අධ්‍යාපනය හමුදාකරණය කිරීමට එරෙහිව සිසු හා වෘත්තිය සමිති නායකයන් පසුගියදා දියත් කළ විරෝධතාවයේදී පොලිස් නිලධාරීන්ගේ හැසිරීම “පිළිකුල් සහගත” යයි හෙලා දකින වෛද්‍ය පීඨ ශිෂ්‍ය ක්‍රියාකාරී කමිටුව ඒ සම්බන්ධයෙන් විධිමත් පරීක්ෂණයක් පවත්වන ලෙස පොලිස්පතිවරයාගෙන් ඉල්ලා තිබේ.
පොලිස්පති සී.ඩී වික්‍රමරත්න වෙත ලිපියක් යොමු කරමින් එම කමිටුව අවධාරණය කර ඇත්තේ සාමකාමී සහ නිරෝධායන නිර්දේශයන්ට අනුකූලව පැවැත්වූ එම විරෝධතාවයට ශ්‍රී ලංකා පොලීසිය මැදිහත් කරගනිමින් ආණ්ඩුව විසින් එල්ල කරනු ලැබූ මිලේච්ඡ ප්‍රහාරය වෛද්‍ය පීඨ ශිෂ්‍ය ක්‍රියාකාරී කමිටුව ලෙස තරයේ හෙලාදකින බවයි.
“කොතලාවල පනත පාර්ලිමේන්තු විවාදය සදහා ඉදිරිපත් කරන ලද දිනයේදී සරසවි සිසුන්, ආචාර්යවරුන් සහ වෘත්තීය සමිති එකතු පාර්ලිමේන්තු වටරවුමේදී විරෝධතාවයේ නිරත වූයේ අප රටේ ව්‍යවස්ථාවේ සඳහන් ජනතාවට ඇති ප්‍රජාතන්ත්‍රවාදී අයිතියක් ලෙසටය.”
එහෙත් එම විරෝධය ආරම්භ කිරීමටත් ප්‍රථමයෙන් උද්ඝෝෂකයන් වෙත කිසිඳු ආකාරයක කරුණු පැහැදිලි කිරීමකින් හෝ තොරව එම සාමකාමී උද්ඝෝෂණයට සහභාගී වූ 33 දෙනකු පොලිසිය විසින් අත් අඩංගුවට ගත් බව පෙන්වා දෙන වෛද්‍ය පීඨ ශිෂ්‍ය ක්‍රියාකාරී කමිටුවේ කැදවුම්කරු ඉමේෂ් සංගීත් පොලිස්පතිවරයාට අවධාරණය කර ඇත්තේ එහිදී උද්ඝෝෂකයන්‍ට පහරදෙමින්, බිම ඇදගෙන යමින්, සිදුවිය හැකි ජීවිත හානි පවා නොසලකමින්, කාන්තාවන්ගේ ඇඳුම් පවා ඉරෙන ලෙසින් පොලිස් නිලධාරීන් හැසිරුණු ආකාරය ඉතා පිළිකුල් සහගත බවයි.
එම අවස්ථාව වාර්තාකිරීම සදහා පැමිණි සිටි මාධ්‍යවේදීන්ටත් පොලිස් නිලධාරීන් බාධා සිදුකර තිබෙන බව ශිෂ්‍ය සංගම් නායකයා පොලිස්පතිවරයාට දැනුම් දී තිබේ.
එසේම අත්අඩංගුවට පත්වූවන්ට උසාවිය විසින් ඇප ලබා දුන් අවස්ථාවේ නැවතත් ඔවුන් මුලතිව්හි පිහිටි ගුවන් හමුදා කදවුරකට යැවීම පොලීසිය විසින් නීතිය අත්තනෝමතික ලෙස භාවිතා කිරීමක් බවයි වෛද්‍ය පීඨ ශිෂ්‍ය ක්‍රියාකාරී කමිටුව පවසන්නේ.
“ඔවුන්ට නිරෝධායනය අවශ්‍ය නොවන බව උසාවිය විසින් පැහැදිලි ලෙසම ප්‍රකාශ කර තිබියදීත් එය නොතකා පොලිසිය මෙසේ හැසිරීම නීතිය ආරක්ෂා කිරීම වෙනුවෙන් ව්‍යවස්ථාපිතව නිර්මාණය කළ ආයතනයක් විසින් අවිනීතිය ක්‍රියාවට නැංවූ අවස්ථාවක් ලෙස ඉතිහාසගත වනු ඇත.”
“එක රටක් එක නීතියක්” යන තේමාව පෙරටු කරගෙන බලයට පැමිණි ගෝඨාභය පාලනය, ආණ්ඩුවට වාසි සහගත ජන ඒකරාශීවීම් සඳහා එක් ආකාරයකටත්, ආණ්ඩු විරෝධී ජන ඒකරාශීවීම්වලට තවත් ආකාරයකිනුත් කොවිඩ් මාර්ගෝපදේශ අවභාවිතා කිරීම සැබැවින්ම හාස්‍යයට කරුණක් බව පෙන්වා දෙන වෛද්‍ය පීඨ ශිෂ්‍ය ක්‍රියාකාරී කමිටුවේ කැදවුම්කරු ඉමේෂ් සංගීත් පොලිස්පතිවරයාට අවධාරණය කර ඇත්තේ පොලිසිය ආණ්ඩුවේ උවමනා ඉටු කර දෙන ආයතනයක් බවට පත්ව ඇති බවයි.
“අද ඔවුනට එම වුවමනාව ඉටුකර දෙන ආයතනය බවට ශ්‍රී ලංකා පොලීසිය පත්ව ඇත. එහෙත් ශ්‍රී ලංකා පොලීසියේ වගකීම වන්නේ දේශපාලකයෙක්, දේශපාලන පක්ෂයක් හෝ දේශපාලන වුවමනා ආරක්ෂා කිරීම නොව, ජනතාව ආරක්ෂා කිරීම බව අප විශ්වාස කරමු.”
ආණ්ඩුවේ පටු වුවමනා වෙනුවෙන් පොලිස් නිලධාරීන් යොදාගැනීම සම්බන්ධයෙන් දැඩි අප්‍රසාදය පළකරන වෛද්‍ය පීඨ ශිෂ්‍ය ක්‍රියාකාරී කමිටුව පොලිස්පති සී.ඩී වික්‍රමරත්නගෙන් ඉල්ලා ඇත්තේ ඉහත සිදුවීමේදී පොලිස් නිලධාරීන්ගේ ක්‍රියාකලාපයන් සම්බන්ධයෙන් විධිමත් පරීක්ෂණයක් සිදු කරන ලෙසයි.
Facebook Comments
