පාස්කු ප්‍රහාරයට බුද්ධි අංශ සම්බන්ධ බවට ආණ්ඩුවේ ප්‍රබල ඇමැතිවරුන් චෝදනා කර තිබිය දී රහස් ඔත්තු සේවා නිලධාරින්ට දණ්ඩ මුක්තිය ලබා දිය යුතු යැයි හිටපු නාවික හමුදාපතිවරයකු යෝජනා කර තිබේ.
බුද්ධි අංශ සාමාජිකයන් කිහිප දෙනෙකු සිරගත කර තිබීමද ප්‍රහාරය වළක්වා ගැනීමට නොහැකි වීමට හේතු විය හැකි බව හිටපු නාවික හමුදාපති අද්මිරාල් ජයනාත් කොළඹගේ විශ්වාස කරයි.
පාස්කු ප්‍රහාර මාලාව පිළිබඳව සහ රටේ වත්මන් ආරක්ෂක තත්වය පිළිබඳව හිටපු හමුදා ප්‍රධානීන් සකස් කරන ලද බව කියැවෙන වාර්තාවක් විපක්ෂ නායක මහින්ද රාජපක්ෂ වෙත ඔහුගේ නිල නිවසේදී බාරදීමෙන් පසු හිටපු නාවික හමුදාපතිවරයා තම යෝජනාව ඉදිරිපත් කළේය.
“ඒගොල්ලන්ගේ රාජකාරිය කිරිමේදී මුක්තියක් නැත්නම් ඒගොල්ලො ඊට පස්සේ රාජකාරිය හරියට කරන්න පෙළඹෙන්නේ නැහැ,” යි හිටපු ත්‍රිවිධ හමුදාපතිවරුන් සමඟ විපක්ෂ නායක හමුවීමෙන් පසුව 02 බ්‍රහස්පතින්දා මාධ්‍ය වෙත පැවසීය.
“රාජකාරි” කිරීම සඳහා හමුදා නිලධාරීන්ට මුක්තිය අවශ්‍ය ඇයිදැයි ඔහු පැහැදිලි කළේ නැත.
මාධ්‍යවේදීන් මරා දැමීම, පැහැර ගැනීමට සහ වධ හිංසා කිරීමට සැක පිට බුද්ධි අංශ නිලධාරින් කිහිප දෙනකුට අධිකරණයේ නඩු ගොණු කර ඇති අතර කොළඹ හා තදාසන්න ප්‍රදේශ වලින් කප්පම් ගැනීමට පිරිසක් පැහැර ගැනීමට සැක පිට නාවික හමුදා බුද්ධි අංශයේ නිලධාරින් කිහිප දෙනකුට එරෙහිව නඩු පවතී.
කප්පම් ගැනීමට පුද්ගලයන් පැහැර ගැනීමට අදාළ නඩුවේ සැක කරුවකු ලෙස නම් කර ඇති හිටපු නාවික හමුදාපති වසන්ත කරන්නාගොඩද රටේ ආරක්ෂක තත්ත්වය පිළිබඳව හිටපු ආරක්ෂක ප්‍රධානීන් සකස් කළ වාර්තාව බාර දීමට සම්බන්ධ වී සිටිනු දැක ගත හැකි විය.
පාස්කු ප්‍රහාරයට සැක කෙරෙන පිරිස් සඳහා හිටපු ජනපති මහින්ද රාජපක්ෂගේ සහෝදර ගෝඨභය රාජපක්ෂක ආරක්ෂක ලේකම් ධුරය දරන සමයේ බුද්ධි අංශය මගින් වැටුප් ගෙවා ඇති බව ඇමැති රාජිත සේනාරත්න පසුගිය දා අනාවරණය කළේය.
Facebook Comments
