බලහත්කාරයෙන් සිදු වන අතුරුදහන් කිරිම් වලට එරෙහි පනතක් රට තුල පැවතිම මැති ඇමති ආරක්ෂාවටත් සුබදායක බව ආණ්ඩුවේ ඇමතිවරයෙක් පවසයි.
වාරිමාර්ග හා ජලසම්පත් කළමනාකරණ අමාත්‍ය විජිත් විජයමුණි සොයිසා 11 අඟහරුවාදා පැවති මාධ්‍ය හමුවකදී “හැමදාම මේ ආණ්ඩුව තියෙන්නෙ නැනේ වෙනත් ආණ්ඩුවක් ඇවිත් අපිව හරි අතුරුදහන් කරන්න හැදුවොත් ඒක නිසා අපේ ආරක්ෂාවටත් හොඳයි අතුරුදහන් කිරිමේ පනතක් තියෙන එක” යි පැවසුහ.
පසුගිය රාජපක්ෂ පාලන සමයේ සහ ඊට පෙර මාධ්‍යවේදීන් අතුරුදහන් වීම පිළිබඳව සිහිකල ඇමතිවරයා ඇතැම් මාධ්‍යවේදීන් රට හැර ගියේද අතුරුදහන් විමේ තර්ජන හේතුවෙන් බව හෙළි කළේය.
පාර්ලිමේන්තුවට ගෙන ඒමට සුදානම් වන අතුරුදහන් කිරිම් වලට එරෙහි පනත් කෙටුම්පත බල පැවැත්වෙන්නේ ඉදිරි කාලයට මිස අතීතයට නොවන බවයි විජිත් විජයමුණි සොයිසා ඇමතිවරයා මෙහිදී කියා සිටියේ.
අතුරුදහන් නොවිමට සහතිකයක්
88,89 කාල වාකවාණුවේදී තමන් දේශපාලනයට පිවිසෙන විට තරුණ තරුණියන් විශාල ප්‍රමාණයක් ඝාතනය වු බව මෙන්ම සිරකඳවුරු වල සහ කඳවුරු තුළ වධ හිංසා වලට ලක් වු ආකාරය දුටු බව කී ඇමතිවරයා නැවත එවන් යුගයක් ඇති නොවීමට සහ අතුරුදහන් නොවිමට සහතිකයක් ලෙස මෙම පනත අතවශ්‍ය බව අවධාරණය කළේය.
යමෙක් අතුරුදහන් වුවහොත් එම තැනැත්තාගේ හිමිකම් සහ උරුමයන් ලබා ගැනීමට ඇති නෛතික බාධාවන්ද මෙම පනත මඟින් අහෝසි වී යන බවටයි අමාත්‍ය විජිත් විජයමුණි සොයිසා වැඩිදුරටත් කියා සිටියේ.
ත්‍රෛනිකායික හිමිවරුන්ගේ හා හිටපු ජනපතිගේ විරෝධය
බලහත්කාරයෙන් සිදුවන අතුරුදහන් කරවීම් වලට එරෙහි පනත් කෙටුම් පතට ත්‍රෛනිකායික හිමිවරුන් සහ හිටපු ජනපති පාර්ලිමේන්තු මන්ත්‍රී මහින්ද රාජපක්ෂ ප්‍රමුඛ ඒකබද්ධ විපක්ෂය ආණ්ඩුව “රණවිරුවන් දඩයම්” කිරිමට සුදානම් වන බව පවසමින් මෙම පනත සිය විරෝධය පල කර තිබුණි.
මෙම පනත් කෙටුම් පත පාර්ලිමේන්තුව හමුවට ගෙන ඒමට පෙර දින රැස්වු ත්‍රෛනිකායික මහනාහිමිවරුන් “අහිංසක සොල්දාදුවන්ට දඬුවම් කරන්නට” ජාත්‍යන්තර අවශ්‍යතාවට ගෙන එනු ලබන “භයානක පනතක්” ලෙස හැඳින් වු මෙය වහාම හකුලා ගන්නා ලෙස රජයට බල කල අතර තාක්ෂණික දෝෂයක් ඇති බව පවසමින් එම පනත පාර්ලිමේන්තුවට ඉදිරිපත් කිරිම රජය දින නියමයක් නොමැතිව කල් දැමුවේය.
Facebook Comments
