ව්‍යවස්ථා විරෝධි ලෙස මහින්ද රාජපක්ෂ අගමැති ධුරයට පත් කරමින් පත් කරන ලද අමාත්‍ය මණ්ඩලයට එරෙහිව රනිල් වික්‍රමසිංහ ඇතුළු පාර්ලිමේන්තු මන්ත්‍රිවරුන් 122 දෙදෙනෙකු ගොනු කර තිබූ කෝ වරෙන්ටෝ රීට් ආඥා පෙත්සම ඉල්ලා අස් කර ගෙන තිබේ.
2018 ඔක්තොම්බර් මාසයේදී ජනාධිපති මෛත්‍රීපාල සිරිසේන විසින් අගමැති ධුරයට පත් කළ මහින්ද රාජපක්ෂ හා 48 දෙනෙකුගෙන් සමන්විත කැබිනට් මණ්ඩලයට එම ධුර දැරීමට නිත්‍යානුකුල අයිතියක් නොමැති බවට නිගමනය කර එම ධුරවලින් ඔවුන් ඉවත් කරන ලෙස ඉල්ලමින් මෙම පෙත්සම ගොනුකර තිබුණි.
එක්සත් ජාතික පක්ෂ පාර්ලිමේන්තු මන්ත්‍රිවරුන්, ජනතා විමුක්ති පෙරමුණ පාර්ලිමේන්තු මන්ත්‍රීවරුන්, දෙමළ ජාතික සන්ධානයේ පාර්ලිමේන්තු මන්ත්‍රීවරුන්, ශ්‍රී ලංකා මුස්ලිම් කොංග්‍රසයේ පාර්ලිමේන්තු මන්ත්‍රිවරුන් ඇතුළු 122 කු එම පෙත්සම ගොනු කරන ලදී.
පෙත්සම මාර්තු 12 අඟහරුවාදා අභියාචනාධිකරණ විනිසුරු අර්ජුණ ඔබේසේකර හමුවේ කැඳවු අවස්ථාවේදී පෙත්සම්කාර පාර්ශවය වෙනුවෙන් පෙනී සිටි නීතිඥවරුන් කරුණු දක්වමින් පෙන්වා දී ඇත්තේ පෙත්සමෙන් ඉල්ලා සිටි සහන මේ වන විටත් ලැබි ඇති බැවින් පෙත්සම තවදුරටත් පවත්වා ගෙන යාමේ අවශ්‍යතාවයක් නොමැති බවයි.
ඒ අනුව පෙත්සම්කාර පාර්ශවයට එම පෙත්සම ඉල්ලා අස් කර ගැනීමට අධිකරණය අවසර ලබා දී ඇත.
Facebook Comments
