රොහින්ග්‍යා අනාථයන් ආපසු යවනවාදැයි ආණ්ඩුවට ‘දැන්ම කියන්න බෑ’

මුලතිව් මුහුදේ අතරමංව සිටියදී යුද පීඩිත ධීවරයන් විසින් පසුගිය මාසයේ බේරාගෙන රජයට බාරදීමෙන් පසු මුලතිව් ගුවන් හමුදා කඳවුරේ රඳවාගෙන සිටින මියන්මාරයෙන් පලායන රොහින්ග්‍යා යුද අනාථයන් සම්බන්ධයෙන් ආණ්ඩුව ගන්නා පියවර රටට හෙළි කිරීමෙන් වැලකී සිටීමට ආණ්ඩුවේ නිල ප්‍රකාශකයා ප්‍රවේශම් වී තිබේ.

මුලතිව් ගුවන් හමුදා කඳවුරේ රඳවාගෙන සිටින මියන්මාරයෙන් පලායන රොහින්ග්‍යා යුද අනාථයන් එරටටම ආපසු යවන බව මහජන ආරක්ෂක අමාත්‍ය ආනන්ද විජේපාල ප්‍රකාශ කර තිබියදී රජය ඒ සම්බන්ධයෙන් ගෙන ඇති තීන්දුව ‘දැන්ම කියන්න බැරි’ බවයි අමාත්‍ය මණ්ඩල ප්‍රකාශක දොස්තර නලින්ද ජයතිස්ස පවසන්නේ.

මහජන ආරක්ෂක සහ පාර්ලිමේන්තු කටයුතු අමාත්‍යවරයා ඉංග්‍රීසි පුවත්පතකට ප්‍රකාශ කර තිබුනේ රජයේ සැලසුම ඔවුන් මියන්මාරයටම ආපසු යැවීම බවයි. රොහින්ග්‍යාවරුන් පිරිසේ නම් ලැයිස්තු එම ආණ්ඩුවට ලබාදී ඇති බවත් ආනන්ද විජේපාල අමාත්‍යවරයා වැඩි දුරටත් පවසා තිබුනි.

මහජන ආරක්ෂක අමාත්‍ය ආනන්ද විජේපාලගේ එම ප්‍රකාශයට සිවිල් සමාජ ක්‍රියාධරයන් මෙන්ම දේශපාලනඥයන්ද දැඩි විරෝධය පළ කර තිබුනි.

සති තුනකට ඉහතදී ශ්‍රී ලංකාවට පැමිණි අනාථයන් 115 දෙනා මේ වනවිට රඳවා සිටින්නේ මුලතිව් ගුවන් හමුදා කඳවුරේය. ඔවුන් පැමිණි යාත්‍රාව පදවාගෙන පැමිණි බවට සැක කොට රක්ෂිත බන්ධනාගාර ගතකොට සිට 2025 ජනවාරි 7 වැනි බදාදා ත්‍රිකුණාමලය මහේස්ත්‍රාත් අධිකරණය විසින් නිදහස් කරන ලද 12 දෙනකුද ඒ අතර වෙයි.

ඔවුන් අතර දරු දැරියන් හතලිහකට වැඩි සංඛ්‍යාවක් ඉන්නා බව ශ්‍රී ලංකා මානව හිමිකම් කොමිසම නිවේදනය කර ඇත. ඔවුන්ගේ අපේක්ෂාව ආරක්‍ෂිත රටක දේශපාලන රැකවරණ ලබාගැනීමයි.

රොහින්ග්‍යා යුද අනාථයන් පිටමං කිරීම සම්බන්ධයෙන් රජයේ ප්‍රවෘත්ති දෙපාර්තමේන්තුවේ ජනවාරි 7 වැනි අඟහරුවාදා පැවැති කැබිනට් තීරණ දැනුම් දීමේ මාධ්‍ය සාකච්ඡාවේදී මාධ්‍යවේදීන් කළ ප්‍රශ්න කිරීම් හමුවේ අමාත්‍ය මණ්ඩල ප්‍රකාශක දොස්තර නලින්ද ජයතිස්ස සදහන් කළේ රජය ගන්නා තීන්දුව මේ මොහොතේ ප්‍රකාශ කළ නොහැකි බවයි.

“මට ඒ ගැන මේ වෙලාවේ කියන්න බෑ. ගන්න තීන්දුව මොකක්ද කියන එක. නමුත් ඒ සියළු කාරණා සලකා බලමින් තමයි, අපි කටයුතු කරන්නේ, මානුෂිකත්වයත්, ජාතික ආරක්ෂාවත්, කලාපීය ආරක්ෂාවත් කියන සියළු කරුණු අපි මේකෙදී අවධානයට යොමු කරනවා.”

වත්මන් ජනාධිපතිවරයාගේ පාලන කාලයේ රටට ඇතුළු වු මුල්ම සරණාගත පිරිස සම්බන්ධයෙන් ගන්නා ඉදිරි ක්‍රියාමාර්ග සම්බන්ධයෙන් මහජන ආරක්ෂාව භාර අමාත්‍යවරයාගේ ප්‍රකාශයට පරස්පර අදහසක් පලකළ අමාත්‍ය නලින්ද ජයතිස්ස එහිදි වැඩි දුරටත් පවසා තිබුනේ ආරක්ෂක අමාත්‍යාංශයත්, විදේශ අමාත්‍යාංශයත් එක්ව කටයුතු කරමින් සිටින බවයි.

“මෙම සංක්‍රමණිකයන් සම්බන්ධයෙන් ආරක්ෂක අමාත්‍යාංශයත්, විදේශ අමාත්‍යාංශයත් එක්ව කටයුතු කරමින් ඉන්නේ. අපි දන්නවා මේක ඉතාම ප්‍රවේශමෙන් කටයුතු කළ යුතු ප්‍රශ්නයක්. ඒ ජනතාවගේ මානව හිමිකම්, මානුෂිකත්වය ආරක්ෂා කරන අතර අතරෙදී, මේ කලාපීය ආරක්ෂාව පිළිබදවත් අපි සැලකිලිමත් වෙමින් තමයි අපි මේ ප්‍රශ්නයට මැදිහත් වෙන්නේ, සියළු කාරණා සලකා බලමින්.”

රොහින්ග්‍යා යුද අනාථයන් සම්බන්ධයෙන් ජනාධිපතිවරයා අවධානය යොමු කරමින් සිටින බව ඔහු වැඩි දුරටත් සදහන් කළ ඔහු මහජන ආරක්ෂක අමාත්‍යාංශය ගැන සඳහන් කළේ නැත.

“ඒ නිසා මට ඔබට කියන්න පුළුවන් මේ සම්බන්ධයෙන් ඇත්තටම රජය විශාල වශයෙන් අවධානය යොමු කළා. මේ කැබිනට් ඒකේ නෙමෙයි, කලින් කැබිනට් එකෙත් අපි මේක සාකච්ඡා කරලා තියනවා. ඒ අනුව විදේශ අමාත්‍යවරයා සහ ආරක්ෂක අමාත්‍යවරයා හැටියට ජනාධිපතිවරයාත් මේ ගැන අවධානය යොමු කරමින් කටයුතු කරමින් යනවා මේ සංක්‍රමණිකයන් සම්බන්ධයෙන්.”

රොහින්ග්‍යාවරුන් පිරිස පිටමං නොකරන ලෙස පාර්ලිමේන්තුවේදී කියා සිටි විපක්ෂ නායක සජිත් ප්‍රේමදාස “එවන් අමානුෂීය ක්‍රියාවලියකට යොමු වෙන්න එපා,” යි ආයාචනය කළේය.

මුලතිව් මුහුදේ අතරමංව සිටියදී යුද පීඩිත ධීවරයන් විසින් පසුගිය මාසයේ බේරාගෙන රජයට බාරදීමෙන් පසු මේ වන විට මුලතිව් ගුවන් හමුදා කඳවුරේ රඳවාගෙන සිටින රොහින්ග්‍යා සරණාගතයන් පිරිස ආපසු මියන්මාරයට පිටමං නොකරන ලෙස විපක්ෂ මන්ත්‍රී මුජිබුර් රහුමාන් ද ජනාධිපතිවරයාට ලිපියක් යොමු කරමින් පසුගියදා ඉල්ලා තිබුනි.

එපමණක් නොව ඔවුන් මියන්මාරයට යැවීම යම් රටකදී අනතුරකට ගොදුරු වීමේ අවදානමක් සහිත පුද්ගලයන් ඔවුන්ගේ කැමැත්තෙන් තොරව එම රටටම ආපසු යැවීමෙන් වැළකී සිටීමේ (Non-Refoulement) ජාත්‍යන්තර නෛතික මුලධර්මයටද හරස්ව යාමක් බවත් විපක්ෂයේ මන්ත්‍රීවරයා ජනාධිපතිවරයාට දැනුම් දී ඇත.

වත්මන් ජනාධිපතිවරයාගේ පාලන කාලයේ රටට ඇතුළු වු මුල්ම සරණාගත පිරිස බලහත්කාරයෙන් පිටමං කිරීම මාර මුඛයට යැවීමක් ලෙස හඳුන්වන විපක්ෂ මන්ත්‍රීවරයා එමගින් ලෝකයා හමුවේ රටේ කීර්ති නාමයට අත්විය හැකි ඉරණම ගැනද ජනාධිපති අනුර කුමාර දිසානායකට අනතුරු අඟවා තිබේ.

රොහින්ග්‍යාවරුන් මියන්මාරයට ආපසු යැවීම ඔවුන්ගේ ජීවිත අනතුරේ හෙලීමක් පමණක් නොව, සරණාගතයන් පිළිබඳ එක්සත් ජාතීන්ගේ 1951ප්‍රඥප්තිය ඇතුළු මානුෂික මූලධර්ම සහ ජාත්‍යන්තර නෛතික වගකීම් උල්ලංඝනයක් වන බව යෝනක ඉස්ලාමීය සංස්කෘතික නිකේතනයේ සභාපති ඔමාර් කමිල් විසින් විදේශ අමාත්‍ය විජිත හේරත් වෙත යවා ඇති ලිපියක දැක්වේ.