුඩා හා මධ්‍යම ප්‍රමාණයේ වාෂ්ප නෞකා ද එන්ජින් බලයෙන් ක්‍රියාත්මක වූ බත්තල් ද පවතියි
සමුද්‍ර පුරාවිද්‍යා ක්ෂේත්‍රය තුළ යොදාගන්නා නවීන විද්‍යාත්මක ක්‍රමවේද හා උපකරණ භාවිතයෙන් මෙම නෞකා සම්බන්ධ ව ඉදිරි පර්යේෂණ සිදුකිරීමට මධ්‍යම සංස්කෘතික අරමුදල අපේක්ෂා කරයි.
ලංකාවේ සමුද්‍ර පුරාවිද්‍යාව සම්බන්ධ ව දකුණු මුහුදු තීරය ප්‍රමුඛස්ථානයක් ගන්නා අතර, දැනට පවත්නා ගල්පර හා දියවැල් හේතුවෙන් යාත්‍රා ගමනාගමනයට බාධා සහිත කලාපයක් වශයෙන් ද පුරාවිද්‍යා පූර්ව ගවේෂණ ඔස්සේ හඳුනාගෙන ඇත.
මධ්‍යම සංස්කෘතික අරමුදලේ අධ්‍යක්ෂ ජනරාල්වරයාගේ මඟ පෙන්වීම යටතේ ක්‍රියාවට නංවා ඇති ගවේෂණ හා ප්‍රතිසංස්කරණ වැඩසටහන් අතර සමුද්‍ර පුරාවිද්‍යා ක්ෂේත්‍රය තුළ මැතකාලීන ව ගවේෂණ කටයුතු රැසක් සිදුකොට ඇති බවද එම අරමුදල නිවේදනය කරයි.
Facebook Comments
