ආණ්ඩුව විසින් වසංගත මර්දනය පවරා ඇති ශ්‍රී ලංකා යුද හමුදාවේ උසස් නිලධාරියෙක් ජාතිවාදී පරුෂ වචනයෙන් වෛද්‍ය කාර්ය මණ්ඩල ප්‍රධානියකුට ඇතුලු නිලධාරීන්ට බැණවැදී මරණ තර්ජන කිරීමත් සමග ත්‍රිවිධ හමුදාවේ විනය පිළිබදව රජයේ වෛද්‍ය නිලධාරීන්ගේ සංගමයට සැක සංකා මතුව තිබේ.
සෞඛ්‍ය අමාත්‍යවරිය වෙත ලිපියක් යොමු කරමින් රජයේ වෛද්‍ය නිලධාරීන්ගේ සංගමය විසින් දැනුම් දී ඇති පරිදි යුද හමුදාවේ යාන්ත්‍රික පාබල රෙජිමේන්තුවේ බ්‍රිගේඩියර් කේ.කේ.එස්. පැරකුම් විසින් වැලිඔය- සම්පත්නුවර දිස්ත්‍රික් රෝහලට පැමිණ එහි සිටි වෛද්‍ය කාර්ය මණ්ඩල ප්‍රධානියාට හා සෙසු නිලධාරීන්ට බැනවැදී මරණීය තර්ජන කර ඇත.
” බ්‍රිගේඩියර් කේ. කේ. එස්. පැරකුම් සම්පත්නුවර දිස්ත්‍රික් රෝහලට ගොස් එම ආයතනයේ ප්‍රධානියා සහ තවත් වෙනත් වෛද්‍ය නිලධාරීන් පිරිසක් හට “පර දෙමළා, ප්‍රභාකරන්, ත්‍රස්තවාදීන්, තොපි මරණවා. මේක මගේ ඒ්රියා එක” යනුවෙන් තර්ජනය කර ඇති බව ඔබට කනගාටුවෙන් දැනුම් දෙමි. ” රජයේ වෛද්‍ය නිලධාරීන්ගේ සංගමයේ ප්‍රධාන ලේකම් වෛද්‍ය ශෙනාල් ප්‍රනාන්දු සෞඛ්‍ය අමාත්‍ය පවිත්‍රා වන්නිආරච්චිට ඔක්තෝබර් 28 යොමු කළ ලිපියේ ඉහලින්ම සදහන් කර තිබේ.
ජනාධිපති ලේකම්, අග්‍රාමාත්‍ය ලේකම්, ආරක්ෂක ලේකම්, සෞඛ්‍ය ලේකම් හා යුද හමුදාපති ඇතුලු බලධාරීන් කිහිප දෙනකු වෙතම පිටපත් යොමු කරමින් රජයේ වෛද්‍ය නිලධාරීන්ගේ සංගමය සෞඛ්‍ය අමාත්‍යවරියට යොමු කල එම ලිපියේ වැඩි දුරටත් සදහන් කර ඇත්තේ මේ සම්බන්ධයෙන් ඔක්තෝබර් 26 දින යුද හමුදාපතිවරයාද දැනුවත් කර තිබෙන බවයි.
යුද සමයේදී රජයේ වෛද්‍ය නිලධාරීන් ආරක්ෂක අංශ වෙත ලබා දුන් සහයෝගයත් එම ලිපියෙන් සිහිපත් කර දී තිබේ.
“අපගේ මව්බිමෙහි ත්‍රස්තවාදයට එරෙහිව සටන් කිරීම සඳහා සන්නද්ධ හමුදාවන්ට සහ පොලිසියට සදාචාරාත්මක හා වෛද්‍යමය සහාය ලබා දීම සහතික කිරීම සඳහා යුද්ධය අතරතුර කාලයේ දී අපගේ සියලුම වෛද්‍යවරු හමුදාවට ගෞරවයෙන් සැලකූ බව අපි සිහිපත් කරමු.”
කෙසේ වෙතත්, බ්‍රිගේඩියර් කේ. කේ. එස්. පැරකුම්ගේ හැසිරීම ත්‍රිවිධ හමුදාවේ විනය පිළිබඳ අපේක්ෂිත ප්‍රමිතීන්ට අනුකූල නොවන අතර, එය වෛද්‍යවරුන්ගේ සහ සෙසු පුරවැසියන්ගේ ගෞරවය සහතික කිරීමට ද අපොහොසත්ව තිබෙන බවයි රජයේ වෛද්‍ය නිලධාරීන්ගේ සංගමය පවසන්නේ.
සම්පත්නුවර දිස්ත්‍රික් රෝහලේ තත්වය නිවැරදි කර නොමැති බැවින්, වෛද්‍ය සාමාජිකයන්ගේ ආරක්ෂාව සැලකිල්ලට ගනිමින් වෘත්තීය සමිති පියවරක් ලෙස සම්පත්නුවර දිස්ත්‍රික් රෝහලේ සේවාවන්ගෙන් ඉවත් වීමට සිදුව ඇති බවත් එම ලිපිය මගින් බලධාරීන්ට දන්වා තිබේ.
රෝගීන්ගේ යහපත උදෙසා මෙම ආයතනය තුළ සේවය කිරීමට අවශ්‍ය ආරක්ෂිත තත්වයන් සහතික කිරීම සඳහා, අවශ්‍ය පියවර ගන්නා ලෙස වෛද්‍ය ශෙනාල් ප්‍රනාන්දු සෞඛ්‍ය අමාත්‍යවරියගෙන් ඉල්ලා ඇත.
යුද සමයේ GMOA සහාය
වෛද්‍ය ශෙනාල් ප්‍රනාන්දු පවසන පරිදි, යුද සමයේදී රජයේ වෛද්‍ය නිලධාරීන්ගේ සංගමය සන්නද්ධ හමුදාවන්ට සහ පොලිසියට සදාචාරාත්මක හා වෛද්‍යමය සහාය ලබා දී තිබුනත්, එම සමයේදී වෛද්‍යවරුන් ඇතුලු රෝහල් කාර්ය මණ්ඩලයේත් රෝගීන්ගේත් ජීවිත අනතුරේ තිබියදී ඒ සම්බන්ධයෙන් කිසිදු මැදිහත් වීමක් නොකිරීම සම්බන්ධයෙන් රජයේ වෛද්‍ය නිලධාරීන්ගේ සංගමය වෙතත් චෝදනා එල්ල වී තිබේ.
වෛද්‍යවරුන් ඇතුලු රෝහල් කාර්ය මණ්ඩලයේත් රෝගීන්ගේත් ජීවිත අනතුරේ හෙලමින් ශ්‍රී ලංකාවේ සිවිල් යුද්ධයේ අවසාන කාල පරිච්ඡේදය තුලදී වන්නි පළාතේ රෝහල් වලට බර අවි ප්‍රහාර ගසද්දී තමන් වෙනුවෙන් රජයේ වෛද්‍ය නිලධාරීන්ගේ සංගමය (GMOA) කිසිදු මැදිහත් වීමක් නොකළ බව යුද කලාපයේ සේවය කළ ජ්‍යෙෂ්ඨතම රජයේ වෛද්‍යවරයෙක් සිව් වසරකට ඉහත දී හෙළි කර තිබුනි.
බෝම්බ ප්‍රහාර වලට ලක් වෙමින් දිවි නොතකා යුද පීඩිත භූමීයේ සේවය කළ තමන් ඇතුලු වෛද්‍ය වරුන් සීමිත පිරිසගේ ආරක්ෂාව වෙනුවෙන් පියවර ගැනීමේ වගකීම වෛද්‍ය සංගමය විසින් පැහැර හරින ලද බව ලන්ඩනයේ රුපවාහිනී මැදිරියක දී විශේෂ සාකච්ඡාවකට එක්වෙමින් මුලතිව් දිස්ත්‍රික්කයේ හිටපු ප්‍රාදේශීය සෞඛ්‍ය අධ්‍යක්ෂ තුරෙයිරාජා වර්ධරාජා ප්‍රකාශ කර තිබුනි.
එම අනාවරණය පහත යොමුවෙන් අවශ්‍ය අයකුට බලා ගත හැක.
Facebook Comments
