හුලං මෝල් නිසා මන්නාරම් දූපත විනාශ වී යතැයි බිය පල වේ

සංවර්ධනයේ නාමයෙන් මන්නාරම දුපත තුළ සිදු කරන ව්‍යාපෘති හේතුවෙන් ශ්‍රී ලංකා සිතියමෙන් මන්නාරම දුපත සම්පුර්ණයෙන්ම මුහුදට යටවීමේ අවදානමක් පවතින බව පෙන්වා දෙමින් විරෝධතාවයක් දියත් කර තිබේ.

මන්නාරම සිවිල් පුරවැසි කමිටුව ඇතුළු සිවිල් සංවිධාන කිහිපයක සංවිධානත්වයෙන් ජනවාරි 26 වැනිදා දියත් කළ විරෝධයට සිය ගණනින් ප්‍රදේශවාසීන්ද එක්ව සිටි බවයි පළාත් බද වාර්තාකරුවන් පවසන්නේ.

විරෝධතා පුවරුද අතැතිව, කාන්තාවන් බහුතරයක් වු විරෝධතාකරුවන් මන්නාරම ප්‍රධාන පාලම අසලින් ආරම්භ කළ විරෝධතා පෙලපාලියෙන්, මන්නාරම නගරය තෙක් පැමිණි එහිදී උද්ඝෝෂණයක් දියත් කර තිබේ.

එහිදී ඔවුන් පෙන්වා දී ඇත්තේ මේ වන විට මන්නාරම දුපතේ අධි බලැති සුළං කුළුණු 36 ට අධික ප්‍රමාණයක් ඉදි කර ඇති අතර විදේශිය සමාගම්වල සහාය ඇතිව තවත් අධි බලැති සුළං කුළුණු 100 ට වැඩි ප්‍රමාණයක් සවි කර මන්නාරම දුපත අධි බලැති සුළං බලාගාරයක් බවට පත් කිරීමේ සැලසුමක් පවතින බවයි.

එක් සුළං කුළුණක් වෙනුවෙන් අක්කර හය හමාරක භුමියක් අත්පත්කරගැනීම සදහා නීතිමය වැඩ පිළිවෙලක් සකස් කර ඇති බවටද චෝදනා කළ ඔවුන් වැඩි දුරටත් අවධාරණය කළේ මේ ආකාරයෙන් ඉඩම් පවරා ගැනීම නිසා මන්නාරම දුපතේ වාසය කරන ජනතාවට ඉඩම් ගැටළුවකට මුහුණ දී වෙනත් ප්‍රදේශවලට සංක්‍රමණය වීමට සිදු වනු ඇති බවයි.

වසර 30 ක යුද්ධයෙන් බැටකෑම නිසා සියල්ල අහිමි වී පිඩාවට පත් ව සිටින මන්නාරම් වැසියන්ට මෙම ව්‍යාපෘති ක්‍රියාත්මක වීම හරහා ඔවුන්ගේ ජීවන උපායන් අඩාල වී දුපත අත හැර යෑමට සිදු වනු ඇති බව ඔවුන් එහිදී තව දුරටත් පෙන්වා දී තිබුනි.

යුද හමුදාව විසින් බලහත්කාරයෙන් අත්පත්කරගෙන සිටින මන්නාරම් වැසියන්ගේ ඉඩම් නිදහස් කරන ලෙසත් විරෝධතාකරුවන් ඉල්ලා සිටි බව පළාත් බද වාර්තාකරුවෝ වැඩි දුරටත් පවසති.

විරෝධතාවය අතරතුරදී ප්‍රදේශයේ මාධ්‍යවේදීන් වෙත අදහස් දක්වමින් මන්නාරම පුරවැසි කමිටුවේ සභාපති එස්. මාර්කස් පියතුමා අනාවරණය කර තිබුනේ ඉදිරි වසර 50 සදහා දුපතේ ඛනිජ වැලි කැනීම් සදහා පෞද්ගලික ඉඩම් අක්කර 5000 ක් පුද්ගලයන් වංචනික ලෙස මිල දී ගෙන ඇති බවයි.

“අදානි සමාගම සුළං කුළුණු 54ක් පිහිටුවන්න යනවා. කොහොම උනත්, ඔවුන් එය කරන්න යන්නේ වෙරළ තීරයේ නෙමෙයි නේවාසික ප්‍රදේශ වල. මේ නිසා දහස් ගණන් තල් ගස්, ගස්, මිනිසුන්ගේ ගෙවල් විනාශ වීමේ අවදානම ඇති වෙලා තියනවා. සුළං බල ව්‍යාපෘතියේ දෙවැනි අදියර තාල්වුපාඩු ප්‍රදේශයේ කරන්න යනවා. මේ නිසා තවත් ඉඩම් ටිකක් අපට අහිමි වෙනවා. ඊටත් වඩා ඉදිරි වසර 50 තුළ අපේ දුපතේ ඛනිජ වැලි ලබා ගැනීමේ උත්සාහයක් දියත් වෙමින් පවතිනවා. අපේ දුපත විනාශ කිරීමේ නපුරු අරමුණුනෙන් යුත් පුද්ගලයන් මේ වන විට පෞද්ගලික ඉඩම් අක්කර 5000 ක් වංචනික ලෙස මිල දී අරගෙන අවසරය බලාපොරොත්තුවෙන් ඉන්නවා.”

උද්ඝෝෂණය දියත් කිරීමෙන් පසු විරෝධතාකරුවන් දිස්ත්‍රික් ලේකම් කාර්යාලය වෙත ගොස් සිය ඉල්ලීම් ඇතුලත් සන්දේශයක් අතිරේක දිස්ත්‍රික් ලේකම් එම්. ශ්‍රී ස්කන්ධකුමාර් වෙත බාර දීමට කටයුතු කර තිබේ.