යුද පීඩිත මන්නාරමේ සමූහ සුසාන දෙකක පරීක්ෂණ තවත් ඉදිරියට

එකොලොස් වසරකට ඉහත දී මන්නාරමෙන් අහඹු ලෙස හමු වු මිනි වලකින් ගොඩගත් අස්ථි කොටස් කිහිපයක් සම්බන්ධයෙන් වාර්තා විශේෂඥ අධිකරණ වෛද්‍ය නිලධාරියා විසින් උසාවියට ඉදිරිපත් කර ඇති අතර, ශ්‍රී ලංකාවේ මෙතෙක් හමුවූ දැවැන්තම සමූහ සුසානයෙන් ගොඩ ගත් අස්ථි කොටස් තොගයක් පරීක්ෂණ සදහා අධිකරණ වෛද්‍ය නිලධාරියා වෙත බාර දී තිබේ.

බලහත්කාරයෙන් අතුරුදහන් කළවුන් වෙනුවෙන් පෙනී සිටින නීතිඥවරයා මන්නාරමේදී මාධ්‍ය හමුවක් පවත්වමින් එම තොරතුරු අනාවරණය කර කළේ තිරුකේතීස්වරම් හා සතොස සමුහ මිනි වලවල් දෙක සම්බන්ධ නඩු 2025 ජනවාරි 09 වැනිදා අධිකරණයේ විභාගයට ගැනිමෙන් අනතුරුවයි.

නීතිඥ ශාන්තිප්‍රගාසම් නිරංජන් සදහන් කරන්නේ තිරුකේතීස්වරම් සමුහ සුසානයෙන් ගොඩගත් මිනිස් සිරුරු නියැදි 27 ක ස්ත්‍රී පුරුෂ භාවය, වයස ආදී තොරතුරු ඇතුලත් වාර්තාවක් විශේෂඥ අධිකරණ වෛද්‍ය නිලධාරි සුනිල් හේවගේ විසින් අධිකරණයට ඉදිරිපත් කළ බවයි.

“කොළඹ අධිකරණ වෛද්‍ය නිලධාරි සුනිල් හේවගේ විසින් විශ්ලේෂණය කරන ලද මිනිස් අස්ථි කොටස් 27 ක් සඳහා වාර්තා අද අධිකරණයට ඉදිරිපත් කරලා තියනවා. වයස, ස්ත්‍රී පුරුෂ භාවය, මරණයට හේතුව ආදිය ඇතුළත් වාර්තාව අද ඉදිරිපත් කරලා තියනවා. ඉතිරි මිනිස් අස්ථි කොටස් සම්බන්ධයෙන් වාර්තාව මාස හයකින් ඉදිරිපත් කරන බව අධිකරණයට දැනුම් දුන්නා.”

මාර්තු 12 වැනිදා එම නඩුව යළි කැදවීමට නියමිතව තිබේ.

2013 වසරේ දෙසැම්බර් 17 වැනිදා මන්නාරම, තිරුකේතීස්වරම් සමූහ මිනී වල හමු විය. දෙසැම්බර් 20 වැනිදා මන්නාරම පොලීසිය විසින් ඒ සම්බන්ධයෙන් මන්නාරම මහේස්ත්‍රාත් අධිකරණයට කරුණු වාර්තා කරමින් නඩුවක් ගොනු කළ අතර අධිකරණ නියෝග පරිදි සිදු කළ කැනීම හමුවේ මිනිස් සිරුරු 82 ක අස්ථි කොටස් ගොඩ ගෙන තිබුනි.

සතොස අස්ථි අධිකරණ නිලධාරියාට බාර දෙයි

නීතිඥ ශාන්තිප්‍රගාසම් නිරංජන් පවසන්නේ හය අවුරුද්දකට ඉහතදී ශ්‍රී ලංකාවෙන් සොයා ගත් විශාලතම සමුහ මිනී වලෙන් ගොඩගත් අස්ථි කොටස් අසුරා ඇති පෙට්ටි 80 ක් අද දිනයේ විශ්ලේෂණය සදහා අධිකරණ වෛද්‍ය නිලධාරි කන්දයියා ප්‍රනවන් වෙත භාර දුන් බවයි.

“ගොඩගත් අස්ථි කොටස් අධිකරණ වෛද්‍ය නිලධාරි වෙත බාර දුන්නා. අංක 76 සිට 156 දක්වා වන පෙට්ටි 80 ක් අධිකරණ වෛද්‍ය නිලධාරීන්ගේ වැඩිදුර විශ්ලේෂණය සඳහා අධිකරණය විසින් භාර දුන්නා. මේ සම්බන්ධයෙන් වාර්තාවක් අධිකරණයට ඉදිරිපත් කිරීමට නියමිතයි.”

එම අස්ථි කොටස් පරීක්ෂා කිරීමෙන් අනතුරුව ඒවා අයත් පුද්ගලයන්ගේ මරණයට හේතුව, වයස, ස්ත්‍රී පුරුෂ භාවය සහ කිසියම් අපරාධයකට සම්බන්ධයක් තිබේද යන කරුණු ඇතුලත් වාර්තාවක් යාපනයේ අධිකරණ වෛද්‍ය නිලධාරි කන්දයියා ප්‍රනවන් විසින් ඉදිරියේදී අධිකරණයට දැනුම් දීමට නියමිත බව පවසන නීතිඥවරයා තව දුරටත් කියා සිටියේ ඉතිරි අස්ථි කොටස් අසුරා ඇති පෙට්ටි 75 ජනවාරි 10 වැනි සිකුරාදා දිනයේදී අධිකරණය විසින් අධිකරණ වෛද්‍ය නිලධාරි කන්දයියා ප්‍රනවන් වෙත බාර දීමට නියමිතව ඇති බවයි.

2018 වසරේ ඉදිකිරීම් කටයුත්තකදී හඳුනාගත් මන්නාරම සතොස සමුහ මිනී වලේ පසුව කළ කැනීම් වලදී බාල දරුවන් 28ක ඇතුළු මිනිස් සිරුරු කොටස් 376 ක් සොයාගෙන තිබුනි.

අපරාධයක් සිදුවූ ස්ථානයක් ලෙස තීන්දු කරමින් මන්නාරම සතොස සමුහ මිනීවලේ කැනීම් කටයුතු සිදුකෙරෙන බව වෝහාරික විශේෂඥ සමින්ද රාජපක්ෂ විමර්ශන කටයුතු සිදු කළ 190 වැනි දිනයේදී මාධ්‍යවේදීන්ට කියා තිබුනි.

මන්නාරම සතොස සමූහ මිනීවලෙන් ගොඩගත් අස්ථි කොටස් හයක් පරීක්ෂා කළ ෆ්ලොරීඩාවේ, මියාමි හි පිහිටි බීටා ඇනලිටික්ස් ආයතනය විසින් නිගමනය කොට තිබුනේ ඒවා ක්‍රිස්තු වර්ෂ 1404 ත් 1635 ත් අතර සියවස් ගණනක කාල පරාසයකට අයත් බවය.

එම නිගමනය දැඩි ලෙස ප්‍රතික්ෂේප කරන කැළණිය විශ්ව විද්‍යාලයට අනුබද්ධිත පුරාවිද්‍යා පශ්චාත් අධ්‍යයන අංශයේ මහාචාර්ය රාජ් සෝමදේව සමූහ මිනිවලේ කාලය පිළිබඳ විශ්වසනීය නිගමනයකට එළැඹිය හැකි මිනිස් අස්ථි කොටස් සමගින් ගොඩගෙන ඇති භාණ්ඩ සිය ගණනක් සම්බන්ධයෙන් 2019 ජූලි මාසයේ අලුතින් පරීක්ෂණ ආරම්භ කර තිබුණි.

ඒ වන විට හමුවූ ඇටකටු අතරින් සමහරක ගැඹුරු කැපුම් තුවාල දැකගත හැකි වූ අතර එකට ගැටගසා තිබුණු ආකාරයක් දිස්වන අස්ථි කොටස් ද සමූහ මිනී වලෙන් සොයා ගෙන තිබුණි.