ඉන්දියාවේ ප්‍රමුඛ වාමාංශික පක්ෂයක් ශ්‍රී ලංකාව තුළ පූර්ණ බලය බෙදීමක් ඉල්ලයි

ශ්‍රී ලංකාවේ සිටින සියලුම දෙමළ ජනයාගේ සමානාත්මතාවය සහ අභිමානය තහවුරු කරන ලෙස ඉන්දියාවේ ප්‍රමුඛතම වාමාංශික පක්ෂයක් ශ්‍රී ලංකා රජයෙන් ඉල්ලා තිබේ.

ඉන්දියාව පුරා ව්‍යාප්තව ඇති වාමාංශික පක්ෂයක් වන CPI (M) නමින් ප්‍රකට වන ඉන්දීය කොමියුනිස්ට් පක්ෂයේ (මාක්ස්වාදී) මහජන නියෝජිතයෝ ඉන්දියානු පාර්ලිමේන්තුවේ සභා දෙක තුළ සහ ප්‍රාන්ත සභා ගණනාවකම සිටිති.

ජනාධිපති අනුර කුමාර දිසානායකගේ ජයග්‍රහණය CPI (M) විසින් පිළිගනු ලැබුයේ “ඓතිහාසික අවස්ථාවක්” ලෙසිනි.

“සුළු ජාතීන්ගේ අයිතීන් තහවුරු කරමින් දිසානායක ජනාධිපතිතුමා විසින් සමාජයීය-ආර්ථික සංවර්ධන, ප්‍රගති, සහ සුබසාධන මාවතට රට යොමු කරනු ඇතැයි අපට විශ්වාසයි. ඔහුගේ සියලුම වෑයම් සඳහා අපි ඔහුට සුබ ප්‍රාර්ථනා කරමු,” යි එම පක්ෂය පවසා ඇත.

CPI (M) 24වැනි තමිල්නාඩු ප්‍රාන්ත සමුළුව ප්‍රාන්තයේ උතුරට වන්නට ඇති දිස්ත්‍රික්කයක් වන විල්ලුපුරම් හි දී නව වසරේ පළමු සති අන්තයේදී (2025 ජනවාරි 3-5) පවත්වන ලදී.

සමුළුවේදී සම්මත වූ එක් යෝජනාවකින් ඉල්ලා සිටින්නේ ශ්‍රී ලාංකික දෙමළ සහ මුස්ලිම් ජනයාට මෙන්ම ශ්‍රී ලංකාවේ සිටින ඉන්දියානු සම්භවයක් ඇති මලෛයහ දෙමළ ජනයාට සමානාත්මතාවයෙන් සහ අභිමානයෙන් යුතුව සලකන ලෙසත්, පළාත්වලට බලය බෙදීම තහවුරු කරන ලෙසත් ය.

එමෙන්ම, සමුළුවේදී සම්මත වූ අංක 6 යෝජනාව හරහා ශ්‍රී ලංකාවේ වෙසෙන දෙමළ ජනයා මුහුණ පාන දුෂ්කරතා පිළිබඳව සාකච්ඡා කරන අතර, ඔවුන් වෙනුවෙන් යුක්තිය තහවුරු කරන ලෙසත් ආණ්ඩුවෙන් ඉල්ලා සිටී.

එම යෝජනාවේ සඳහන් වන්නේ, ශ්‍රී ලංකාවේ වෙසෙන දෙමළ ජනයා සමානාත්මතාවය නොමැතිව ජීවත් වූ බවත්, දීර්ඝ කාලයක් පුරාවට ජාතිය පදනම් කරගත් එදිරිවාදිකම්වලට භාජනය වූ බවත්, එම තත්වය සිවිල් යුද්ධයට සහ සාමයෙන් තොර ජීවිතයවලට හේතු වූ බවත් ය. එහි තවදුරටත් සඳහන් වන්නේ, එවැනි වාතාවරණ හේතුවෙන් සමස්ත දිවයිනේම ජනයා දුක්විඳි බවයි.

CPI (M) පක්ෂය විසින් “සමාන මට්ට්ටමක සිටින සහෝදරයා” ලෙස හඳුන්වන සහ විශාල බහුතරයක් ඇතිව බලයට පැමිණ සිටින ජාතික ජන බලවේගයෙන් ඉල්ලා සිටින්නේ පළාත්වලට පූර්ණ බලය බෙදීම සහ සියලුදෙනාටම අභිමානය සහ සමානාත්මතාවය තහවුරු කිරීම සඳහා පවතින තත්වය ප්‍රයෝජනයට ගන්නා ලෙසයි.

“ශ්‍රී ලාංකික දෙමළ ජනතාව ඇතුළු සුළුතර ප්‍රජාවන්ගේ සහයෝගය ලැබුණු ජාතික ජන බලවේගය ඔවුන්ගේ සුබසාධනය මෙන්ම සමාජය තුළ සමාන තත්වය සහ අභිමානය තහවුරු කළ යුතුය.”

බොහෝ කල් ගතවී ඇති පළාත් සභා මැතිවරණ පැවැත්වීමට කටයුතු කරන ලෙසද එම යෝජනාව හරහා අනුර කුමාර දිසානායක ‘සහෝදරයාට’ කියා සිටී.

“දැනට පැවැත්වීමට පියවර ගෙන නොමැති සියලුම පළාත් මැතිවරණ හැකි ඉක්මනින් පැවැත්වීම සහ පළාත් සභාවලට සුදුසු බලතල පැවරීම හරහා දෙමළ ජනතාවගේ ඉල්ලීම් ඉටු කිරීමට අවශ්‍ය පියවර ගන්නා ලෙස මෙම සමුළුව ශ්‍රී ලංකා රජයෙන් ඉල්ලා සිටී.”

CPI (M) පක්ෂය ඔවුන්ගේ ප්‍රාන්ත සමුළුවේදී කියා සිටියේ මීට අදාළ සාකච්ඡා ශ්‍රී ලාංකික දෙමළ සහ මුස්ලිම් ජනයා මෙන්ම උඩරට දෙමළ ජනයා සමගද පැවැත්විය යුතු බවත්, එම සාකච්ඡා පැවැත්විය යුත්තේ ඔවුන්ගේ විශ්වාසය දිනා ගන්නා ආකාරයට බවත්, අදාළ විසඳුම් ඒ මත පදනම් විය යුතු බවත් ය.

“පළාත් සභාවලට බලය බෙදාහැරීම සිදුකිරීමේදී කිසිඳු සීමාවක් පැනවිය නොයුතු බවත්, වෙනත් විෂයන් අතර අධ්‍යාපනය, සෞඛ්‍ය, කෘෂි කර්මාන්තය, නිවාස, ඉඩම් සහ පොලිසිය වැනි විෂයන් සම්බන්ධයෙන් එම සභාවලට බලතල ලබාදිය යුතු බවත් මෙම සමුළුව අවධාරණය කරයි.”

ශ්‍රී ලංකාවේ වෙසෙන දෙමළ සහ මුස්ලිම් ජනයා වෙනුවෙන් අභිමානය, සමානාත්මතාවය, සහ බලය බෙදීම ඉල්ලා සිටින යෝජනාව ඉදිරිපත් කළේ මදුරෙයි ප්‍රදේශය නියෝජනය කරන පාර්ලිමේන්තු මන්ත්‍රීවරයා සහ ජනප්‍රිය ලේඛකයකු වන සූ. වෙන්කටේසන් විසින් වන අතර, එය ස්ථිර කළේ තමිල්නාඩු ප්‍රාන්ත සභාවේ මන්ත්‍රී වන එම්. චින්නතුරෙයි විසිනි.

CPI (M) පක්ෂය නියෝජනය කරමින් සෘජුවම තේරී පත් වූ පාර්ලිමේන්තු මන්ත්‍රීවරුන් සිව් දෙනෙක් මහජන මන්ත්‍රී මණ්ඩලය නැත්නම් ලෝක් සභා යනුවෙන් හැඳින්වෙන ඉන්දීය පාර්ලිමේන්තුවේ පහළ මන්ත්‍රී මණ්ඩලය තුළත්, තවත් තේරී පත් වූ සාමාජිකයන් පස් දෙනෙක් රාජ්‍ය සභා ලෙස හැඳින්වෙන නියෝජිත මන්ත්‍රී මණ්ඩලය නැත්නම් ඉහළ මන්ත්‍රී මණ්ඩලය තුලත් සිටී.

ඉන්දීය පාර්ලිමේන්තුව තුළ මන්ත්‍රීවරුන් 9 දෙනෙකුගේ නියෝජනයක් තිබීමට අමතරව, CPI (M) පක්ෂය දකුණු ඉන්දියානු කේරළ ප්‍රාන්තය තුළ බලයේ සිටින අතර, බොහෝ ප්‍රාන්ත සභා තුළ පක්ෂය නියෝජනය කරමින් තේරී පත් වූ සාමාජිකයන් සිටී.

සිය නිල වෙබ් අඩවිය තුළ CPI (M)) පක්ෂය පවසා ඇත්තේ “කම්කරු-ගොවි සන්ධානය පදනම් කර ගනිමින්, සියලු දේශප්‍රේමී සහ ප්‍රජාතන්ත්‍රවාදී බලවේගවල විප්ලවීය එකමුතුව හරහා මහජන ප්‍රජාතන්ත්‍රවාදය සහ සමාජ පරිවර්තනය ඇතිකිරීම වෙනුවෙන් කැපවී සිටින බව” යි.

වැඩ කිරීමට ඇති අයිතිය, සාමූහිකව කේවල් කිරීමට සහ වැඩවර්ජන කිරීමට කම්කරුවන්ට ඇති අයිතිය, සහ පූර්ණ සිවිල් නිදහස සම්බන්ධයෙන් ලබාදෙන සහතිකයද මෙම වාමාංශික පක්ෂයේ අනෙකුත් මූලික ප්‍රතිපත්ති සහ මූලධර්ම අතර වෙයි.