යාපනයේ හමුදාව ඇල්ලූ ඉඩම් ගැන තොරතුරු දීමට කල් ඉල්ලයි

0

යුද හමුදාව විසින් බලහත්කාරයෙන් වාඩි ලා සිටින යාපනය දිස්ත්‍රික්කයේ පෞද්ගලික ඉඩම් පිළිබඳ තොරතුරු ලබා දීම සඳහා ප්‍රමාණවත් කාල සීමාවක් සහිතව වඩාත් විනිවිද පෙනෙන ක්‍රියාවලියක් ලබාදෙන ලෙස ඉඩම් කොල්ලයට එරෙහිව කටයුතු කරන සංවිධානයක් යාපනය දිසාපති වරයාගෙන් ඉල්ලා තිබේ.

ඉඩම් අයිතිය සඳහා වන ජනතා සන්ධානයේ උතුරු පළාත් ජාලය විසින් සැප්තැම්බර් 17 වැනි සිකුරාදා ලිපියකින් එම ඉල්ලීම යොමු කර ඇත්තේ යාපනය දිසාපති කනපතිපිල්ලෙයි මහේසන් වෙතයි.

ඒ, දැනට හමුදාව හෝ පොලිසිය විසින් අත්පත් කරගෙන සිටින පෞද්ගලික ඉඩම් හිමි අවතැන් වූ පවුල් වලින් තොරතුරු ඉල්ලා දිසාපතිවරයා විසින් අගෝස්තු 26 වැනි දින යොමු කර තිබු ලිපියට උතුරු පළාත් සිවිල් සමාජ නියෝජිතයන් සහ තම ඉඩම් වෙත ආපසු යාමට අරගල කරන ප්‍රජාව දක්වන ප්‍රතිචාරයක් වශයෙනි.

සංවිධාන විස්සක සහ පුද්ගලයන් 42 කුගේ නම් සහිතව දිසාපති වෙත යොමු කර තිබෙන එම ලිපිය මඟින් ඉඩම් අයිතිය සඳහා වන ජනතා සන්ධානය පෙන්වා දී ඇත්තේ හමුදා අත්පත් කරගැනීම් හේතුවෙන් ඉඩම් අහිමි වීමෙන් සහ අවතැන් වීමෙන් පෙළෙන පවුල් පසුගිය කාලය තුළ අවස්ථා කිහිපයකදීම තම ඉඩම් නිදහස් කර ගැනීමේ බලාපොරොත්තුවෙන් විවිධ බලධාරීන්ට තම ඉඩම් වලට අදාළ පුළුල් තොරතුරු ලබා දී ඇති බවයි.

එසේම වසර ගණනාවක් තිස්සේ කිසිදු ප්‍රතිඵලයකින් තොරව එක් ආයතනයක සිට තවත් ආයතනයකට යැමෙන් බොහෝ පවුල් වෙහෙසට පත් ව ඇති හෙයින් මෙය රජය විසින් ලබා දෙන තවත් බොරු පොරොන්දුවක් බවට සැකයක් ජනතාව තුළ ඇතිව තිබෙන බව එම ලිපිය මගින් පෙන්වා දී තිබේ.

දිසාපති මහේසන් විසින් එවන ලද ලිපියේ තොරතුරු සැපයීමට අවශ්‍ය අවසන් දිනයක් සදහන් කර නොමැති නමුත් යාපන දිස්ත්‍රික් ලේකම් කාර්යාල වෙබ් අඩවිය තොරතුරු ලබාදීමට අවසන් දිනය ලෙස දක්වා ඇත්තේ එම ලිපිය එවා ඇති දින සිට මාසයක්වත් නොපිරෙන සැප්තැම්බර් 15 වන දින බව ඉඩම් අයිතිය සඳහා වන ජනතා සන්ධානය (PARL) පෙන්වා දෙයි.

දිවයින පුරා ක්‍රියාත්මක වන අගුලු දැමීම සහ මුල් ලිපි ලේඛන ලබා ගැනීමේ දුෂ්කරතා හේතුවෙන් දැනට පවතින සංචරණ තහනම සැලකිල්ලට ගෙන, මාසයකට අඩු කාලයකින් මෙම අයදුම්පත් ඉදිරිපත් කිරීම රටින් බැහැරව ජීවත් වන පවුල් ඇතුලු බොහෝ පවුල්වලට කළ නොහැකි කාර්යයක් බව PARL සිය ලිපිය මඟින් දිසාපතිවරයා වෙත දන්වා තිබේ.

එම ලිපියේ වැඩි දුරටත් සදහන්ව ඇත්තේ මෙම තොරතුරු රැස් කිරීමේ අරමුණ පිළිබඳව පැහැදිලි බවක් නොමැති බවත්, එබැවින් එම ක්‍රියාවලිය පිළිබඳව ජනතාව තුළ සැකයක් ඇති වී තිබෙන බවයි.

ඒ හරහා හමුදාව විසින් තවදුරටත් නව ඉඩම් අත්පත් කර ගැනීම සඳහා උත්සාහයක් ඇති වේ ද යන බියද උතුරේ ජනතාව තුළ වර්ධනය වෙමින් පවතින බව එහි වැඩි දුරටත් සදහන්ය.

ඉඩම් අයිතිය සඳහා වන ජනතා සන්ධානය සිය ලිපිය මගින් තව දුරටත් දැනුම් දී ඇත්තේ රටින් බැහැරව ජීවත් වන යාපනයේ ඉඩම් හිමි ජනතාවට තම තොරතුරු ලබා දිය හැකි ක්‍රමයක් ගැන සඳහන් කිරීමට දිසා පතිවරයා යොමු කළ ලිපිය අසමත්ව තිබෙන බවයි.

“යාපනයේ හමුදා විසින් තවමත් අත්පත් කරගෙන ඇති ඉඩම් සහිත බොහෝ පිරිස් විදේශ රටවල ජීවත් වෙති.”

සැප්තැම්බර් 17 වැනිදා ඉඩම් අයිතිය සඳහා වන ජනතා සන්ධානය යාපනය දිස්ත්‍රික් දිසාපති වෙත යොමු කළ ලිපිය මගින් තව දුරටත් ඉල්ලා ඇත්තේ ඉඩම් නිදහස් කිරීම සඳහා පවුල් විසින් දැනටමත් ලබා දී ඇති තොරතුරු කෙසේ ප්‍රයෝජනයට ගත හැකි ද යන්න පිළිබඳව බලධාරීන් සොයා බැලිය යුතු අතර, තොරතුරු ඉදිරිපත් කිරීමට ලබා දී ඇති කාලය දීර්ඝ කළ යුතු බවයි.

ඒ හරහා තවමත් තොරතුරු ලබා නොදුන් පවුල් වලට එම තොරතුරු එක්රැස් කිරීමට ප්‍රමාණවත් කාලයක් ලැබෙන අතර, මෙම ක්‍රියාවලියෙන් කිසිදු පවුලක් මගනොහැරවීමට වග බලාගත හැකි බව එම ලිපියේ තව දුරටත් සදහන්ය.

මෙම ක්‍රියාවලිය පිළිබඳව ජනතාව තුළ දැනුවත් කිරීමක් ඇති කිරීම සඳහා අවශ්‍ය තොරතුරු සැපයීමට පහසුකම් සැලසීම සඳහා පළාත් පාලන ආයතන, රාජ්‍ය නිලධාරීන් සහ සිවිල් සංවිධාන වල සහභාගීත්වයෙන් වඩාත් විනිවිදභාවයෙන් යුත් සහ සහයෝගීතාවයෙන් යුත් ක්‍රියාවලියක් සංවර්ධනය කරන ලෙසත් උතුරු පළාතේ අවතැන් වූ සියලු ජන කොටස් සඳහා ඉඩම් අයිතිය තහවුරු කිරීමට සහ ඉඩම් සිය මුල් අයිතිකරුවන්ට ලබා දීමට රජය ගන්නා ඕනෑම අව්‍යාජ ප්‍රයත්නයකට උපරිම සහයෝගය ලබා දෙන බවත් ඉඩම් අයිතිය සඳහා වන ජනතා සන්ධානයේ (PARL) යාපනය දිසාපති වෙත දැනුම් දී තිබේ.

ආණ්ඩුවේ ඉඩම් ගණන්වලට අභියෝගයක්

බලහත්කාරයෙන් අත්පත්කරගෙන සිටින යාපනය ජනතාවගේ ඉඩම් පිළිබඳ සංඛ්‍යාලේඛන තහවුරු කරගැනීමට පෙරම ඉඩම් ආපසු ලබාදුන් බවට ශ්‍රී ලංකාවේ රජය විසින් එක්සත් ජාතීන්ගේ සංවිධානය වෙත යොමු කර ඇති තොරතුරුවල විශ්වසනීයභාවය ජාත්‍යන්තර වශයෙන් පසුගියදා අභියෝගයට ලක් වී තිබුනි.

රජයේ හමුදා බලහත්කාරයෙන් වාඩි ලා සිටි උතුරුකරයේ ජනතාවගේ ඉඩම් වලින් 90% ක් පමණ නිදහස් කර ඇතැයි ලංකාණ්ඩුව විසින් එක්සත් ජාතීන්ට ඉදිරිපත් කළ සංඛ්‍යා ලේඛන වල දැක්වේ.

එය නිවැරදි නම්, මේ වන විට අක්කර තුන් ලක්ෂයකට වැඩි ප්‍රමාණයක් නිදහස් කර තිබිය යුතු නොවේදැයි සමාජ, ආර්ථික හා පාරිසරික ගැටලු පිළිබඳ ප්‍රතිපත්ති සම්පාදනයට සහාය වන ස්වාධීන ආයතනයක් විසින් ප්‍රශ්න කර ඇත.

ඒ, සාමය සහ සංහිඳියාව පිළිබඳව ශ්‍රී ලංකා රජය ලබා ඇති ප්‍රගතියක් ලබා ඇති බව පෙන්වීමට එක්සත් ජාතීන්ගේ 48 වැනි මානව හිමිකම් සැසිවාරයට ආරම්භයට පෙර 2021 අගෝස්තු 27 දින ශ්‍රී ලංකා විදේශ කටයුතු අමාත්‍යාංශය කොළඹ සිටින සියළුම නේවාසික රාජ්‍ය තාන්ත්‍රික දූතයන් වෙත යවනු ලැබූ වාර්තාවක් සම්බන්ධයෙන් කැලිෆෝනියාව මුලස්ථාන කොටගත් ඕක්ලන්ඩ් ආයතනය විසින් එක්සත් ජාතීන් වෙත ඉදිරිපත් කරන ලද සංදේශයකිනි.

ශ්‍රී ලංකාවේ ආණ්ඩුව එජා මානව හිමිකම් කොමිසමට පවසා ඇත්තේ “ආරක්ෂක හමුදාව විසින් පවරාගෙන තිබූ රජයේ ඉඩම් වලින් 89.26%ක් නිදහස් කරනු ලැබූ අතර, පෞද්ගලික ඉඩම් වලින් 92.22% ක් 2019 දෙසැම්බර් 31 වන විට සිවිල් අයිතිකරුවන්ට ලබා දී ඇත,” යනුවෙනි.

ඕක්ලන්ඩ් ආයතනය පෙන්වා දෙන්නේ, තම ආයතනයට සම්බන්ධ පර්යේෂකයන් විසින් සම්පාදනය කළ 2021 මාර්තු වාර්තාව අනුව මුලතිව් දිස්ත්‍රික්කයේ පෞද්ගලික ඉඩම් අක්කර 16,910 ක්, කිලිනොච්චි දිස්ත්‍රික්කයේ අක්කර 4,374.8 ක්, යාපනය දිස්ත්‍රික්කයේ අක්කර 3,027 ක්, මන්නාරම දිස්ත්‍රික්කයේ අක්කර 1,414 ක් සහ වවුනියාව දිස්ත්‍රික්කයේ අක්කර 8,511 ක් ලෙසින් උතුරු පලාතේ පමණක් අක්කර 34,226.8 ක් ඒ වන විට ඒවායේ අයිතිකරුවන්ට පවරා දී නොතිබුණු බව ය.

ආණ්ඩුව කියන පරිදි පවරාගෙන තිබූ පුද්ගලික ඉඩම් වලින් 92.22% ක් පවරා දුන්නේ යැයි සළකා බැලුවහොත්, එම ඉඩම් ප්‍රමාණය සමාන වන්නේ පෞද්ගලික ඉඩම් වලින් පවරා දී නොතිබූ 7.88% ටය.

Facebook Comments