පාස්කු බෝම්බ සැකකරුවෝ නඩු නැතිව ආයෙත් රිමාන්ඩ්

පාස්කු ඉරුදින බෝම්බ ප්‍රහාරය සම්බන්ධයෙන් සැකපිට අත්අඩංගුවට ගත් සැකකරුවන් හැටකට අධික පිරිසක් අධිකරණයට ඉදිරිපත් කර යළිත් රිමාන්ඩ් ගතකර තිබේ.

අගෝස්තු 19 බ්‍රහස්පතින්දා මඩකලපුව මහේස්ත්‍රාත් ඒ.සී.එම්. රිස්වාන් හමුවට ඉදිරිපත් කළ සැකකරුවන් හැට දෙදෙනා පාස්කු ඉරු දින බෝම්බ ප්‍රහාර මාලාවේ මහ මොළකරු ලෙස මාධ්‍ය ඔස්සේ ප්‍රකාශයට පත්වී ඇති සහරාන් හෂීම් සමඟ සබඳතා පැවැත්වීමේ චෝදනා මත වසර දෙකකට ඉහතදී අත්අඩංගුවට ගත් පිරිසක් බවයි පළාත් බද වාර්තාකරුවන් පවසන්නේ.

එම සැකකරුවන් අතර කාන්තාවන් තිදෙනෙක්ද වේ.

අද අධිකරණය හමුවට ඉදිරිපත් කර තිබු සැකකරුවන් දිවයිනේ විවිධ පළාත් තුළ රක්ෂිත බන්ධනාගාරගත කර සිටි පිරිසක් බව ඔවුන් වැඩි දුරටත් සදහන් කරයි.

මඩකලපුව මහේස්ත්‍රාත් ඒ.සී.එම්. රිස්වාන් අද දිනයේ නියෝග කර ඇත්තේ සැකකරුවන් තවත් දින 14 ක් රක්ෂිත බන්ධනාගාර ගත කරන ලෙසයි.

සැකකරුවන් අතුරින් වැඩි පිරිසක් කාත්තන්කුඩි, කල්මුනේ, සයින්දමරදු, සම්මන්තුරේ ආදී ප්‍රදේශ වල පදිංචි කරුවන් බව වාර්තාකරුවෝ වැඩි දුරටත් පවසති.

මිනිස් ජීවිත 268 ක්

පාස්කු ප්‍රහාරයේ සැකකරුවන් ලෙස ශ්‍රී ලංකාවේ අත් අඩංගුවේ ඉන්නා තිදෙනකුට එරෙහිව ඇමරිකා එක්සත් ජනපදය චෝදනා ගොනු කොට ඇතත්, ත්‍රස්ත නීති යොදාගෙන දිවයින තුල සිරකොටගෙන ඉන්නා සිය ගණනකගෙන් නඩු පවරා ඇත්තේ 25කට පමණි.

දේවස්ථාන සහ සංචාරක හෝටල් කිහිපයක් ඉලක්ක කර ගනිමින් 2019 අප්‍රේල් මස 21 වන දින එල්ල කළ මරාගෙන මැරෙන බෝම්බ ප්‍රහාර මාලාව නිසා 250 කට අධික සාමාන්‍ය වැසියන් සංඛ්‍යාවක් මියගියහ.

කටුවාපිටිය ශාන්ත සෙබස්තියන් දේවස්ථානය, කොටහේන කොච්චිකඩේ ශාන්ත අන්තෝනි දේවස්ථානය, මඩකලපුව සියොන් දේවස්ථානය, දෙහිවල හෝටලයක සහ කොළඹ කිංග්ස්බරි, ෂැන්ග්‍රිලා, සිනමන් ග්‍රෑන්ඩ් හෝටල්වල දෙවසරකට ඉහතදී බෝම්බ පිපිරීම් සිදු වුයේ පුද්ගලයන් 268ක් ජීවිතක්ෂයට පත්කරමින්, තවත් 500කට අධික ප්‍රමාණයක් තුවාල සිදුකරමිනි.

කාදිනල් හිමි නොසතුටින්

පාස්කු ඉරුදින ප්‍රහාරයට වගකිවයුත්තන්ට එරෙහිව දැනට ගෙන ඇති නෛතික ක්‍රියාමාර්ග පිළිබඳ සෑහීමකට පත්නොවන බව පවසමින් ජුලි 13 වැනිදා කතොලික සභාව ලෙස මැල්කම් කාදිනල් රංජිත් හිමියන් ජනාධිපතිවරයාට පිටු 19 කින් යුත් ලිපියක් යොමු කර තිබුනි.

එයට ජනාධිපති නීති අධ්‍යක්ෂ ජනරාල්වරයාගෙන් ලද ප්‍රතිචාරය පිළිබඳව සැහීමකට පත් නොවන බවයි කොළඹ අගරදගුරු කාදිනල් මැල්කම් රංජිත් හිමියන් පවසන්නේ.

අගරදගුරු මැදුරේ අගෝස්තු 13 වැනිදා පැවැති ප්‍රවෘත්ති සාකච්ඡාවකදී කාදිනල් හිමියන් වැඩි දුරටත් පවසා තිබුනේ යුක්තිය ඉටු කරගැනීම සඳහා ජාත්‍යන්තරය හමුවට යාමේ වැඩකටයුතු මේ වන විට අරඹා ඇති බවයි.

පාස්කු ඉරුදින ප්‍රහාරයට යුක්තිය ඉටු නොවීම සහ ආණ්ඩුවේ වැඩපිළිවෙළට විරෝධය පා එළඹෙන 21 වැනිදා සෑම නිවසකම කළු කොඩි ඔසවන ලෙස කොළඹ අගරදගුරු කාදිනල් මැල්කම් රංජිත් හිමියන් රටේ සමස්ත ජනතාවගෙන් ඉල්ලා තිබේ.