බුදුන් වහන්සේගේ දහම සැබවින්ම අනුගමනය කරන අනුගාමිකයෙකු යැයි රටේ ජනතාවට නිරන්තරයෙන් කියාපෑමට උත්සාහ දරන්නේ නම් අවම වශයෙන් පංච ශීලයේ සිල්පදවලින් එක් සිල්පදයක් හෝ ආරක්ෂා කර රට හමුවේ සාවද්‍ය ප්‍රකාශ කිරීමෙන් වැළකී සිටිය යුතු නොවේ දැයි මුදල් හා ජනමාධ්‍ය ඇමතිවරයා හිටපු ජනපති මහින්ද රාජපක්ෂගෙන් ප්‍රශ්න කරයි.
“ජී.එස්.පී. ප්ලස් සම්බන්ධයෙන් රජය යථාර්ථයක් නොවන අපේක්ෂාවන් ඇති නොකළ යුතුයි” යන ශීර්ෂය යටතේ හිටපු ජනපති මහින්ද රාජපක්ෂ විසින් නිකුත් කරන ලද නිවේදනය සම්බන්ධයෙන් පිළිතුරු නිවේදනයක් නිකුත් අමාත්‍ය මංගල සමරවීර මේ බව ප්‍රශ්න කර සිටි.
යුද්ධය අවසන් වූ වහාම රට සංවර්ධනය කරා ඉහළට ඔසවා තැබීම සඳහා කටයුතු කිරීමට අවස්ථාව තිබියදී ඒ වෙනුවට මහින්ද රාජපක්ෂ සහ ඔහුගේ උපදේශකවරු මේ රට ප්‍රපාතය කරා තල්ලු කිරීමට කටයුතු ආරම්භ කල බව පවසන ඇමතිවරයා එක් පැත්තකින්, ඉතා අසාධාරණ ලෙස ඉහළ වානිඡ පොලියට විදේශයන්ගෙන් මුදල් ණයට ලබාගෙන, රට විශාල ණය උගුලකට ඇද දැමූ අතර, අනෙක් පැත්තෙන් ශ්‍රී ලංකාව හා රටේ ජනතාව ජාත්‍යන්තරයෙන් හුදකලා කල බවටයි චෝදනා කරන්නේ.
ජනතාව මුළා කරමින් සත්‍යය විකෘති කිරීම
රජපක්ෂ පාලන සමයේ ගනු ලැබූ තීරණයන් හේතුවෙන් ශ්‍රී ලංකාව ජාත්‍යන්තරයෙන්ද දුරස් කරනු ලැබු අතර ජාත්‍යන්තර මූල්‍ය ආයතනයන් සමඟ වූ ගනුදෙනුවල දී ශ්‍රී ලංකාවට ආධාර දෙන ප්‍රධාන රටවල් බොහොමයක් විවිධ අවස්ථාවන්හි ශ්‍රී ලංකාවට එරෙහිව ඡන්දය පාවිච්චි කළ අවස්ථාවන් පිළිබඳ තොරතුරු රටට වසන් කළ බවද ඇමති මංගල සිය නිවේදනය මගින් හෙළි කර ඇත.
බලය සඳහා තිබෙන කෑදරකම හේතු කොටගෙන මහින්ද රාජපක්ෂ හා ඔහුගේ උපදේශකවරුන්ගේ රාජ්‍ය පාලනයේ අංගයක් වූ ව්‍යාඡත්වය, වංචාව සහ කපටිකම් සුපුරුදු පරිදි මේ වනවිටත් ක්‍රියාවෙහි යොදවමින් රටේ ජනතාව මුළා කරමින් සිටින බවටද ඇමතිවරයා චෝදනා කරයි.
ලංකාව ඉහළ මධ්‍යම ආදායම් ලබන රටක් වශයෙන් පත්වීමට ඉතා ආසන්න බැවින් ජී.එස්.පී. ප්ලස් පහසුකම් ලබාගැනීම ඉතා සුළු දෙයක් යැයි සිය නිවේදනය මඟින් ප්‍රකාශ කරන පාර්ලිමේන්තු මන්ත්‍රී මහින්ද රාජපක්ෂ රට “ඉහළ ආදායම් ලබන රටක් ලෙස” වසර 03 ක් අඛණ්ඩව පැවති බව හිතාමතාම වසන් කර ඇති බවද මංගල ඇමතිවරයා අන‍ාවරණය කරයි.
සිව් වසරක් තිස්සේ ජී.එස්.පී. සහනය ශ්‍රී ලංකාවට ලබාගැනීමට අපොහොසත් වූ මහින්ද රාජපක්ෂ සම්මුතිවාදී රජය විසින් එය ලබාගැනීමට සමත්වීම දරාගත නොහැකිව සත්‍යය විකෘති කිරීමේ කාර්යයන්වල නිරත වී සිටින බවයි ඇමතිවරයා අවධාරණය කරන්නේ.
ජනතාව සතු අයිතිවාසිකම් අහිමි කිරීමේ ප්‍රතිඵලය
“අපගේ ව්‍යවසායකයන් හා වැඩකරන ජනතාවගේ දක්ෂතාවය හා කැපවීම මත සාමාන්‍ය ආදායම් තත්ත්වය වැඩිකර ගැනීමට ලංකාවට අවස්ථාවක් ලබාගැනීම වරදක්ද? අපගේ ව්‍යවසායකයන් හා වැඩකරන ජනතාව තම යෝග්‍යතාවය අනුව වඩා හොඳ අවස්ථාවන් ඇතිකර ගැනීමට ඉඩ නොදී රජයක් වශයෙන් නිකරුනේ බලා සිටිය යුතු දැයි අපේක්ෂා කරන්නේද? අපගේ ජාතික ඉලක්කයන් ප්‍රමාදයකින් තොරව ළඟාකර ගැනීමට රජය මොවුන්ට අවස්ථා ලබාදිය යුතු නොවේද?” යි හෙතෙම හිටපු ජනපතිගෙන් ප්‍රශ්න කරයි.
තමන් ශ්‍රී ලංකාවේ බෞද්ධාගමික අනුගාමිකයෙක් පමණක් නොව එහි භාරකරුවෙක් යැයි කියාපාන මන්ත්‍රී මහින්ද රාජපක්ෂ මේ රටේ පුරවැසියන්ට මූලික මානව හිමිකම් ප්‍රතිපත්තීන්, අයිතිවාසිකම් හා නිදහස ලබාදීම වෙනුවෙන් පෙනී නොසිටීම ඛේදජනක තත්ත්වයක් බවයි සිය නවේදනයෙන් පෙන්වා දෙන්නේ.
අතුරුදහන් කිරීම් හා මානව හිමිකම් උල්ලංඝණය කිරීමේ අවස්ථා විභාග කිරීමට, වධ හිංසාවෙන් ජනතාව ආරක්ෂා කිරීමට සහ හිටපු ජනපති විසින්ම පත්කරන ලද උගත් පාඩම් හා සංහිඳියා කොමිසම විසින් 2011 වසරේදී කරන ලද නිර්දේශ ක්‍රියාත්මක නොකිරීම හේතුවෙන් සහ මෙරටේ ජනතාවට ඔවුන් සතු අයිතිවාසිකම් අහිමි කිරීමේ ප්‍රතිඵලයක් ලෙස හත් වසරකට පෙර ජී.එස්.පී. පහසුකම් මෙරටට අහිමි වු බවයි මුදල් හා ජනමාධ්‍ය ඇමතිවරයා සිය ලිපිය මඟින් අවධාරණය කර ඇත්තේ.
ද්වේශ සහගත ක්‍රියාවක්
රටේ ජනතාවට තම වගකීම් ඉටු කිරීමට අසමත් වු හිටපු ජනපති මහින්ද රාජපක්ෂ වර්තමාන රජය රටේ ජනතාවගේ සුබ සිද්ධිය වෙනුවෙන් ක්‍රියාවට නැංවීමට උත්සහ දරන වැඩපිළිවෙළ විවේචනය කිරීම ද්වේශ සහගත ක්‍රියාවක් ලෙසයි ඇමති මංගල හඳුන්වන්නේ.
ජාත්‍යන්තර ප්‍රජාව සමඟ උරෙන් උර ගැටී ගෞරවාන්විත ජාතියක් ලෙස ජාත්‍යන්තරයේ දී පෙර ශ්‍රී ලංකාවට අහිමි වූ උචිත තත්ත්වය නැවත වාරයක් ලබාගැනීමට ජී.එස්.පී. සහනය හවුල්කාරී ක්‍රමවේදයක් ලෙස රජය සලකන බව පවසන ඇමතිවරයා මෙම තත්ත්වය, පසුගිය පාලනය විසින් අපගේ රට හා ජනතාව නීචයන්ගේ තත්ත්වයට ඇද දැමූ අවස්ථාවෙන් මිදීමට ඉවහල් වනු ඇති බවටයි විශ්වාසය පල කරන්නේ.
“අප රට තුළ නීති පද්ධතිය නිසි පරිදි බලාත්මක කරන විට, මේ රටේ ව්‍යවසායකයන් හා වැඩකරන ජනතාවගේ පරිශ්‍රමයන්හි ඵලදාව වෙනුවෙන් ලෝකයේ අන් රටවල මුහුදු තොටවල් විවෘතව, ප්‍රතිලාභ ලබද්දී එය දරාගැනීමට නොහැකිවූවෝ සම්බන්ධයෙන් අපට ඇත්තේ කණගාටුවක් පමණි.
ශ්‍රී ලංකාව මෙන්ම එහි ජනතාවටද ලෝකයේ අනෙක් ඕනෑම රටක් හෝ රටවල් සමූහයක් සමඟ සමසේ ආත්ම විශ්වාසයෙන් යුතුව කථාකිරීමට හා කටයුතු කිරීමට ද හැකි පෞඪ ජාතියකි. ශ්‍රී ලාංකිකයන් ධෛර්යය සම්පන්න ජාතියක් බව පෙන්වීම සඳහා ලෝක ව්‍යාප්ත සංවාදයන් තුළ කිසිවක් සැඟවීමට අපට අවශ්‍ය නැත” යි මංගල සමරවීර ඇමතිවරයා සිය නිවේදනය හරහා වැඩිදුරටත් අවධාරණය කරයි.
Facebook Comments
