මානව හිමිකම් සමුළුවක් සඳහා විදෙස් ගත වීමට පැමිණි මානව හිමිකම් ක්‍රියාධරයෙක් කටුනායක ගුවන්තොටුපළේදී ත්‍රස්ත විමර්ශන ඒකකය විසින් රඳවා ගෙන ප්‍රශ්න කර ඇත.
ඉන්ෆොම් සහ ෆෝරම් ඒෂියා ආයතන වල සේවය කරන රුකී ප්‍රනාන්දු එංගලන්තයේ යෝක් විශ්වවිද්‍යාලයේ පැවැත්වීමට නියමිත මානව හිමිකම් සැසිවාරයක් සදහා සහභාගීවීම සදහා ඊයේ (01) විදෙස් ගතවීමට උත්සාහ කළ අවස්ථාවේදී ඔහුව රඳවා ගෙන මෙසේ ප්‍රශ්න කර තිබෙන්නේ.
පසුගිය රාජපක්ෂ රජය සමයේ මානව හිමිකම් ක්‍රියාකාරීන්ට විදින්නට සිදු වූ ගැහැට සහ බලපෑම් නැවත වරක් කරළියට පැමිණීමක් ලෙස මෙම සිදුවීම සැලකිය හැකි බවයි මේ සම්බන්ධයෙන් නිවේදනයක් නිකුත් කරන කැෆේ සංවිධානය අවධාරණය කරන්නේ.
යුද්ධාවසානයේ රජයේ හමුදා වෙත මුල්ලිවයික්කාල්හි දී භාරවූ තම දරුවා සොයාමින් ගිය ජෙයකුමාරි බාලේන්ද්‍රන් සහ ඇය වෙනුවෙන් ඉදිරිපත් වූ රුකී ප්‍රනාන්දු අත්අඩංගුවට ගෙන ඔවුන්ට එරෙහිව පවරන ලද නඩුව තවමත් විභාග වෙමින් පවතී.
යුද්ධයෙන් පසුව රාජ්‍ය මර්ධනය හා ත්‍රස්තවාදී ලේබල් ඇලවීම සම්බන්ධයෙන් කුප්‍රකට නඩුවක් බවට පත් ‘ජෙයකුමාරි සිදුවීමේ‘ නාට්‍යය යහපාලන රජය යටතේ ද පෙර පරිදිම ඉදිරියට ඇදෙමින් පවතින බවයි එම නිවේදනය මඟින් පෙන්වා දෙන්නේ.
මෙම දැඩි ලෙස හෙළා දකින කැෆේ සංවිධානය මානව හිමිකම් ක්‍රියාකාරීන් මර්ධනය කිරීම වහා නවතා දමන ලෙස ද රජයට බල කර සිටී.
රුකී ප්‍රනාන්දු රඳවා ගෙන ප්‍රශ්න කිරීම සම්බන්ධව මෙතෙක් පොලිසිය හෝ රාජ්‍ය ආරක්ෂක අමාත්‍යාංශය හෝ කිසිදු ප්‍රකාශයක් කර නොමැත.
Facebook Comments
