පොලිස් අත්අඩංගුවේ සිටි තරුණයකුගේ මරණයට මත්ද්‍රව්‍ය භාවිතය හේතුවූ බවට සඳහන් කරන මරණ පරීක්ෂණ වාර්තාවක් පවුලේ ඥාතීහු ප්‍රතික්ෂේප කරති.
මිය ගිය තරුණයාගේ අවසන් කටයුතු සිකුරාදා උදෑසන සිදු කිරීමට පවුලේ ඥාතීන්ට සිදු වුයේ විරෝධතා නොපවත්වන ලෙස පොලිසිය විසින් ගන්නා ලද අධිකරණ නියෝගයකට යටත් වෙමිනි.
ජුනි 2 බදාදා රාත්‍රියේ මඩකලපුවේ ඉරුදයපුරම්හිදී මඩකලපුව පොලීසියේ බුද්ධි අංශ නිලධාරීන් විසින් අත් අඩංගුවට ගත් විසි එක් හැවිරිදි චන්ද්‍රන් විධූෂන් තරුණයා ජුනි 3 බ්‍රහස්පතින්දා අළුයම පොලීසිය තුලදීම මියගොස් තිබුනි.
තරුණයාගේ මිය යාම සම්බන්ධයෙන් පරීක්ෂණයක් පවත්වන ලෙස දිස්ත්‍රික් මහේස්ත්‍රාත් කරුපයියා සෙල්වරානි එරාවුර් පොලිසියට නියෝග කර තිබුණි. මරණ පරීක්ෂණය පැවැත්වීමෙන් පසු විශේෂ අධිකරණ වෛද්‍ය නිලධාරී අරසරත්නම් ඉලන්ගෝවන් පලාත්බද මාධ්‍යවේදීන් සමග පවසා තිබුනේ තරුණයාගේ මරණයට හේතුව අයිස් නම් මත් ද්‍රව්‍ය අඩංගු පැකට් හතරක් ගිලීම බවයි.
මරණ පරීක්ෂණ වාර්තාව මේ වන තෙක් තමන් වෙත නොලැබුන බව මිය ගිය තරුණයාගේ පියා වන කේ. චන්ද්‍රන් මාධ්‍යවේදීන් සමග පවසා තිබේ.
පොලිස් අත්අඩංගුවේදී සිදු වු මරණය මත්ද්‍රව්‍ය භාවිතය නිසා සිදු වු බවට සිදු කෙරෙන ප්‍රකාශයන් දැඩිව ප්‍රතික්ෂේප කරන චන්ද්‍රන් විධූෂන්ගේ නැගෙනිය වන චන්ද්‍රන් කැරොලයින් පවසන්නේ සිය සහෝදරයාට මාරාන්තික ප්‍රහාර එල්ල කරන ආකාරය තමන් දුටු බවයි.
“මේ කට්ටිය කියන්නේ බොරු. මගේ අයියට යුක්තිය දෙන්න ඕනෙ. ඒ දේ වෙනකම් මම නවතින්නේ නෑ. මගේ අයියා මැරෙනකම් ගුටිකනවා මම දැක්කා”
පොලිස් නිලධාරීන් සිය සහෝදරයාට අමානුෂික ලෙස පහර දුන් ආකාරය ඇය මාධ්‍යවේදීන් හමුවේ කඳුළු සලමින් විස්තර කර දුන්නාය.
“එයාව උස්සල පොලවෙයි බිත්තියෙයි ගැහුවා. බිත්තියත් පුපුරලා. ඒගොල්ලන්ට එච්චර හයියක් තියෙනවද?”
බලෙන් ගිල්ලලා
කේ. චන්ද්‍රන් පියා සැක කරන්නේ පොලිස් නිලධාරීන් විසින් බලහත්කාරයෙන් සිය පුතුට මත් ද්‍රව්‍ය ගිලවන්නට ඇති බවයි.
“සමහරවිට ඒගොල්ලෝ බලෙන් එයාගේ කටට අයිස් ඔබලා වතුර පොවන්න ඇති. ඉතින් එයා මොනවා කරන්නද….කරන්න තිබ්බ එකම දේ තමයි ගිලින එක. අරන් ගියාට පස්සේ පාන්දර හතරට එයා පොලිසියේදී මැරුණා.”
සිය පුතු අත්අඩංගුවට ගැනීමට පැමිනි පොලිස් නිලධාරීන් ඔහු සතුව අයිස් නැමැති මත් ද්‍රව්‍ය තිබේදැයි පරීක්ෂා කළ අතර එවැන්නක් සොයා ගැනීමට නොහැකි වු කල නිවසත් පරීක්ෂා කළද කිසිවක් හමු නොවුන විට, ඔහුට පහරදී රැගෙන ගිය බවයි කේ. චන්ද්‍රන් පියා පවසන්නේ.
“වාහනේක දාගෙන ගියා. තිබ්බ තරහ නිසා ඒගොල්ලො එයාට දරුණු විදියට ගහලා, මේ සිද්ධිය ලොකු එකක් විදියට ප්‍රසිද්ධ කරන්න ඇති.”
දෙමළ මාධ්‍ය ආයතන කිහිපයක්ම වාර්තා කර තිබුනේ මිය ගිය තරුණයා අයිස් මත් ද්‍රව්‍ය පැකට් හතරක් ගිලිම නිසා ඔහුගේ මරණය සිදුව ඇති බව පශ්චාත් මරණ පරීක්ෂණ වාර්තාවේ සදහන්ව ඇති බවයි.
පළාත් බද වාර්තාකරුවන් පවසන්නේ සිවිල් ඇදුමින් සැරසී සිටි පොලිස් නිලධාරීන් තරුණයාට පහර දෙන ආකාරය ගම් වැසියන් විසින්ද දැක තිබෙන බවයි.
“ඔලුවෙයි, බෙල්ලෙයි තුවාල පේන්න තියෙනවා,” යි මිය ගිය තරුණයාගේ මාමා මාධ්‍යවේදීන්ට පවසා තිබේ.
“එයාට මාංචු දාලා ගහක ගැටගහලා ඊට පස්සේ පොලිසියට අරං ගියා. ඊට පස්සේ ගේ පරීක්ෂා කරලා මුකුත් හොයාගන්න නැතිව ආපහු ගියා. අපිට කිව්වේ පොලිසියට එන්න එපා කියලයි.” ඔහු වැඩි දුරටත් පවසා තිබුනි.
ජුනි 3 බ්‍රහස්පතින්දා රාත්‍රි 8 ට පමණ මඩකලපුවේ ඉරුදයපුරම්හිදී පිහිටි චන්ද්‍රන් විධූෂන්ගේ නිවසට ගෙනවිත් තිබු දේහය ජුනි 4 සිකුරාදා උදෑසන භුමදානය කර තිබුනි.
පළාත් බද වාර්තාකරුවන් පවසන්නේ තරුණයාගේ අවසන් කටයුතු සිදු කෙරෙන දිනයේ විරෝධතා පැවැත්වීම තහනම් කරමින් මඩකලපුව පොලීසිය විසින් මඩකලපුව මහේස්ත්‍රාත් අධිකරණයෙන් අධිකරණ නියෝගයක්ද ලබා ගෙන තිබු බවයි.
පොලිස් ඝාතන හා මානව හිමිකම්
පොලිස් අත් අඩංගුවේ සිටින සැකකරුවන් ඝාතනය වීම සම්බන්ධයෙන් මැයි මස අවසානයට පෙර පූර්ණ වාර්තාවක් ලබා දෙන ලෙස ශ්‍රී ලංකා මානව හිමිකම් කොමිෂන් සභාව පසුගිය මාසයේදී පොලිස්පතිවරයාගෙන් ඉල්ලා තිබුනත් එය ලාබා දුන්වගක් දැනගන්නට නැත.
මෙවැනි සිදුවීම් වාර්තා වීම තුළින් රට තුළ නීතියේ ආධිපත්‍ය පිළිබද බරපතල ගැටළුකාරී තත්වයක් ගොඩනැගෙන බව ශ්‍රී ලංකා මානව හිමිකම් කොමිෂන් සභාවේ විශ්වාසයයි.
පොලිස්පති වෙත යොමු කරන ලද ලිපියක් මගින් ශ්‍රී ලංකා මානව හිමිකම් කොමිෂන් සභාවේ සභාපති ආචාර්ය ජගත් බාලසුරිය පසුගියදා දැනුම් දී තිබුනේ පොලීසිය භාරයේ සිටින සැකකරුවන්ගේ ආරක්ෂාව තහවුරු කිරීම පොලිස් දෙපාර්තමේන්තුවේ වගකීමක් බව පොලිස් දෙපාර්තමේන්තුවේ නියෝග වල මෙන්ම ශ්‍රේෂ්ඨාධිකරණ නඩු තීන්දු වලද අවධාරණය කර ඇති බවයි.
ශ්‍රී ලංකා මානව හිමිකම් කොමිෂන් සභාව පසුගිය වසරේ නිවේදනය කර තිබුනේ 2020 ජුනි මස සිට ඔක්තෝබර් 20 දක්වා කාලය තුළ පොලිස් අත්අඩංගුවේදී මිය යාම් අටක් වාර්තා වී ඇති බවයි.
පොලිස් අත්අඩංගුවේ සිටියදී සිදුවු ඝාතන තුනක් මේ වසර තුලදී වාර්තා වී තිබේ.
Facebook Comments
