බොදු බල සේනා සංවිධානයේ නායක ගලගොඩ අත්තේ ඥානසාර හිමිට අධිකරණය විසින් වරෙන්තු නිකුත් කරද්දී එම සංවිධානයේ අනුගාමිකයන් දෙදෙනෙකු ජාතිවාදි ප්‍රහාර වලට සැකපිට රිමාන්ඩ් බන්ධනාගාර ගත කල බව පොලිසිය පවසයි.
කොම්පඤ්ඤවීදිය ප්‍රදේශයේ හෝටලයක පැවති මාධ්‍ය හමුවකට බලහත්කාරයෙන් කඩාවැදී එම සාකච්ඡාව කඩාකප්පල් කිරීම, සාපරාධී බලහත්කාරය පෑම, සුළු පහරදීමක් ඇතුළු චෝදනා 8 ක් සම්බන්ධයෙන් කොටුව මහේස්ත්‍රාත් අධිකරණයේ විභාග වන නඩුවකට පෙනී නොසිටිමේ වරදට බොදු බල සේනා නායක හිමිට 15 ප්‍රහස්පතින්දා අධිකරණය වරෙන්තු නිකුත් කළේය.
පොලීස් නිලධාරින්ගේ රාජකාරියට බාධා කර තර්ජනය කිරීම, ජාතීන් අතර අසමඟිය ඇති වන ආකාරයේ ප්‍රකාශ සිදු කිරීම යන චෝදනා යටතේ ඥානසාර හිමියන් අත්අඩංගුවට ගැනීමට පොලිසිය මෙහෙයුමක් දියත් කලද මෙතෙක් එහිමියන් අත්අඩංගුවට ගැනීමට පොලීසිය අසමත් වී ඇත.
ජිවිත තර්ජන ඇතැයි දැනුම් දෙමින් දෙවතාවක්ම අධිකරණය හමුවට නොපැමිණ සැඟව සිටින බොදු බල සේනාවේ නායක ගලගොඩ අත්තේ ඥානසාර හිමි සංවිධානාත්මක අපරාධ වැළැක්වීමේ කොට්ඨාසය නිසි පරීක්ෂණයක් නොපවත්වා තමන් අත්අඩංගුවට ගැනීම වළක්වාලමින් නියෝගයක් නිකුත් කරන ලෙසට ශ්‍රේෂ්ඨාධිකරණයට මූලික අයිතිවාසිකම් පෙත්සමක්ද ගොනු කර තිබේ.
බොදු බල සාමාජිකයින් රිමාන්ඩ්
මේ අතර කුරුණෑගල මල්ලවපිටිය ප්‍රදේශයේ දේවස්ථානයකට එල්ල වූ පෙට්‍රල් බෝම්බ ප්‍රහාරය සම්බන්ධයෙන් අත්අඩංගුවට ගෙන බන්ධනාගාර ගත කල සැකකරුවන් දෙදෙනා බොදු බල සේනා සංවිධානයේ ක්‍රියාකාරීන් බවට අනාවරණය වී ඇති බව පොලිස් මාධ්‍ය ප්‍රකාශක නියෝජ්‍ය පොලිස්පති ප්‍රියන්ත ජයකොඩි පවසයි.
සිද්ධියට සම්බන්ධ තවත් සැකකරුවන් සිව් දෙනෙකු අත්අඩංගුවට ගැනීම සඳහා විමර්ශන සිදුකරන අතර ඔවුන් මේ වන විට ප්‍රදේශයෙන් පළා ගොස් ඇති බවද පොලිස් මාධ්‍ය ප්‍රකාශක සඳහන් කරයි.
කොළඹ සංවිධානාත්මක අපරාධ කොට්ඨාශයේ නිළධාරීන් කණ්ඩායමක් කුරුණෑගල, කොස්කැලේ ප්‍රදේශයේදී ඥානසාර හිමි අත්අඩංගුවට ගැනීමට යාමේදී ගැටුම්කාරී තත්ත්වයක් හටගත් අතර එම සිද්ධියෙන් පසුව මල්ලවපිටිය ප්‍රදේශයේ දේවස්ථානයකට මෙලෙස පෙට්‍රල් බෝම්බ ප්‍රහාරයක් එල්ල කර තිබූ බව පොලිසිය කියා සිටි.
පසුගියදා නුගේගොඩ වෙළෙඳ සැලක් ගිනි තැබීම සම්බන්ධයෙන් අත්අඩංගුවට ගත් සැකකරුද බොදු බල සේනා සංවිධානයේ නායක ගලගොඩ අත්තේ ඥානසාර හිමියන් සමඟ ඉතා සමීප හා එම සංවිධානයේ ක්‍රියාකාරි සාමාජිකයෙකු බව පොලිසිය නිවේදනය කළේය.
Facebook Comments
