ජාතිය මත බලය බෙදා හාරීමට විරුද්ධ මතයක් දරන ජනතා විමුක්ති පෙරමුණ හා දෙමළ ජනයාගේ අයිතීන් වෙනුවෙන් බලය විමධ්‍යගත කිරීම සඳහා පෙනී සිටින දෙමළ ජාතික සන්ධානය අතර බලය බෙදා හදා ගැනීම සම්බන්ධව සාකච්ඡාවක් පවත්වා තිබේ.
පක්ෂ දෙකෙහිම මුල් පෙළේ නායකයන් 11 සඳුදා ජවිපෙ මුලස්ථානයේදී බලය බෙදා හැරීම පිළිබඳව සාකච්ඡා ආරම්භ කර ඇත.
“හැම කෙනාම කොහොමද බලයට හවුල් කර ගන්නෙ කියලා අපි සාකච්ඡා කළා. සියලු ජන කොටස් බලයට හවුල් කර ගැනිමේ නව ව්‍යුහයක් පිලිබඳව සාකච්ඡා කරන්න, අදහස් හුවමාරු කර ගන්න අපි සුදානම්.” යැයි සාකච්ඡා අවසානයේ ජවිපෙ නායක අනුර කුමාර දිසානායක මාධ්‍ය වෙත කියා සිටියේය.
ජනපති, අගමැති දෙපල සමග දෙමළ ජාතික සන්ධානය පැවැත්වූ සාකච්ඡා වල දී බලය බෙදීම සම්බන්ධයෙන් ඇති කරගත් එකඟතා සඳහා සහාය ලබා දීමට ජවිපෙ නායකත්වය අනුමැතිය පල කළ බව ආර් සම්බන්ධන් මන්ත්‍රීවරයා මාධ්‍යවේදීන් හා පැවසීය.
“ජනාධිපතිතුමත් අගමැතිතුමත් හම්බ වෙලා අපි බලය බෙදීම සම්බන්ධව කතා කළා. ඒ සම්බන්ධව වුන දේවල් අපි JVP සහෝදරවරුන්ට කිව්වා.”
ද්විපාර්ශවීය සාකච්ඡා මගින් රටේ ප්‍රධාන පක්ෂ දෙකේ ගමන් මාර්ගයට බලපෑමක් ඇති කළ හැකි බවට TNA ජවිපෙ නායක දෙපල විශ්වාසය පල කළහ.
Facebook Comments
