යුද්ධය නිසා දෑත් වල ලේ ගෑවී ඇතැයි රජයට චෝදනා කරන උතුරේ විශ්ව විද්‍යාල ශිෂ්‍ය සංගම් නායකයෙක් අලුතින් දියත් කර ඇති “ක්ලීන් ශ්‍රී ලංකා” වැඩසටහන එම පැල්ලම් පිරිසිදු කිරීමට යොදා ගන්නා ලෙස ඉල්ලා තිබේ.
“ශ්‍රී ලංකාවේ ආණ්ඩුව සංහිඳියාව ගැන වැඩියෙන් කතා කරනවා. මේ රජය “ක්ලීන් ශ්‍රී ලංකා” නමින් නව වැඩ පිළිවෙලක් මේ රටේ ක්‍රියාත්මක කරනවා. වර්ග සංහාරය වෙනුවෙන් එක ජාතියක් මත බලෙන් පැටවු යුද්ධය නිසා මේ රජයේ අත්වලත් ලේ පැල්ලම් තැවරිලා තියනවා. ඒක සුද්ද කරගන්න කියලා රජයෙන් ඉල්ලා සිටීමට ශිෂ්‍ය ප්‍රජාව හැටියට අපි කැපවී සිටිනවා.”
යාපනය විශ්ව විද්‍යාල ශිෂ්‍ය සංගමයේ ලේකම් එස්. සිවගජෙන් පවසන්නේ ක්ලීන් ශ්‍රී ලංකා වැඩ සටහන තුලින් මිනිසුන්ගේ සිත් තුළ ඇති කැළැල් සහ තුවාල අවම කිරීමට ද කටයුතු කළ යුතුයි.
“ක්ලීන් ශ්‍රී ලංකා” කියන එකෙන් පාරවල් පිරිසිදු කිරීම සහ සුද්ද පවිත්‍ර කිරීම කියන එක විතරක් රජයේ ඉලක්කය නොවිය යුතුයි. එය සෑම විටම මිනිසුන්ගේ සිත් තුළ ඇති කැළැල් සහ තුවාල අවම කිරීමට කටයුතු කළ යුතුයි. ඒකත් මේ රටේ සුද්ද කරන්න පුළුවන් එක ක්‍රියාවක් තමයි.”
ශිෂ්‍ය සංගම් නායකයා ඒ බව සඳහන් කළේ ත්‍රස්තවාදය වැළැක්වීමේ පනත යටතේ අත්අඩංගුවට ගෙන දීර්ඝ කාලීනව රඳවාගෙන සිටින දෙමළ දේශපාලන සිරකරුවන් සහ පුනරුත්ථාපනය කර සමාජ ගත කිරීමෙන් පසුවත් යළිත් අත්අඩංගුවට ගෙන සිර ගත කර සිටින හිටපු සටන්කාමීන් නිදහස් කරන ලෙස ඉල්ලා ජනාධිපතිවරයාට බාර දීම වෙනුවෙන්, යාපනයේ විශ්ව විද්‍යාල සිසුන්ගෙන් ලබා ගත් අත්සන් සටන්කාමීන්ගේ සුබසාධන සංගමයට බාර දීමෙන් පසු මාධ්‍ය වෙත අදහස් දක්වමිනි.
සුළු ජාතීන්ට එරෙහිව අසමානුපාතිකව යොදාගන්නා බවට දේශීය හා විදේශීය වශයෙන් දැඩි ලෙස දෝෂ දර්ශනයට ලක්ව තිබෙන ත්‍රස්තවාදය වැළැක්වීමේ පනත අහෝසි කිරීමට කටයුතු කරන ලෙසත් ඉල්ලා සටන්කාමීන්ගේ සුබසාධන සංගමය උතුරේ දිස්ත්‍රික්ක මට්ටමින් ලබා ගන්නා අත්සන් ව්‍යපාරයට සමගාමීව යාපනය සරසවි සිසුන් ජනවාරි 6 වැනි සදුදා ඊට අත්සන් තබා තිබුනි.
වර්ග සංහාර යුද අපරාධයට මේ රජයද වගකිව යුතු බවට චෝදනා කළ ශිෂ්‍ය සංගම් නායකයා මාධ්‍යවේදීන් හමුවේ වැඩි දුරටත් කියා තිබුනේ යුද පීඩිත දෙමළ ජනයාගේ සිත් තුළ ඇති කනස්සල්ල නැති කිරීමටත් මේ ආණ්ඩුව ඉදිරිපත් විය යුතු බවයි.
“මේ අයගේ සිත්වල කඳුළ, දුක එකතුවෙලා, මිනිස්සුන්ගේ හිත් කුනුවෙලා තියෙන්නේ. ඒකත් සුද්ද කරන්න මේ ආණ්ඩුව ඉදිරිපත් වෙන්න ඕන. රජයට එරෙහිව එල්ල වී ඇති වර්ග සංහාරයේ යුද අපරාධයට මේ රජය වග කිව යුතුයි.”
“ක්ලීන් ශ්‍රී ලංකා” වැඩසටහන ආරම්භ කිරීම වෙනුවෙන් ජනාධිපති කාර්යාලයේ දී 2025 ජනවාරි 1 වැනිදා පැවති උත්සවය අමතමින් අවධාරණය කර තිබුනේ එම වැඩ සටහනට ජනතාව ඒකරාශී කර ගැනීම සඳහා ක්ලීන් ශ්‍රී ලංකා සභා ගම දක්වාම ගොඩනැගීමට අපේක්ෂා කරන බවයි.
“මෙහි අවසානය කවදාද? මේ ව්‍යාපෘතිය අවසන් වන ව්‍යාපෘතියක් නොවෙයි. එය නැවත නැවත අලුත් වන, නැවත නැවත ලෝකයේ ඇති වන අලුත් තත්ත්වයන්ට අනුරූප වන පරිදි රාජ්‍යය ප්‍රතිස්ථාපනය කරන සමාජයක නගා සිටු වන වැඩසටහනක්. මේක අවුරුද්දක දෙකක ව්‍යාපෘතියක් නෙවෙයි. ව්‍යාපෘතියක් නම් මේක එක තැනක නතර වෙන ලෝකෙකට ඒකාබද්ධ කරන්න පුළුවන්.”
නව ශ්‍රී ලාංකේය ජාතියක් සහ රට ගොඩනැගීම වෙනුවෙන් බව පවසමින්, ක්ලීන් ශ්‍රී ලංකා වැඩ සටහන සදහා වෙනම අරමුදලක් පිහිටුවීමටත් ජනාධිපති අනුර කුමාර දිසානායක කටයුතු කර තිබුනි.
Facebook Comments
