බුදුන්ගේ දහමට පිටින් ගොස් දේශපාලන හේතු මත වෛරය වපුරන භික්ෂුන් සිටින පන්සල් නඩත්තු නොකරන ලෙස මාධ්‍යවේදියකු නව ප්‍රජාතන්ත්‍රවාදී පෙරමුණේ ජනාධිපති අපේක්ෂකයා හට පෙන්වා දී තිබේ.
“හැම පන්සලක්ම නඩත්තු කරන එක ඔබතුමාගේ යුතුකම වෙන්නෙ නෑ. මේ වෙලාවේ එකත් නෙමේ රැල්ල. බුදු හමුදුරුවන් කියුපු බණින් පිට බණක් ලොකු හාමුදුරුවෝ කියනවා නම් ඒ ලොකු හාමුදුරවන්ට අමුතු වරප්‍රසාදයක් දෙන්න ඕනේ නෑ දේශපාලන පක්ෂය මොකක් වුනත්. බුදු හාමුදුරුවෝ කිව්වේ මෛත්‍රීය නම් හාමුදුරුවෝ වපුරන්නේ වෛරය නම් ඒ පන්සලට දේශපාලන බලපෑමක් තියෙනවා නම් ඒ පන්සල නඩත්තු කරන්න ඕනේ නෑ,” යි ඩිල්ෂාන් පතිරත්න මාධ්‍යවේදියා කියා සිටියේ සජිත් ප්‍රේමදාස සහභාගිවූ තරුණ සමුළුවකදීය.
බෞද්ධ භික්ෂුන් හට වරප්‍රසාද ලබා දීමෙන් බුදු දහමට කිසිදු ප්‍රගතියක් අත් නොවන බව ඔහු සඳහන් කර සිටියේ හංසා ලකුණින් ජනපතිවරණයට තරඟ වදින සජිත් ප්‍රේමදාසගේ තරුණ ප්‍රඥප්තිය එළි දැක්විම අමතමිනි.
“අපිට ඕනේ අවංක බෞද්ධ සමාජයක් නිර්මාණය කරන්න. මේ සමාජය බෞද්ධ කරනවා කියන්නේ මිනිසුන්ගේ හදවතේ බුද්ධාගම රජ වෙන්න ඕනේ. නැතුව හාමුදුරුවන්ගේ වාහනේට වීඅයිපී ස්ටිකර් එක හදලා වැඩක් නැහැ. එහෙම වැදුනා කියලා මේ රටේ බුදුදහමට කිසිම ප්‍රගතියක් වෙන්නේ නැහැ.”
දකුනු ආසියාවේ මෙන්ම ශ්‍රී ලංකාවේ ද ජනාධිපතිවරණ අපේක්ෂකවරයෙක් ප්‍රඥප්තියකට අත්සන් කළ පලමු අවස්ථාව මෙය බව කී මාධ්‍යවේදි ඩිල්ෂාන් පතිරත්න යම් හෙයින් සජිත් ප්‍රේමදාස ජනපති දුරයට පත් වී එම ප්‍රතිඥා කඩ කරනු ලැබුවහොත් එයට විරුද්ධව නඩු පැවරීමේ අයිතිය ද ඉල්ලා සිටියේය.
Facebook Comments
