ආණ්ඩු පක්ෂ නායකයෝ වෘත්තීය සමිති ලොක්ඩවුන් යෝජනාව ජනපතිට දෙති

ජනාධිපති හමුවී හිටපු අගමැති ලබා දුන් නිර්දේශවලින් පසු රට අගුලු දැමීමේ වෘත්තීය සමිති යෝජනාවට පාලක සභාගයේ කුඩා පක්ෂ වල මෙන්ම මහ නාහිමිවරුන්ගේ ද අනුමැතිය ලැබීමත් සමග ජනාධිපති හෙට[20] දිනයේ ජාතිය ඇමතීමට තීරණය කොට තිබේ.

කොළඹ මාධ්‍ය වාර්තා සඳහන් කරන්නේ ජනාධිපති ගෝඨාභය රාජපක්‍ෂ දැනුම් දීමට යන්නේ රට වසා දැමීමේ තීරණයක් විය හැකි බවයි.

රාජපක්‍ෂ පාලක සභාගයේ හවුල්කාර පක්ෂ 10 ක් හා මල්වතු අස්ගිරි දෙපාර්ශවයේ නායක හිමිවරුන් දෙපල ද 19 වැනි බ්‍රහස්පතින්දා ජනාධිපති වෙත ලිපි යොමු කරමින් ඉල්ලා සිටින්නේ වසංගතය පැතිරීම පාලනය කිරීමට නම් රට අගුල් දැමීමේ අවශ්‍යතාවයි.

“රට විවෘතව තිබුණත්, නිරෝධායනය වෙන සහ රෝගයට බියෙන් සිටින බහුතර ජනයා හමුවේ රට අකර්මන්‍ය වී ඇති බවයි “ එබැවින් රෝගය පාලනය කළ විට ජනයා විශ්වාසයෙන් නැවත ආර්ථික ක්‍රියාවලියට එක් වනු ඇතැයි අපේක්‍ෂා කරන හවුල්කාර පක්‍ෂ සති තුනකට රට අගුල් දමන ලෙස ඉල්ලා සිටිති.

“ කොරෝනා රෝගීන් ගණන සම්බන්ධයෙන් තොරතුරු චේතනාන්විතව විකෘති කිරීමක් ජාතික මට්ටමේ නිලධාරින් පිරිසක් සිදු කර තිබේ. සංඛ්‍යා ලේඛන විකෘති කිරීමෙන් මෙවැනි අභියෝගයක් විසඳිය හැකි යැයි යමෙක් කල්පනා කරන්නේ නම් එය විහිළුවකි“ යැයි එම පක්ෂ 10 ජනාධිපති වෙත යැවූ ලිපියේ සඳහන්වේ.

මල්වතු අස්ගිරි දෙපාර්ශවයේ නාහිමිවරුන් සිය ලිපිය මගින් “ ජන ජීවිතය සුරක්ෂිත කරනු වස් සෞඛ්‍ය විශේඥයින්ගේ උපදෙස් අනුව සතිය කාලයක් රට වසා දමා ජනයාට අවශ්‍ය සලසමින් රෝග ව්‍යාප්තිය පාලනයට පියවර ගන්න“යැයි ජනාධිපතිගෙන් ඉල්ලා සිටී.

ජනාධිපති වෙත හිටපු අගමැති රනිල් වික්‍රමසිංහ ඉදිරිපත් කළ නිර්දේශයන් හා සමානකමක් පෙන්නුම් කරන ආණ්ඩුවේ හවුල් කාර පක්ෂ ජනාධිපතිට යැවූ ලිපියට අපේ ජනබල පක්ෂයේ අතුරලියේ රතන භික්ෂුව ප්‍රජාතන්ත්‍රවාදී වාමාංශික පෙරමුණේ අමාත්‍ය වාසුදේව නානායක්කාර, ලංකා සම සමාජ පක්ෂයේ මහාචාර්ය තිස්ස විතාරණ, ජාතික නිදහස් පෙරමුණේ අමාත්‍ය විමල් වීරවංශ, පිවිතුරු හෙළ උරුමයේ අමාත්‍ය උදය ගම්මන්පිල, ජාතික කොන්ග්‍රසයේ ඒ එල් එම් අතාවුල්ලා, එක්සත් මහජන පක්ෂයේ ටිරාන් අලස්, ශ්‍රී ලංකා කොමියුනිස්ට පක්ෂයේ වෛද්‍ය ජී වීරසිංහ, ශ්‍රී ලංකා මහජන පක්ෂයේ අසංක නවරත්න සහ යුතුකම ජාතික සංවිධානයේ ගෙවිඳු කුමාරතුංග යන පක්‍ෂ නායකයන් අත්සන් තබා තිබිණි.

“නීතියට පටහැනිව ක්‍රියාත්මක වන හමුදාපති ශවේන්ද්‍ර සිල්වා යටතේ පවතින කොවිඩ් මර්දන බලකාය විසුරුවා හැර එහි වගකීම කැබිනට් මණ්ඩලය, ආපදා කළමනාකරන සභාව, සහ සෞඛ්‍ය සේවා අධක්‍ෂක ජෙනරාල් යටතට පත් කරන ලෙස“ හිටපු අගමැති රනිල් වික්‍රමසිංහ විසින් ජනාධිපති ගෝඨාභය රාජපක්‍ෂට නිර්දේශ කරමින් තවත් ඉල්ලීම් හා යෝජනා 20 ක් ඉදිරිපත් කර තිබුණි.

විපක්‍ෂ නායකයා ඇතුළු විපක්ෂයේ මන්ත්‍රීවරුන්ගේ සහභාගිත්වයෙන් ආපදා කළමනාකරණ සභාව රැස් කිරීම, ආර්ථික අර්බුදයකට මුහුණ දී සිටින ආණ්ඩුව හදිසි ආර්ථික සහන වෙනුවෙන් ජාත්‍යන්තර මුල්‍ය අරමුදල සමඟ සාකච්ජා කිරීම ද, එන්නත් ලබා දීම ඇතුළු සියලු සෞඛ්‍යට අදාළ කටයුතු වෛද්‍ය හා සෞඛ්‍ය නිලධාරීන්ට බාර දෙන ලෙස ද මේ ඉල්ලීම් අතර වේ.

ජනාධිපති ලේකම් කාර්යාලයේ 17 වැනි අඟහරුවාදා පැවති හිටපු අගමැති රනිල් වික්‍රමසිංහ හා ජනාධිපති ගෝඨාභය රාජපක්‍ෂ අතර සාකච්ජාවලින් අනතුරුව කොළඹදී මාධ්‍යවේදීන් ඇමතූ හිටපු එජාප මන්ත්‍රී රජයේ හෙද නිලධාරීන්ගේ සංගමයේ ලේකම් සමන් රත්නප්‍රිය ඇතුළු වෘත්තීය සමිති නියෝජිතයන් කියා සිටියේ “සිකුරාදා [20] වන විට ආණ්ඩුව රට අගුලු දැමීමක් නොකරන්නේ නම් වෘත්තීය සමිති විසින් ස්වයං අගුලු දැමීමක් කැඳවන බව“යි .

අනතුරුව පාර්ලිමේන්තුවේ ප්‍රධාන විපක්ෂය වන සමගි බලවේගය ස්වයං අගුලු දැමීමක් සඳහා ජනතාව කැඳවන බව විපක්ෂ නායක සජිත් ප්‍රේමදාස පැවසීය.

මේ අතර රට පුරා නගර රැසක කොවිඩ් පැතිරයාමේ අවදානම හේතුවෙන් සතියක කාලයක් කඩ සාප්පු වසා දමන්නට වෙළඳ සංගම් ස්වෙච්ජාවෙන් පියවර ගෙන තිබේ.

23 වැනිදා සිට ස්වයං අගුලු දැමීමක් හෝ වෘත්තීය ක්‍රියා මාර්ගයක් දියත් කිරීමට සියළුම වෘත්තීය සමිති සමග සාකච්ජා කරන බව පැවසූ වෛද්‍ය රසායනාගාර විද්‍යාඥ වෘත්තීයවේදීන්ගේ විද්වත් සංගමයේ සභාපති රවී කුමුදේශ් “ කොවිඩ් මර්දන සෞඛ්‍ය සේවාවට බලපෑමක් නොවන අයුරින්, වෘත්තීය සමිති ආඥා පනතට අනුව මෙය දියත් කරනවා“ යැයි ඔහු පැවසීය.

ඇමති විමල් විරවංශ ට සමීප භික්ෂුවක් වන සිංහල රාවය සංවිධානයේ අක්මීමන දයාරතන කොවිඩ් රෝගය මර්දනයට එන්නත් ලබා දීමට එරෙහිව මානව හිමිකම් කොමිසමට පැමිණිලි කරමින් කියා සිටින්නේ ආණ්ඩුවේ බලහත්කාරී එන්නත්කරණය ආණ්ඩු ක්‍රම ව්‍යවස්ථාවට පටහැනි බවයි. එහෙත් රාජපක්‍ෂ ආණ්ඩුවට සමීප වෘත්තීය සංවිධානයක් වූ රජයේ වෛද්‍ය නිලධාරීන්ගේ සංගමය තුන්වැනි මාත්‍රාවක් ගැන කතා කරමින් එන්නත් ලබා ගැනීමේ අවශ්‍යතාව පෙන්වා දෙයි.