මරා දැමූ මාධ්‍යවේදීන් වෙනුවෙන් දකුණේත්, නැගෙනහිරත් සමරු

දහසය වසරකට ඉහත දී ඝාතනයට ලක් වූ සන්ඩේ ලීඩර් පුවත්පතේ ආරම්භක කර්තෘවරයා සිහිපත් කරමින් අගනගරයේදී මෙන්ම නැගෙනහිරදීද අනුස්මරණ පවත්වා තිබේ.

ඝාතනයට ලක් වු ශ්‍රී ලංකාවේ මාධ්‍යවේදීන් අනුස්මරණය උදෙසා මඩකලපුව ගාන්ධි උද්‍යානය ඉදිරිපිට ස්ථාපිත කර තිබෙන ස්මාරකය අසලදී ජනවාරි 8 වැනිදා මාධ්‍යවේදී ලසන්ත වික්‍රමතුංගගේ ඡායාරූපයකට මලින් පහනින් උපහාර දැක්වු දෙමළ ජනමාධ්‍යවේදීන් ප්‍රදේශයේ දේශපාලනඥයන් කිහිප දෙනෙකුද සමග එක්ව පසුගිය සමයේ ඝාතනයට ලක්වු සියළු මාධ්‍යවේදීන් වෙනුවෙන් යුක්තිය ඉල්ලා විරෝධතාවයක්ද දියත් කර තිබේ.

ශ්‍රී ලංකාවේ මාධ්‍යවේදීන් වැඩිම පිරිසක් ඝාතනය කරන ලද මේ මාසය නම්කර ඇත්තේ ‘කළු ජනවාරිය’ ලෙසය.

නැගෙනහිර ලංකා ප්‍රවෘත්ති වාර්තාකරුවන්ගේ සංගමය, මඩකලපු දිස්ත්‍රික් දෙමළ මාධ්‍ය සමාජය සහ මඩකලපුව මාධ්‍ය සමාජය එක්ව එම විරෝධතාවය සහ අනුස්මරණය සංවිධානය කර තිබු බවයි පළාත් බද වාර්තාකරුවන් පවසන්නේ.

අනුස්මරණයට හා විරෝධතාවයට නායකත්වය දුන් මඩකලපුව මාධ්‍ය සමාජයේ සභාපති වාලසිංහම් ක්‍රිෂ්ණකුමාර් එහිදී චෝදනා කළේ වත්මන් පාලනය තුලදී පවා මාධ්‍යවේදීන්ට නිදහස අහිමි කර ඇති බවටයි.

“කාලෙන් කාලෙට බලයට එන පාලකයන් ඝාතනයට ලක් වූ මාධ්‍යවේදීන්ට යුක්තිය ඉටු කරනවා වෙනුවට තව තවත් මාධ්‍යවේදීන් මර්දනය කරනවා. ඒ ආකාරයට මාධ්‍යවේදීන්ගේ ඝාතන වලට යුක්තිය ඉටුකරනවා යැයි කියමින්, මාධ්‍ය නිදහස සුරකිනවා යැයි කියූ, ජාතික ජන බලවේගයේ පාලනය යටතේත් මාධ්‍යවේදීන්ට මාධ්‍ය නිදහස අහිමි කරලා තියනවා.”

උතුරේත්, දකුණේත් වින්දිත සියළු මාධ්‍යවේදීන් වෙනුවෙන් මෙන්ම රට අත හැර යාමට බල කෙරුණු සියළු මාධ්‍යවේදීන් වෙනුවෙන් ද මේ ආණ්ඩුව යටතේ හෝ සාධාරණය ඉටු විය යුතු බව ඔහු වැඩි දුරටත් පවසා තිබුනි.

“පසුගිය කාලයේ අම්පාරේදී සහ කිලිනොච්චියේදී මාධ්‍යවේදීන්ට පහර දීලා තියනවා. ඇත්ත හෙළි කරන මාධ්‍යවේදීන්ට පහර දෙනවා. මාධ්‍ය නිදහස අහිමි කරනවා. ඒ නිසා අවම වශයෙන් මේ පාලනය තුළ ලසන්ත වික්‍රමතුංගට විතරක් නෙමෙයි ඝාතනය කළ, පහරදීම්වලට ලක් කළ, තර්ජනයට ලක්වූ සහ රට හැර ගිය මාධ්‍යවේදීන්ට සාධාරණය ඉටුවිය යුතුය.”

මාධ්‍යවේදීන් 44 ක්

2004-2010 හය වසර තුල ඝාතන සහ අතුරුදහන් කිරීම් ඇතුළු පීඩාවලට රට තුලදී ලක්වූ මාධ්‍යවේදීන් ගණන 44 ක් බව ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) විසින් සම්පාදනය කරන ලද වාර්තාවක දැක්වේ.

ඉන් වැඩි ප්‍රමාණයක් උතුරේ දෙමළ මාධ්‍යවේදීන්ය. ඔවුන් කිසිවකුටත් මේ තාක් යුක්තිය ඉටු වී නොමැත.

බොරැල්ල කනත්තේ පිහිටි මාධ්‍යවේදී ලසන්න වික්‍රමතුංගගේ සුසානය අබියසදී පෙර වසරවලදී මෙන්ම මෙවරත් ඔහුව අනුස්මරණය කිරීමට දේශපාලනඥයන්, මානව හිමිකම් ක්‍රියාධරයන්, මාධ්‍යවේදීන් ඇතුළු පිරිසක් කටයුතු කර තිබුනි.

එම අවස්ථාවට එක්ව සිටි අතුරුදහන් මාධ්‍යවේදී ප්‍රගීත් එක්නැලිගොඩගේ බිරිද වන ජගත් සම්මානලාභී මානව හිමිකම් ක්‍රියාධාරීනී සන්ධ්‍යා එක්නැලිගොඩ අපේක්ෂාව පළකර තිබුනේ මහදවල් මහමග මරා දැමු ලසන්ත වික්‍රමතුංග වෙනුවෙන් කිසිම ආණ්ඩුවක් අවුරුදු 16ක් තිස්සේ ඉටු නොකළ යුක්තිය හැමදාම අරගල භුමියේ සිටි ජනතා විමුක්ති පෙරමුණ ප්‍රමුඛ ජාතික ජන බලවේගයේ ආණ්ඩුවක් යටතේ ලබන අවුරුද්ද උදාවීමට පෙර සැලසෙනු ඇති බවටයි.