ඒකීය රාජ්‍යය ප්‍රතික්ෂේප කිරීමට දෙමළ පක්ෂ සාකච්ඡා අරඹයි

ශ්‍රී ලංකාව වෙනුවෙන් නව ආණ්ඩුක්‍රම ව්‍යවස්ථාවක් සකස් කිරීමේදී ඒකීය රාජ්‍ය ප්‍රතික්ෂේප කර ෆෙඩරල් ව්‍යුහයක් සහිත පාලනයක් සදහා නව රජයට බල කිරීම වෙනුවෙන් උතුරේ දෙමළ දේශපාලන පක්ෂ අතර සාකච්ඡා ආරම්භ කර තිබේ.

එම කතිකාවට මුලපුරා සිටින දෙමළ ජාතික ජනතා පෙරමුණේ (TNPF) අරමුණ වී ඇත්තේ නව ආණ්ඩුක්‍රම ව්‍යවස්ථාවක් සකස් කිරීමේදී දෙමළ ජනතාවගේ ගැටළු වලට ලබා දිය යුතු විසදුම් සම්බන්ධයෙන් 2016 වසරේදී දෙමළ බහුජන සංවිධානවලින් සැදුම්ලත් තමිල් මක්කල් පේරවෙයි (දෙමළ ජනතා සභාව) කෙටුම්පත් කළ යෝජනා එම සාකච්ඡාවට පදනම් කර ගැනීමයි.

මෛත්‍රී-රනිල් පාලන සමයේ කෙටුම්පත් කළ ඒකීය රාජ්‍යයත් බුද්ධාගමට ප්‍රමුඛස්ථානයත් සුරකින ව්‍යවස්ථාව ශ්‍රී ලංකාවේ අලුත් ආණ්ඩු ක්‍රම ව්‍යවස්ථාව ලෙස සම්මත කරගැනීමේ අභිලාෂය අනුර කුමාර දිසානායක ජනාධිපතිවරයාගේ රජය වෙතින් මේ වනවිට පලවී ඇත.

විශ්‍රාමික ශ්‍රේෂ්ඨාධිකරණ විනිසුරුවරයකු මෙන්ම හිටපු පාර්ලිමේන්තු මන්ත්‍රීවරයෙක්ද වන සී. වී. විග්නේෂ්වරන්ගේ නායකත්වයෙන් 2016 ජනවාරි 31 වැනිදා යාපනයේ වීරසිංහම් ශාලාවේදී එළි දැක්වු දෙමළ ජනතා සභාවේ යෝජනා අතර මුලිකම යෝජනාව වී තිබුනේ ශ්‍රී ලංකාව ෆෙඩරල් ජන රජයක් විය යුතු බවයි.

ජගත් මානව හිමිකම් දිනය දා මන්නාරමට ගොස් ටෙලෝ පක්ෂයේ නායක පාර්ලිමේන්තු මන්ත්‍රී සෙල්වම් අඩයික්කලනාදන් හමුවු දෙමළ ජාතික ජනතා පෙරමුණේ නායක පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් මාධ්‍යවේදීන් හා පවසා තිබුනේ නව ආණ්ඩුක්‍රම ව්‍යවස්ථාවක් සකස් කිරීම සම්බන්ධයෙන් පාර්ලිමේන්තුවට යෝජනා ඉදිරිපත් වන විට දෙමළ ජනතා නියෝජිතයන් ලෙස පාර්ලිමේන්තුව තුළ ක්‍රියා කළ යුතු ආකාරය සම්බන්ධයෙන් එදින සාකච්ඡා කළ බවයි.

“නව රජය නව ආණ්ඩුක්‍රම ව්‍යවස්ථාවක් ගෙන ඒමට අදහස් කරන මේ අවස්ථාවේදී ඒ ආණ්ඩුක්‍රම ව්‍යවස්ථාව ඒකීය රාජ්‍ය ආණ්ඩුක්‍රම ව්‍යවස්ථාවක් තමයි කියලා ප්‍රසිද්ධියේ ප්‍රකාශ කරලා තියන තත්වය තුළ ඒ විෂය පාර්ලිමේන්තුවේදී කොහොමද මුහුණ දෙන්න යන්නේ කියන එක ගැනත්, දෙමළ ජාතිකයන්ගේ ස්ථාවරය සම්බන්ධයෙන් අලුත් ව්‍යවස්ථාවක් ගේන වෙලාවේදී අපේ ස්ථාවරය කුමක් විය යුතුද කියන එක පිලිබදවත් අපි සාකච්ඡා කලා. ”

දෙමළ ජාතික ජනතා පෙරමුණේ නායක පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් පසුගිය සතියේ යාපනයේ පිහිටි ඉලංගෙයි තමිල් අරසු කච්චි (ITAK) නායක සිවඥානම් ශ්‍රී ධරන්ගේ නිවසේදී ඔහු මුණ ගැසී මේ සම්බන්ධයෙන් සාකච්ඡා පවත්වා තිබේ.

එම සාකච්ඡාව තුලදී අවධානයට ලක් වු කරුණු සම්බන්ධයෙන් මාධ්‍යවේදීන්ට පැහැදිලි කරමින් සිවඥානම් ශ්‍රීධරන් මන්ත්‍රීවරයා පවසා තිබුනේ දෙමළ ජනතා නියෝජිතයන් ඉල්ලා සිටින ෆෙඩරල් පාලන ක්‍රමය වෙනුවෙන් ඉදිරි මත විමසුමකදී දෙමළ ජනතාව ඡන්දය දීමේ වැදගත්කම එහිදී සාකච්ඡාවට ලක් වු බවයි.

“අලුත් ආණ්ඩුක්‍රම ව්‍යවස්ථාවක් ගෙනාවොත් ඒකීය රාජ්‍ය පදනම් වු විසඳුම් යෝජනාවක් ඉදිරිපත් කරන්න ආණ්ඩුව උත්සාහ කරයි. එහෙම ඒකීය රාජ්‍ය ක්‍රමය පිළිබදව යෝජනාව ඉදිරිපත් කරලා ඒක ජනමත විචාරණයකට ඇවිත් ජනමත විචාරණයේදී දෙමළ ජනතාව ඒකීය රාජ්‍ය ක්‍රමයට ඡන්දය දුන්නොත් ඒ ඡන්දය මත දෙමළ ජනතාව ෆෙඩරල් ක්‍රමය ප්‍රතික්ෂේප කරලා ඒකීය රාජ්‍ය දෙමළ ජනතාව පිලිගත්තා කියන ප්‍රවෘත්තිය තමයි එළියට එන්නේ. ඒ නිසා අපි ෆෙඩරල් වෙනුවෙන් සටන් කරමින් ඉන්නකොට මිනිස්සුන්ට දැනුවත් කිරීම් කරන්න ඕනේ.”

දෙමළ ජාතික ජනතා පෙරමුණේ නායක පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම්ගේ නායකත්වයෙන් ආරම්භ වී ඇති මෙම සාකච්ඡා මාලාව 2025 ජනවාරි මාසයේ සිට තවත් ඉදිරියට ගෙන යාමට නියමිතව ඇති බවයි උතුරු පළාත් වාර්තාකරුවන් පවසන්නේ.

තමිල් මක්කල් පේරවෙයි

2016 වසරේ යාපනයේදී එළි දැක්වු පිටු 44 කින් සමන්විත දෙමළ ජනතා සභා යෝජනා මාලාවේ සදහන්ව ඇත්තේ මෙරට ජාතික, වාර්ගික ගැටළු වලට ප්‍රධානම හේතුව ශ්‍රී ලංකාව සිංහල, බෞද්ධ රාජ්‍යයක් වීම බවයි.

බහු ජාතික ශ්‍රී ලංකා රාජ්‍යයක් ස්ථාපිත කළ යුතු බව යෝජනා කරන ඔවුන් එය තවදුරටත් පැහැදිලි කර තිබුනේ එය තුළ දෙමළ ජනතාවගේ පෞද්ගලිකත්වය සහ ඔවුන්ගේ ස්වයං නිර්ණ අයිතිය, මුස්ලිම් සහ මලයහ දෙමළ ජනතාවගේ දේශපාලන අභිලාෂයන් ද පිළිගත යුතු බවයි.

ජාත්‍යන්තර මැදිහත්වීම

නව ආණ්ඩුක්‍රම ව්‍යවස්ථාවක් සම්පාදන උත්සාහයට පෙර රජයේ දැක්ම පිළිබදව සිංහල, දෙමළ හා මුස්ලිම් ජනතාවගේ එකඟතාවයෙන් ගිවිසුමකට එළඹිය යුතු අතර එම ගිවිසුම තුන්වැනි පාර්ශවයක් ලෙස ඇමරිකාව හෝ ඉන්දියාව හෝ එක්සත් ජාතින්ගේ සංවිධානයේ නියෝජිතයන් ඉදිරියේ අත්සන් තැබිය යුතු බවයි එහි සදහන්ව ඇත්තේ.

එම ගිවිසුම තුළ දෙමළ ජාතිකයන් ජාතියක් ලෙස පිළි ගැනීම, ඔවුන්ගේ ස්වයං නිර්ණ අයිතිය, ෆෙඩරල් අධිකාරිය, සහ සාම්ප්‍රදායික දෙමළ නිජ බිම, වගවීම සහ යුක්තිය, දේශලන සිරකරුවන් නිදහස් කිරීම, හමුදා පාලනය යටතේ පවතින ඉඩම් නිදහස් කිරීම, අතුරුදහන් වුවන්ගේ ගැටළු , හමුදා කරණය නැවැත්විම, රජය විසින් සැලසුම් කර ඇති ආදර්ශ ගම්මාන ප්‍රශ්න, ආරක්ෂක අංශ ප්‍රතිව්‍යුහගත කිරීම හා මේ සියල්ල නැවත සිදු වීම වැලැක්වීම සම්බන්ධයෙන්ද එම ගිවිසුමේ කරුණු ඇතුලත් විය යුතු බව 2016 වසරේ යාපනයේදී එළි දැක්වු දෙමළ ජනතා සභා යෝජනා මාලාවේ ඇතුලත්ව තිබේ.

ශ්‍රී ලංකාව ෆෙඩරල් ජන රජයක් විය යුතු බව එහි පැහැදිලිව සදහන් කර ඇති අතර එය මධ්‍යම සහ ප්‍රාන්ත රජය ලෙස කොටස් දෙකකින් යුක්ත විය යුතුය.

1978 ආණ්ඩුක්‍රම ව්‍යවස්ථාවේ අර්ථ දක්වා ඇති පරිදි උතුරු නැගෙනහිර ඒකාබද්ධ කළ යුතු අතර ආණ්ඩුකාරවරයා පත් කිරීමේදී රටේ ජනාධිපතිවරයා පළාත් මහ ඇමැතිවරයාගේ උපදෙස් ලබා ගනිමින් එම පත් කිරීම කළ යුතු බව එහි සදහන්ව ඇත.

හදිසි තත්වයක් ප්‍රකාශයට පත් කිරීමේදී හැර අනෙක් අවස්ථාවලදී ආණ්ඩුකාරවරයාගේ පදවිය සම්ප්‍රදායානුකුල විය යුතු බව දෙමළ ජනතා සභාවේ යෝජනා මාලාවේ සදහන්ව තිබේ.

ජනපති සමග සාකච්ඡා

ජනාධිපති අනුර කුමාර දිසානායක සහ ඉලංගෙයි තමිල් අරසු කච්චි පාර්ලිමේන්තු මන්ත්‍රීවරුන් අතර දෙසැම්බර් 4 වැනිදා ජනාධිපති කාර්යාලයේදී පැවැති සාකච්ඡාවේ දී දෙමළ ජනයා බලාපොරොත්තු වන දේශපාලන විසඳුම මෙන්ම දීර්ඝ කාලයක සිට උතුරු නැගෙනහිර ජනතාව මුහුණ දෙමින් සිටින ගැටලු පිළිබඳවත් ජනාධිපතිවරයා දැනුවත් කළ බව ෂානක්කියන් රාසමාණික්කම් මන්ත්‍රීවරයා අගනගරයේ මාධ්‍යවේදීන්ට පවසා තිබුනි.

”අපි බලාපොරොත්තු වෙන්නේ ඒකාබද්ධ උතුරු-නැගෙනහිරක ෆෙඩරල් පාලනයක් පදනම් කරගත් දේශපාලන විසඳුමක්. අපේ පක්‍ෂයේ ස්ථාවරය විදියට අපි මේක කිව්වා.”

ඉදිරියේදී නව ආණ්ඩුක්‍රම ව්‍යවස්ථාව සකස් කරන විට දේශපාලන විසඳුම සම්බන්ධයෙන් දෙමළ ජනතා නියෝජිතයන් ඉදිරිපත් කළ ස්ථාවරය පිළිබදව තවදුරටත් විමසා බැලිය හැකි බව ජනාධිපතිවරයා සඳහන් කළේයැයි ෂානක්කියන් රාසමාණික්කම් මන්ත්‍රීවරයා අගනගරයේ මාධ්‍යවේදීන්ට දැනුම් දී තිබුනි.