ආරක්ෂක ලේකම්වරයා විසින් සුළු දෙයක් ලෙස හඳුන්වන ලද මුස්ලිම් හා ක්‍රිස්තියානි විරෝධි ප්‍රහාර ම්ලේච්ඡ ක්‍රීයා ලෙස කැබිනට් මණ්ඩලය විසින් හෙලා දකිද්දී ඒවා ප්‍රචන්ඩ ක්‍රියා ලෙස හඳුන්වන අගමැතිවරයා ඊට එරෙහිව නීතිය ක්‍රීයාත්මක කරන ලෙස පොලිසියට උපදෙස් දී තිබේ.
කිසියම් ආගමකට ජන වර්ගයකට විරුද්ධව ප්‍රචණ්ඩ ක්‍රියාවල යෙදෙන පුද්ගලයින්ට සහ වෛරය පැතිරවීමට ක්‍රියා කරන පුද්ගලයන්ට එරෙහිව නීතිය ක්‍රියාත්මක කරන බව 14 බදාදා අරලිය ගහ මන්දිරයේ විශේෂ ප්‍රකාශයක් කරමින් අගමැතිවරයා පැවසු අතර ආගමික හා ජනවාර්ගික කොටසක් ඉලක්ක කරගෙන සිදු කරන ලද ම්ලේච්ඡ ක්‍රියා සම්බන්ධයෙන් වගකිව යුතු අයට එරෙහි ක්‍රියාමාර්ග කඩිනම් කරන මෙන් නීතිය ක්‍රියාත්මක කරන බලධාරීන්ට සහ නීතිපතිවරයාට උපදෙස් දෙන බව කැබිනට් මණ්ඩලය කියා සිටි.
ශ්‍රී ලාංකීය ජාතිය නැවත කිසි කලෙකත් ගැටුම්කාරී අතීතයට පිවිසීමට ඉඩ නොතබන බව පවසන කැබිනට් මණ්ඩලය වැරදි ක්‍රියාවන්ට දඩුවම් නොදී සිටීම හරහා රට නැවත යුද්ධයක් වෙත තල්ලු වීමේ භයානක අවදානමට මුහුණ දීමේ අනතුරක් පවතින බවද අවධාරණය කරයි.
මුස්ලිම් සහ ක්‍රිස්තියානි විරෝධී ප්‍රහාර බරපතල නොවන බව කියන ආරක්ෂක ලේකම්වරයා ඒවා ජාතීන් අතර අසමගිය වර්ධනය කිරීමට ජනමාධ්‍ය යොදාගන්නා ආවේගශීලී පුවත් සිරස්තල බවට ජනමාධ්‍ය දෝෂ දර්ශනයට ලක් කර සිටියේ 13 අඟහරුවාදා පැවති මාධ්‍ය හමුවකදීය.
මෙරට ජනාධිපතිවරයා ලෙසින් මෛත්‍රීපාල සිරිසේන දිවුරුම් දෙනු ලැබුවේ රටේ සංහිඳියාව ඇති කිරීමට මෙන්ම ජාතික එකඟතාවය ඇති කිරීමට බව පෙන්වා දෙන අග්‍රාමාත්‍යවරයා වසර 30ක යුද්ධය අවසන් කිරීමෙන් අනතුරුව මෙරටේ ජනතාව සමඟ ඉදිරියට ගමන් කිරීමට ශ්‍රී ලාංකිකයෙකු ලෙස තමන් සියලු ආගමකට සහ සංස්කෘතියකටම ගරු කරන බව පැවසුහ.
“මේ රටේ සියලු පුරවැසියන්ට සමාන අයිතිවාසකම් සමඟ සාමයෙන් ජීවත්වීමට අවස්ථාව උදා කර දී තිබෙනවා. මුස්ලිම් දේවස්ථාන කිහිපයකට පහර දීමේ සිද්ධිය සම්බන්ධයෙන් නීතිය ක්‍රියාත්මක කිරීමට පොලිසිය වෙත දැනුම් දී තිබෙනවා. ඕනෑම ජන වර්ගයකට හෝ ආගමකට විරුද්ධව ක්‍රියා කරන්නේ නම්, ප්‍රචණ්ඩ ක්‍රියාවල යෙදෙන්නේ නම් එම පුද්ගලයන් සම්බන්ධයෙන් විභාග කොට අත්අඩංගුවට ගැනීමට හෝ උසාවිය වෙත ඉදිරිපත් කිරීමට කටයුතු කර තිබෙනවා. ඒ සම්බන්ධයෙන් වන පරීක්ෂණ කටයුතු කිිසිවක් නතර කොට නැහැ.” යි අගමැතිවරයා කියා සිටි.
Facebook Comments
