මාධ්‍යවේදී ප්‍රගීත් එක්නැලිගොඩ පැහැරගෙන යාම සම්බන්ධයෙන් චෝදනා එල්ලවී ඇති හමුදා බුද්ධි අංශ සාමාජිකයින් සිව් දෙනෙකුට අවිස්සාවේල්ල මහාධිකරණය විසින් ඇප නියම කර තිබේ.
ඒ 19 වන සදුදා එම නඩුව අවිස්සාවේල්ල මහාධිකරණයේදී විභාගවූ අවස්ථාවේදී ය.
මෙලෙස ඇප නියම වී ඇත්තේ ලුතිනන් චමින්ද කුමාර,මාණ්ඩලික සැරයන් එස්.එම් කණිෂ්ක ගුණරත්න, මාණ්ඩලික සැරයන් අයියසාමි බාලසුබ්‍රමනියම්,සැරයන් ඩී.ජී තරංග ප්‍රසාද් ගමගේ යන පිරිසට බවයි ගගන වාර්තාකරු පැවසුවේ.
එහිදී එක් සැකකරුවෙකුට රු.ලක්ෂ 30 බැගින්වූ ශරීර ඇප 2ක් හා රුපියල් ලක්ෂ 05 බැගින්වූ මුදල් ඇප 4ක් සමග මුදාහැරීමට අවිස්සාවේල්ල මහාධිකරණය විසින් නියෝග කර තිබේ.
එම සැකකරුවන් සෑම මසකම ඉරිදා දිනවල අපරාධ පරීක්ෂණ දෙපාර්තමේන්තුව හමුවේ පෙනී සිටින ලෙස ද අධිකරණය විසින් නියෝග කර තිබේ.
හමුදා නිළධාරින් වගකිව යුතු බවට සාක්ෂි
මාධ්‍යවේදී ප්‍රගීත් එක්නැලිගොඩ පැහැරගෙන යාම සම්බන්ධයෙන් දැනට අත්අඩංගුවේ පසුවන හමුදා නිළධාරින් වගකිව යුතු බවට සාක්ෂි හෙළිදරව් වී තිබෙන්නේ යැයි අපරාධ පරික්ෂණ දෙපාර්තමේන්තුව විසින් අධිකරණය වෙත දැනුම් දී තිබේ.
ඒ, අපරාධ පරික්ෂණ දෙපාර්තමේන්තුවේ සහකාර පොලිස් අධිකාරි ශානි අබේසේකර විසින් ප්‍රදීප් එක්නැලිගොඩ අතුරුදහන් කිරිම සම්බන්ධයෙන් හෝමාගම මහේස්ත්‍රාත් රංග දසනායක වෙත පෙබරවාරි 10 දා ඉදිරිපත් කළ වාර්තාවක් මගිනි.
එම වාර්තාවට අනුව එක් අයකු හැර අනිකුත් සැකකාර හමුදා නිළධාරින් 2010 ජනවාරි මස 25 දා අක්කරෙයිපත්තුවේ කෝමාරි ප්‍රදේශයේ සිටි බවට දුරකතන වාර්තා මගින් හෙළිවී තිබේ.
මීට ඉහත දී පොලිසිය විසින් අධිකරණයට දැනුම් දුන් පරිදි අතුරුදහන් වීමෙන් පසු ප්‍රගීත් ගිරිතලේ හමුදා කඳවුරට ගෙනගොස් තිබුණි.
හමුදා බුද්ධි නිළධාරින්
ප්‍රදීප් එක්නැලිගොඩ 2010 ජනවාරි මස 24 වැනි දින කොළඹට තදාසන්න ප්‍රදේශයකදි පැහැර ගෙන ගොස් අතුරුදහන් කිරීම සම්බන්ධයෙන් චෝදනා ලැබ සිටිනුයේ යුද හමුදා බුද්ධි බලකායේ ලුතිනන් කර්නල් ප්‍රබෝධ සිරිවර්ධන, ලුතිනන් කර්නල් අර්ජුන කුමාරරත්න, මාණ්ඩලික සැරයන්වරුන් වන ප්‍රියන්ත කුමාර, කණිෂ්ක ගුණරත්න, ප්‍රියන්ත ඩිලන්ජය, චමින්ද කුමාර සහ රවින්ද්‍ර රූපසිංහ යන සත් දෙනාය.
(Radiogagana)
Facebook Comments
