පංචේශ්වරම් යනුවෙන් ප්‍රකට ශ්‍රී ලංකාවේ ඓතිහාසික පංච මහා ඊශ්වර දේවාල පුද බිම් ලෙස නම් කරන්නැයි ඉන්දියාවේ තිරුපතිහි වෙන්කටේශ්වර කෝවිලේ බැතිමතකු වන අගමැති මහින්ද රාජපක්ෂ වෙත ඉල්ලීමක් ඉදිරිපත්ව තිබේ.
හින්දු බැතිමතුන්ගේ වන්දනාවට පාත්‍ර වූ මන්නාරමේ තිරුකේශ්වරම්, ත්‍රිකුණාමලයේ කෝනේශ්වරම්,යාපනේ නගුලේශ්වරම්,හලාවත මුන්නේශ්වරම්, සහ දෙවුන්දර තුන්දේශ්වරම් යන ඓතිහාසික පංචේශ්වරම් කෝවිල් පරිශ්‍ර ජාතික පුජා භුමි හැටියට නම් කරන ලෙස හින්දු ආගමික කටයුතු භාර අගමැති මහින්ද රාජපක්ෂ ගෙන් උතුරු පළාත් සභාවේ හිටපු මන්ත්‍රී සභා කුගදාස් ඉල්ලයි.
උතුරේ නයිනතිව්හි නාගදීප රජමහා විහාරය පුජා භූමියක් ලෙස නම් කරමින් එළඹෙන වෙසක් සමයේදී ඊට අදාළ සන්නස් පත්‍ර ලබා දීමට කටයුතු කරන බව පසුගිය දා අගමැති කාර්යාලය මගින් නිවේදනය කර තිබිණි.
හිටපු පළාත් සභා මන්ත්‍රී කුගදාස් පවසන්නේ හින්දු ආගමික සංවිධාන දේශපාලන වැඩ පසෙක ලා මේ පංචේශ්වරම් සිද්ධස්ථාන පුද බිම් ලෙස නම් කර ගනිමින් සාසනික සේවාවක් කිරීමට නම් ඒ සඳහා හින්දු ආගමික කටයුතු බාර ඇමැති ලෙස අගමැතිවරයාගෙන් ඒකාබද්ධ ඉල්ලීමක් කරන ලෙසයි.
බෞද්ධයකු වන අගමැති මහින්ද රාජපක්ෂ වාර්ෂිකව තිරුපති හින්දු දෙවොල භක්තිවන්ත ලෙසින් වන්දනාමාන කරන බැතිමතකු ද වන බැවින් මෙම කාර්ය ඔහු මැනවින් ඉටු කරනු ඇතැයි ද කුගදාස් විශ්වාසය පළ කරයි.
1965 වසරේ සිට මන්නාරමේ පිහිටි ඓතිහාසික තිරුකේශ්වරම් කෝවිල හින්දු පුද බිමක් ලෙස නම් කරන ලෙස පැවති සෑම ආණ්ඩුවකින්ම ඉල්ලා සිටිය ද මෙතෙක් එය ඉටුකිරීමට කිසිදු ආණ්ඩුවක් සමත් නොවූ බව ද ඔහු පවසයි.
Facebook Comments
