ජනපති අණින් මුතුරාජවෙළ කඩොලාන පාරිසරික පද්ධතිය ගොඩ කිරිම නවතී (VIDEO)

0

මුතුරාජවෙළ කඩොලාන පාරිසරික පද්ධතියට හානි පමුණුවමින් සිදු කෙරුණු ඉඩම් ගොඩකිරීම් දෙකක් ජනාධිපති අණින් නවතා දැමු බව ජනාධිපති මාධ්‍ය අංශය පවසයි.

ජාඇළ, දඩුගම ප‍්‍රදේශයේ ස්ථාන දෙකකදී නීතිවිරෝධි අයුරින් මහා පරිමාණ ලෙස සිදු කෙරුණු ඉඩම් ගොඩකිරීම් දෙකක් පිළිබද ප‍්‍රදේශවාසීන් විසින් ඊයේ (04) දින ජනාධිපතිතුමා වෙත කරන ලද පැමිණිල්ලකට අනුව ජනාධිපතිවරයාගේ උපදෙස් මත මධ්‍යම පරිසර අධිකාරිය විසින් මෙම ගොඩ කිරිම් නවතා දමා ඇත.

මධ්‍යම පරිසර අධිකාරියේ නිලධාරින් සහ ඉඩම් ගොඩකිරීමේ හා සංවර්ධනය කිරීමේ සංස්ථාවේ නිලධාරීන් ජාඇල පොලිසිය සමග අද එම ස්ථාන වෙත ගොස් විමර්ශන කටයුතු ආරම්භ කළ අතර ජනාධිපතිතුමාගේ උපදෙස් පරිදි එම අනවසර ඉඩම් ගොඩකිරීම් වහාම නවතා දැමීමට පියවර ගෙන තිබේ.

මුතුරාජවෙල තෙත් බිම ඉතා ඉහළ ජෛව විවිධත්වයකින් යුක්ත පරිසර පද්ධතියක් වන අතර එබැවින් මෙහි වෙසෙන සියොතුන් අතර දේශීය මෙන් ම විදේශීය පක්ෂීන් ද වේ.මෙය කිවුල්දියට ම ආවේණික වූ කඩොලාන පරිසරයකින් ද, විවිධාකාර සියොතුන් හා උභය ජීවීන්ගෙන් ද, විවිධ කෘමිවිශේෂ හා ජලජ පැළෑටිවලින් ද ස්වයංපෝෂිත වූ තෙත් බිමකි.

පරිසරයට සහ ජෛව විවිධත්වයට හානිවන අයුරින් සිදුකෙරෙන මෙම අනවසර ඉඩම් ගොඩකිරීම්වලට එරෙහිව පවතින නීති රීති යටතේ උපරිම දඩුවම් ලබාදීමට ජනාධිපතිතුමා උපදෙස් ලබා දී ඇති බව මධ්‍යම පරිසර අධිකාරිය පවසයි.

Facebook Comments