භූමිතෙල් හැංගීම ගැන වාර්තාකළ මාධ්‍යවේදීන්ගෙන් කෝටි ගණන් ඉල්ලා නඩු

0

ඩොලර් අර්බුදය හමුවේ රට ඉන්ධන හිඟයකට දැඩි ලෙස මුහුණ දී සිටියදී සඟවා තිබු භුමිතෙල් තොගයක් බලධාරීන් මැදිහත් වී බෙදාහැරීම පිළිබදව තහවුරු කෙරුණු වාර්තා පල කළ දෙමළ මාධ්‍ය ආයතන ඇතුළු මාධ්‍යවේදීන් කිහිප දෙනෙක් කෝටි ගණනක වන්දි ඉල්ලා ගොනු කළ නඩුවකට මුහුණ දීමට සිදුවීමෙන් හිරිහැරයට පත්ව සිටි.

මුලතිව් දිස්ත්‍රික් රෝහල සමීපයේ ස්ථාපිත කර තිබෙන ලංකා ඛනිජ තෙල් නීතිගත සංස්ථාව යටතේ ඇති ඉන්ධන පිරවුම් හලේ හිමිකරු මුලතිව් අධිකරණය වෙත වන්දි නඩුවක් ගොනුකරමින් ප්‍රවෘත්තියක් හරහා තමන්ට වු අපකීර්තිය වෙනුවෙන් මාධ්‍ය ආයතන තුනක්, මාධ්‍යවේදීන් හතරක් සහ රාජ්‍ය නිලධාරියකුට එරෙහිව නඩුවක් ගොනු කරමින් ඉල්ලා ඇති වන්දි මුදල රුපියල් කෝටි දහයකි.

“මුල්ලියාවලි ඉන්ධන පිරවුම්හලේ සගවා තිබු ලීටර 900 ක භුමිතෙල් මුලතිව් දිස්ත්‍රික්කයේ මිල පාලන අංශයේ නිලධාරීන් අත්පත් කරගෙන මිනිසුන්ට බෙදා දී ඇත,” යන ප්‍රවෘත්තිය පළකිරීමෙන් සහ සමාජ මාධ්‍ය ඔස්සේ බෙදාහදා ගැනීමෙන් සිය සේවා දායක කුමරයියා මහේන්ද්‍රන් ගේ කීර්ති නාමයට හානි වී ඇති බව නීතිඥ දිල්ෂානි එස්. අහංගම එවා ඇති එන්තරවාසියක සදහන්ව තිබේ.

මුලතිව් දිස්ත්‍රික්කයේ මුල්ලියාවලි රෝහල අසල ඉන්ධන පිරවුම් හලේ හිමිකරු න්නේ පළාතේ ප්‍රකට ව්‍යාපාරිකයකු මෙන්ම වට්රාපලෙයි කන්නගි අම්මාන් කෝවිලේ පාරම්පරික භාරකරුද වන්නේ සිය සේවාදායකයා බව නීතිඥ අහංගම කියා තිබේ.

මාධ්‍යවේදීන් සිදු කළ ඉහත වාර්තාකරණය හරහා තමන්ගේ කීර්තිනාමයට හානි වු බව පවසමින් ඉන්ධන පිරවුම් හලේ හිමිකරු කේ මහේන්ද්‍රන් නඩු ගොනු කර ඇත්තේ ආස්ක් මීඩියා පුද්ගලික සමාගම, ඩෑන් ටීවී ප්‍රධාන විධායක නිලධාරී එස්.එස් කුහනාදන්, මාධ්‍යවේදී ෂන්මුගම් තවසීලන්, මුලතිව් දිස්ත්‍රික් ලේකම් කාර්යාලයේ මිල පාලන අංශයේ කේ.ටී වසන්තසේකරන්, ඒසියන් මීඩියා පබ්ලිකේෂන් ආයතනය, තිනකුරල් සංස්කාරක ඒ.සබේස්වරන්, වාලම්පුරි පුවත්පත සහ වාලම්පුරි සංස්කාරක නඩරාජ් විජයසුන්දරම් වෙතයි.

කුමරයියා මහේන්ද්‍රන් වන්දි නඩුව ගොනු කරමින් වැඩිදුරටත් පවසන්නේ ජනමාධ්‍ය තුළ පළවු ඉහත පුවත නිසා මුලතිව් දිස්ත්‍රික්කය තුළ ප්‍රසිද්ධ ව්‍යාපාරිකයකු වන තමන්ගේ කීර්තිනාමයට හානි සිදු වී ඇති බවයි.

“දූෂිතයි, අවංක නැත, වංචාකාරයෙක්, භූමිතෙල් සඟවා තැබුවා, නිසි බලධාරීන්ට නොදන්වා භූමිතෙල් සඟවා තැබුවා, සාමාන්‍ය ජනතාවට බෙදා දීමට නියමිත භූමිතෙල් සඟවාගෙන එය සාමාන්‍ය ජනතාවට නොබෙදා සිටියා, සාමාන්‍ය ජනතාව ගැන තමාට කිසිම සැලකිල්ලක් නැහැ,” යනාදී චෝදනා එම පුවත් හරහා සෘජුවම තමන්ට එල්ල වී ඇති බව කුමරයියා මහේන්ද්‍රන් පවසයි.

තහවුරු කරගත් තොරතුරු

මුලතිව් මාධ්‍ය සමාජයේ ප්‍රධානියාද වන මාධ්‍යවේදී ෂන්මුගම් තවසීලන් පවසන්නේ තමන් වාර්තා කළ ප්‍රවෘත්තිය සඳහා තහවුරු කරගත් මුලාශ්‍ර පදනම් කරගත් අතර තොරතුරු දැනගැනීමේ පනත හරහා අයදුම්පතක් යොමු කර නඩුව ගොනු වීමෙන් පසු යළිත් වරක් එම තොරතුරු වල සත්‍යතාවය තහවුරු කරගත් බවයි.

මල්ලාවියේ ඉන්ධන හිඟය පිළිබඳව වාර්තා කිරීමේ යෙදී සිටියදී ඔත්තු සේවා සාමාජිකයකු ලෙස සැකකෙරෙන අයකුගේ පහර දීමට මේ වසරේ ජුනියෙදී ලක්වූ තවසීලන් මෙයින් දෙවසරකට ඉහතදී හොර ලී ජාවාරමක් හෙළිදරව් කිරීම නිසා වෘත්තීය සගයකු වන කනපතිපිල්ලේ කුමනන් සමග දරුණු ප්‍රහාරයකට ගොදුරු වූවෙකි.

යුද පීඩිත උතුරේ සිදුවන අපරාධ සහ දුෂණ වංචා හෙළි කරන ජනමාධ්‍යවේදීන් හිරිහැරයට පත් කිරීම සඳහා ශාරීරික පහර දීම් වලට අමතරව නඩු පැවරීමද පළාතේ මාධ්‍යවේදීන් පීඩාවට පත් කිරීමට හේතුවී තිබේ.
කරුණු දැක්වීම සඳහා මාධ්‍යවේදීන් විසින් කල් ඉල්ලා ඇති ඔක්තෝබර් 31 වැනිදා දක්වා නඩුව විභාගයට කැදවීමට නියමිතය.

Facebook Comments