පාස්කු බෝම්බ සැකකරුවකු නිදහස්

දෙවසරකට ඉහතදී පාස්කු ඉරුදින බෝම්බ ප්‍රහාර මාලාව සම්බන්ධයෙන් සැකපිට අත්අඩංගුවට ගත් සැකකරුවන් හැට තුන් දෙනකු තවදුරටත් රිමාන්ඩ් භාරයේ තැබීමට නියෝග කළ මඩකලපුව අධිකරණය එක් සැකකරුවෙක් නිදහස් කිරීමට නියෝග කර තිබේ.

මාරාන්තික වසංගත ව්‍යාප්තිය හමුවේ රට අගුලා ලා තිබීම හේතුවෙන් සැකකරුවන් හැට හතර දෙනා ශාරිරික ලෙස අධිකරණය හමුවට ඉදිරිපත් නොකළත් විනිසුරුවරයා වීඩියෝ තාක්ෂණය ඔස්සේ නඩු කටයුතු මෙහෙයවු බව පළාත් බද වාර්තාකරුවෝ පවසති.

සැප්තැම්බර් 16 බ්‍රහස්පතින්දා මඩකලපුව මහේස්ත්‍රාත් ඒ.සී.එම්. රිස්වාන් නියෝග කර ඇත්තේ මොහොමඩ් හිල්මි නැමති සැකකරු ඇප මත නිදහස් කර සෙසු සැකකරුවන් හැට තුන් දෙනා සැප්තැම්බර් 30 වැනි දා දක්වා තව දුරටත් රක්ෂිත බන්ධනාගාර ගත කරන ලෙසයි.

අද දිනයේ නිදහස හිමි වු මොහොමඩ් හිල්මි කාත්තන්කුඩියේ පදිංචි කරුවකු බවයි පළාත් බද වාර්තාකරුවන් පවසන්නේ.

පාස්කු ඉරු දින බෝම්බ ප්‍රහාර මාලාවේ මහ මොළකරු ලෙස මාධ්‍ය ඔස්සේ ප්‍රකාශයට පත්වී ඇති සහරාන් හෂීම් සමඟ සබඳතා පැවැත්වීමේ චෝදනා මත වසර දෙකකට ඉහතදී අත්අඩංගුවට ගත් සැකකරුවන් 69 දෙනා අතුරින් හය දෙනෙක් මේ වන විටත් අධිකරණය මගින් නිදහස් කර ඇති බව පළාත් බද වාර්තාකරුවෝ පවසති.

අත්අඩංගුවේ සිටින සැකකරුවන් අතර සහරාන් හෂීම්ගේ නැගනියද වේ.

වීඩියෝ තාක්ෂණය ඔස්සේ අධිකරණය හමුවට ඉදිරිපත් කර තිබු සැකකරුවන් දිවයිනේ විවිධ පළාත් තුළ රක්ෂිත බන්ධනාගාරගත කර සිටි පිරිසක් බව වාර්තාකරුවෝ තව දුරටත් පවසති.

සැකකරුවන් අතුරින් වැඩි පිරිසක් කාත්තන්කුඩි, කල්මුනේ, සයින්දමරදු, සම්මන්තුරේ ආදී ප්‍රදේශ වල පදිංචි කරුවන් වේ.

මිනිස් ජීවිත 268 ක්

පාස්කු ප්‍රහාරයේ සැකකරුවන් ලෙස ශ්‍රී ලංකාවේ අත් අඩංගුවේ ඉන්නා තිදෙනකුට එරෙහිව ඇමරිකා එක්සත් ජනපදය චෝදනා ගොනු කොට ඇති අතර , ත්‍රස්ත නීති යොදාගෙන දිවයින තුල සිරකොටගෙන ඉන්නා සිය ගණනකගෙන් නඩු පවරා ඇත්තේ පනහකටත් අඩු පිරිසකට පමණි.

පාස්කු ඉරුදින ප්‍රහාරය ගැන විමර්ශන, විවේචනය කරන පුද්ගලයන්ට එරෙහිව නීතිමය පියවර ගන්නා බවට විශේෂ ප්‍රකාශයක් කරමින් පසුගියදා අනතුරු ඇගවු පොලිස්පති සී.ඩි වික්‍රමරත්න එහිදී පවසා තිබුනේ ප්‍රහාරය සම්බන්ධයෙන් අත් අඩංගුවට ගත් පුද්ගලයන් 723 කගෙන් 311 දෙනෙක් තවමත් රිමාන්ඩ් බාරයේ සිින බවයි.

“පොලිස් පරීක්ෂණ වලින් සැකපිට අත් අඩංගුවට ගත් පුද්ගලයන් 723 කගෙන් 311 දෙනෙක් තවමත් රිමාන්ඩ් බාරයේ සිටිනවා, රුපියල් මිලියන 360 මුදල් රාජසන්තක කර තවත් රුපියල් මිලියන 168 ක දේපොළ තහනම් කර තිබෙනවා.” පැවසූ පොලිස්පති ” සැකකරුවන් 46 දෙනෙකුට එරෙහිව මහාධිකරණයේ අධිචෝදනා 11 ක් ගොනු කර තිබෙනවා” යැයි වැඩි දුරටත් සදහන් කළේය.

මහජනතාවගේ අදහස් ප්‍රකාශන අයිතියට ගරු කරන බව පවසන පොලිස්පති වික්‍රමරත්න “ පොලිසියේ විමර්ශනයෙන් පසු පවරා ඇති නඩු වලට අගතියක් වන නිසා ඒවා විවේචනය හා හෑල්ලු කිරීම ගැන නීතිමය පියවර ගැනීම කෙරෙහි සැලකිල්ල දක්වනවා” යනුවෙන් එහිදී වැඩි දුරටත් අනතුරු අඟවීය.

පාස්කු ප්‍රහාරය ගැන කිසියම් පාර්ශවයකට යම් අදහසක් තහවුරු කිරීමට හැකියාවක් ඇත්නම් අපරාධ පරීක්ෂණ දෙපාර්තමේන්තුවට පැමිණ කරුණු ඉදිරිපත් කරන ලෙස ද ඔහු ඉල්ලා සිටියේය.

පොලිස් ප්‍රධානියා තම විශේෂ ප්‍රකාශය කළේ පාස්කු ප්‍රහාරය පිළිබඳ විමර්ශනය කිරීමට පත් කරන ලද ජනාධිපති කොමිසම විසින් චෝදනා නගා ඇති ජ්‍යෙෂ්ඨ පොලිස් නිලධාරීන් දෙදෙනෙක් ඊට විරුද්ධව ජනමාධ්‍ය හමුවේ අදහස් දැක්වීමෙන් අනතුරුවය.

පාස්කු ප්‍රහාරය සිදුවන වකවානුවේ මීගමුව ප්‍රදේශය බාර නියෝජ්‍ය පොලිස්පති ලෙස කටයුතු කළ දේශබන්දු තෙන්නකෝන් ප්‍රහාරය වලක්වා ගැනීමට නිසි මැදිහත්වීමක් සිදු කර නොමැති බවට ජනාධිපති කොමිසමෙන් චෝදනා එල්ලවී තිබෙන අතර එකල බස්නාහිර පළාත බාර ජ්‍යෙෂ්ඨ නියෝජ්‍ය පොලිස්පති ලෙස කටයුතු කළ නන්දන මුණසිංහට නඩු පවරන ලෙස කොමිසම විසින් නිර්දේශ කර ඇත.

තමන් සිංහල බෞද්ධයන් වීම නිසා එම චෝදනා නැගී ඇතැයි පැවසූ නිලධාරීන් දෙදෙනා එයින් ගලවා දෙන ලෙස නාහිමිවරුන් නැමද ඉල්ලා තිබුණි.

දේවස්ථාන සහ සංචාරක හෝටල් කිහිපයක් ඉලක්ක කර ගනිමින් 2019 අප්‍රේල් මස 21 වන දින එල්ල කළ මරාගෙන මැරෙන බෝම්බ ප්‍රහාර මාලාව නිසා 250 කට අධික සාමාන්‍ය වැසියන් සංඛ්‍යාවක් මියගියහ.

කටුවාපිටිය ශාන්ත සෙබස්තියන් දේවස්ථානය, කොටහේන කොච්චිකඩේ ශාන්ත අන්තෝනි දේවස්ථානය, මඩකලපුව සියොන් දේවස්ථානය, දෙහිවල හෝටලයක සහ කොළඹ කිංග්ස්බරි, ෂැන්ග්‍රිලා, සිනමන් ග්‍රෑන්ඩ් හෝටල්වල දෙවසරකට ඉහතදී බෝම්බ පිපිරීම් සිදු වුයේ පුද්ගලයන් 268ක් ජීවිතක්ෂයට පත්කරමින්, තවත් 500කට අධික ප්‍රමාණයක් තුවාල සිදුකරමිනි.

පාස්කු ඉරුදින ප්‍රහාරයට වගකිවයුත්තන්ට එරෙහිව දැනට ගෙන ඇති නෛතික ක්‍රියාමාර්ග පිළිබඳ සෑහීමකට පත්නොවන බව කොළඹ අගරදගුරු කාදිනල් මැල්කම් රංජිත් හිමියෝ දිගින් දිගටම අවධාරණය කරමින් සිටිති.

පාස්කු ප්‍රහාරය ගැන සාධාරණ පරීක්ෂණයක් කර අපරාධ කරුවන්ට දඩුවම් ලබා දීමට රාජපක්‍ෂ ආණ්ඩුව කටයුතු නොකළහොත් ඊට එරෙහිව ජාත්‍යන්තර ආධාර පතන බව අගමැති මහින්ද රාජපක්ෂ විදේශ ඇමැති ජී.ඇල් පිරිස් ඇතුළු 15 දෙනකුගෙන් යුත් කණ්ඩායමක් ඉතාලියේ සංචාරයක නිරත වන මොහොතේ ඉතාලියේ බොලොඤ්ඤා නගරයට රැස්වූ කතෝලිකයන් ප්‍රමුඛ ලාංකිකයන් විරෝධතා දක්වා අවධාරණය කර තිබුනි.