යුද්ධයේ අවසන් අදියරේදී ශ්‍රී ලංකා රජයේ ආරක්ෂක සේනාවලට යටත් වූ හෝ භාර වූ හෝ පසු බලහත්කාරයෙන් අතුරුදහන් කරනු ලැබූ තම ඥාතීන්ට ජාත්‍යන්තර යාන්ත්‍රණයක් හරහා යුක්තිය ඉටු කළ යුතු බව යුද වින්දිත මාතාවන් මුල් පෙලේ ජාත්‍යන්තර මානව හිමිකම් සංවිධානයක නායිකාවට අවධාරණය කර තිබේ.
2009 වසරේ මැයි 18 වැනිදා යුද්ධය අවසන් වු මොහොතේ සිට දෙමළ ජනයාට යුක්තිය ප්‍රතික්ෂේප කිරීමේ 15 වැනි වසර සනිටුහන් කරමින් මුල්ලිවයික්කාල් භුමියේ පැවැත්වෙන දෙමළ වර්ග සංහාර දින අනුස්මරණයට සහභාගී වීම සදහා දිවයිනට පැමිණ සිටින ජාත්‍යන්තර ක්‍ෂමා සංවිධානයේ මහ ලේකම් ඇග්නස් කැලමාර්ඩ්ට දෙමළ මාතාවන් ඒ බව සදහන් කර ඇත්තේ අනුස්මරණයට පෙර දිනයේදී මුලතිව්හි පැවැති සාකච්ඡාවකදීය.
හත් අවුරුද්දක් තිස්සේ තම සමීපතමයන් සොයමින් යන නොනවතින ගමනේදී බුද්ධි අංශ වලින් එල්ල වන තර්ජන සම්බන්ධයෙන්ද ඇය දැනුවත් කළ බවයි, මැයි 17 වැනිදා හවස් යාමයේ පැවැති සාකච්ඡා නිමා වීමෙන් අනතුරුව මාධ්‍යවෙත අදහස් දක්වමින් මුලතිව් දිස්ත්‍රික්කයේ බලහත්කාරයෙන් අතුරුදහන් කරන ලද්දවුන්ගේ ඥාතීන්ගේ සංගමයේ සභාපතිනි මරියසුරේෂ් ඊශ්වරී මාතාව සඳහන් කළේ.
“අපේ ඥාතීන්ට වෙච්ච දේට ලංකාවෙන් යුක්තිය ලැබෙන්නේ නැහැ. එය ජාත්‍යන්තර යාන්ත්‍රණයකට යොමුකර අපට යුක්තිය ලබා දෙන්න ඕන. නැවත නැවතත් කොමිසන් සභා හදලා ලංකාවේ පරීක්ෂණ කරන්න එපා කියලත්, අපි අපේ ඥාතීන්ව එයාලාට කොහොමද බාර දුන්නේ කියලත්, ආණ්ඩුව අපි ගැන පරීක්ෂණ කරන්නේ කොහොමද, බුද්ධි අංශ අපිට තර්ජනය කරන්නේ කොහොමද, අපේ විරෝධතා මර්දනය කරන්නේ කොහොමද කියලත් අපි පැහැදිලි කළා.”
උතුරු නැගෙනහිර දෙපළාතේ දිස්ත්‍රික්ට අටම නියෝජනය කරමින් බලහත්කාරයෙන් අතුරුදහන් කරන ලද්දවුන්ගේ ඥාතීන්ගේ සංගමයේ සභාපතිවරුන් සහ ලේකම්වරුන් එක්ව සිටි එම සාකච්ඡා නිමා වීමෙන් පසුව අම්පාර දිස්ත්‍රික්කයේ බලහත්කාරයෙන් අතුරුදහන් කරන ලද්දවුන්ගේ ඥාතීන්ගේ සංගමයේ සභාපති තම්බිරාසා සෙල්වරානි මාතාව කියා සිටියේ තම සමීපතමයන්ට යුක්තිය ඉල්ලා කරන සටනේදී කිසිදු අයුරකින් දෙමුහුන් අධිකරණයක් පිළි නොගන්නා බව ඇග්නස් කැලමාර්ඩ් හමුවේ කියා සිටි බවයි.
ශ්‍රී ලංකාවට එරෙහිව එල්ලවන යුද්ධාවසානයේ අපරාධ සහ මානව හිමිකම් උල්ලංඝන සම්බන්ධයෙන් විභාග කිරීමට එක්සත් ජාතීන්ගේ මානව හිමිකම් මණ්ඩලය යොජානා කොට ඇත්තේ දෙමුහුන් අධිකරණයකි.
“දෙමුහුන් උසාවි ගැන අපිට විශ්වාසයක් නැහැ. දෙමුහුන් අධිකරණ අපි පිලිගන්නේ නැහැ. ජාත්‍යන්තර අධිකරණයක් අවශ්‍ය බව අපි තදින් කිව්වා. ඒකට විදේශිය විනිසුරුවරුන් පත් කරනවා කියලා ඇය කිව්වා. එයාලා විදේශ විනිසුරුවන් උනාට නීතිඥවරු මේහේ ඉන්න අයනේ. මෙතන ඉන්න අයට අපේ ප්‍රශ්න කියන්න බැහැ. ජාත්‍යන්තර යාන්ත්‍රණය අපිට සුදුසුයි. එහෙම උනොත් අපි සාක්ෂි දෙන්න ලැස්තියි කියලා අපි කිව්වා.”
යුද හමුදාව විසින් වසර ගණනාවක් තිස්සේ බලහත්කාරයෙන් වාඩිලා සිටින, තවමත් නිදහස් නොකළ දෙමළ ජනතාවගේ ඉඩම් සම්බන්ධයෙන්ද ජාත්‍යන්තර ක්‍ෂමා සංවිධානයේ ප්‍රධානී දැනුවත් කළ බව කියා සිටි දෙමළ මව්වරුන් තවදුරටත් සදහන් කලේ යුද්ධයේ අවසාන දිනවලදී මුහුදුබඩ බිම් තීරුවකට කොටුවී ෂෙල් වෙඩි, ගුවන් ප්‍රහාර සහ කාලතුවක්කු ප්‍රහාර වලට මැදිවී රෝගාබාධ සඳහා බෙහෙත් නොලැබ සිටි දෙමළ ජනතාවගෙන් සමහරකට නොමැරී දිවි ගලවාගන්නට පිහිටවු මුල්ලිවයික්කාල් කන්ජි නමින් ඉතිහාසගතවූ කැඳ සම්බන්ධයෙන්ද ඇය දැනුවත් කළ බවයි.
විදේශගතව සිට දැන ගන්නා තොරතුරුවලට වඩා වන්නියේ භුමියට පා තැබීම තුලින් යුද වින්දිත දෙමළ ජනයාගේ ගැටළු සම්බන්ධයෙන් වඩාත් හොදින් තමන්ට අවබෝධකරගන්නට හැකියාව ලැබුන බව ජාත්‍යන්තර ක්‍ෂමා සංවිධානයේ මහලේකම් ඇග්නස් කැලමාර්ඩ් තම නියෝජිත මණ්ඩලයට පැවසු බවත් දෙමළ මව්වරුන් මාධ්‍යවේදීන් සමග පවසා තිබේ.
මෙම හමුවට පසුදා මුල්ලිවයික්කාල් භුමියේ පැවැති දෙමළ වර්ග සංහාර අනුස්මරණයට සහභාගි වූ ඇග්නස් කැලමාර්ඩ් එහිදී මාධ්‍ය අමතමින් සදහන් කර තිබුනේ මෙම අනුස්මරණය යුද වින්දිතයන්ට යුක්තිය ලබා දීමට ජාත්‍යන්තර ප්‍රජාව ද අපොහොසත් වීමේ දරුණු මතක් කිරීමක් බවයි.
“අද දිනට යෙදී ඇති සංවත්සරය ශ්‍රී ලංකා බලධාරීන් හා ජාත්‍යන්තර ප්‍රජාව විසින් දශක තුනක් මුළුල්ලේ මෙරට පැවති සන්නද්ධ ගැටුමේ වින්දිතයින්ට යුක්තිය ඉටු කිරීමට සාමුහිකව අපොහොසත් වීමේ දරුණු මතක් කිරීමකි. මීට වසර 15 කට පෙර යුද්ධයේ අවසාන අදියරේදී ගිනිය නොහැකි තරමක් සිවිල් වැසියන්ගේ ජීවිත අහිමි වූ මේ බිමේ සිටගෙන සිටීම ඇත්ත වශයෙන්ම කණගාටුදායකය.”
ගාසාව, යුක්රේනය ඇතුළු යුද ගැටුම් කෙරේ ලෝක අවධානය යොමුවී තිබීම නිසා ශ්‍රී ලංකාවේ පහළොස් අවුරුද්දකට ඉහත සිදුවූ අපරාධ සම්බන්ධයෙන් යුක්තිය සලසා දීමේ වගකීම ජාත්‍යන්තර වශයෙන් ගිලිහී යාමේ අවදානම සම්බන්ධයෙන් ද ඇය අනතුරු අඟවා තිබේ.
එක්සත් ජාතීන්ගේ සංවිධානයේ විමර්ශන මගින් ගැටුමට සම්බන්ධ දෙපාර්ශවයම විසින් සිදු කරන ලද ජාත්‍යන්තර නීතියට අනුව අපරාධ, ජාත්‍යන්තර මානව හිමිකම් සහ මානුෂීය නීති උල්ලංඝනය කිරීම් පිළිබඳ විශ්වාසනීය සාක්ෂි සොයාගෙන ඇති නමුත් එවැනි බරපතල අපරාධ සම්බන්ධයෙන් ස්වාධීන හෝ අපක්ෂපාතී ජාතික පරීක්ෂණයක් අදටත් සිදු වී නොමැති බවත් ඇය එහිදී අවධාරණය කර තිබුනි.
“මේ අතර ගැටුම අතරතුර බලහත්කාරයෙන් අතුරුදන් වූවන්ගේ පවුල්වල සාමාජිකයින්ට ඔවුන්ගේ සමීපතමයන් අදටත් සොයා යාමට සිදු වී ඇත. වින්දිතයන් කොපමණ කාලයක් නිෂ්ඵල ලෙස යුක්තිය ඉල්ලා සිටියද යන්න අසන්නට ලැබීම ඇත්තෙන්ම හද කම්පා කරවන්නකි.”
මුල්ලිවයික්කාල් අනුස්මරණයෙන් දෙදිනකට හා ආණ්ඩුවේ යුද සැමරුමෙන් දිනකට පසු ඇග්නස් කැලමාර්ඩ් කොළඹදී ශ්‍රී ලංකා විදේශ අමාත්‍යවරයා මුණ ගැසී තිබුණි.
එහිදී ‘අපේ ජාතියේ නිදහස හා සාමය වෙනුවෙන්’ ශ්‍රී ලංකා යුද හමුදාවේ 26000කට වැඩි සන්නද්ධ හමුදා සාමාජික පිරිසක් දිවි දුන් බවද තවත් දහස් ගණනක් අතපය පුජා කළ බවද තමන් පැවසුවේ යයි අමාත්‍යවරයා කියා සිටී.
“කුඩා දේශීය ප්‍රේක්ෂක පිරිසක් නැලවීම සඳහා ඡන්ද පොදි දේශපාලනයේ යෙදී ඉන්නාවුන් ශ්‍රී ලංකාවේ අභ්‍යන්තර කටයුතු තුලට පිටස්තර බලපෑම් ගෙන ඒම සම්බන්ධයෙන් අපේ නොසතුට මම වැඩිදුරටත් දක්වා ලුයෙමි,” යි විදේශ අමාත්‍ය අලි සබ්රි සමාජ මාධ්‍ය ඔස්සේ ප්‍රකාශයට පත් කර තිබේ.
Facebook Comments
