“අතුරුදහන් වීම” පිළිබදව විග්‍රහය කුමක්දැයි තමන් විසින් කැඳවන ලද මාධ්‍යවේදීන්ගේ හමුවකදී ප්‍රශ්න කළ ජනාධිපතිවරයා යුද සමයේ ආගිය අතක් නැතියවුන්ගේ වගකීම භාරගැනීම ප්‍රතික්ෂේප කර තිබේ.
අතුරුදහන් වුවන්ගේ පවුල් වල සාමාජිකයන්ට වන්දි ගෙවීම සම්බන්ධයෙන් දෙමළ මාධ්‍ය වේදියකු ජනාධිපතිවරයාගෙන් සිදු කළ විමසීමකදී ජනාධිපති ගෝඨාභය රාජපක්ෂ පෙරලා විමසා ඇත්තේ “අතුරුදහන් වුවන් කීවම මොකකද් ඹයා හිතන්නේ, අතුරුදහන් වීම කියන එක පිළිබදව ඔයාගේ විග්‍රහය මොකක්ද ? ” යනුවෙනි.
මාධ්‍ය ආයතන කර්තෘවරුන්, ප්‍රවෘත්ති සංස්කාරකවරු සහ අධ්‍යක්ෂවරු සමඟ මාර්තු 5 බ්‍රහස්පතින්දා දහවල් ජනාධිපති කාර්යාලයේ පැවති හමුවේ දි ජනාධිපතිවරයා හා මාධ්‍ය වෙිදියා අතර එම සංවාදය සිදු වන අයුරු ජනාධිපති මාධ්‍ය ඒකකය විසින් ජන මාධ්‍ය ආයතන වෙත නිකුත් කළ විඩියෝ පටයක සටහන්ව තිබේ.
මාධ්‍යවේදීහු විවිධ පැතිකඩ සහ ක්ෂේත්‍ර අලලා ජනාධිපතිතුමාගේ ප්‍රශ්න විමසා ඇති අතර ජනාධිපති මාධ්‍ය ඒකකය පවසන්නේ ජනාධිපතිතුමා ඒවාට “සරල, සෘජු සහ පැහැදිළි” පිළිතුරු ලබා දුන් බවයි.
කෙසේ වෙතත්, යුද සමයේ අතුරුදහන් වීම් සම්බන්ධයෙන් ප්‍රශ්න කරන ලද අවස්ථාවේ ජනාධිපති වරයාගේ උත්තරය ප්‍රශ්නයක් වනු දැකගත හැකිය.
ඉන් අනතුරුව මාධ්‍යවේදියාගේ විග්‍රහයට වඩා පුළුල් විග්‍රහයක් කිරීමට උත්සාහ ගන්නා ජනාධිපති ගෝඨාභය රාජපක්ෂ යුද්ධය මුල් කරගනිමින් සිදු වු අතුරුදහන් සම්බන්ධයෙන් කතා කිරීමේදී තමාට “ඉතා හොද අත්දැකීම්” ඇති බව කියා සිටියේය.
ශ්‍රී ලංකාවේ විධායක ජනාධිපතිවරයා වීමට දස වසරකට පෙර, තිස් වසරක් පුරා මෙරට පැවැති යුද්ධය යුදමය වශයෙන් නිමා කිරීමට ආරක්ෂක ලේකම්වරයා ලෙස සෘජු දායකත්වයක් සැපයු ගෝඨාභය රාජපක්ෂ එයටත් පෙර යුද සෙන්පතියකු ලෙස සටන් භුමියේදී තමන් ලද අත්දැකීම් මාධ්‍යවේදීන් ඉදිරියේ විස්තර කර දී තිබේ.
ඔහු විසින් අතුරුදහන් වීම ලෙස හඳුන්වා දෙනු ලැබුවේ “යුද පිටියේදී මියගිය අයගේ සිරුරු ඥාතීන්ට හමු නොවීම” යි.
අතුරුදහන් වීම් පිළිබඳ සුවිශේෂ සිදුවීම් තිබෙන බව පිළිගත් ජනාධිපති රාජපක්ෂ, ඒ සම්බන්ධ වගකීම යුද හමුදාව හෝ ආණ්ඩුව විසින් භාරගැනීම ප්‍රතික්ෂේප කළේය.
“විශේෂ සිදුවීම් අරගෙන ඒක ජෙනරලයිස් කරන්න හදනවනේ. එතන තමයි මේකේ වැරැද්ද තියෙන්නේ.”
යුද බිමේදී මියගිය හමුදාවේත්, එල්ටීටීඊයේත් මිය ගිය සෙබළුන්ගේ මෘත ශරීර ඥාතීන් අතට පත් නොවීම අතුරුදහන් වීම් ලෙස ප්‍රකාශයට පත් කළ ශ්‍රී ලංකාවේ ජනාධිපතිවරයා යුද සමයේදී ආරක්ෂක අංශ වලට භාර වීමෙන් පසුත්, දිවයිනේ විවිධ තැන වලින් පැහැර ගැනීමෙන් පසුත් අද වනතුරු සොයා ගන්නට නැති දස දහස් සංඛ්‍යාත ජනකාය සම්බන්ධයෙන් කතා කිරීමෙන් වැළකී සිටියේය.
අතුරුදහන් වූ තැනැත්තන් පිළිබඳ කාර්යාලය විසින් රැස්කරන ලද තොරතුරු අනුව යුද සමයේ උතුරු නැගෙනහිර අතුරුදහන් පිරිස විසි දහසකි. ඉන් වැඩි දෙනෙක් අතුරුදහන් වී ඇත්තේ යුද්ධාවසානයේ රජයේ ආරක්ෂක අංශ වෙත භාර වීමෙන් අනතුරුවයි.
Facebook Comments
